Mitiyegec 47 - Deduamiti

Ngictaungo tatahau matacde

Yegecgareng yearu. Kora medacfora yeni mitiyegec yofi heigec.

¹ Ngiha ngiha sasawa, ngeni mari kpema Anutuac yegec sogac sogaigoc dendzerenggema heimibisia.

² Kebu Engenatoa ye bibiagoc, ye bangectoa bangec imocac ngictautoa.

³ Ye ngiha ngiha memayunuma nenang bageu faiyunuec. Ye bangec monnunac ngicngac hanininaac bageau faiyunuec.

⁴ Yeng Yacakowac songo negendeac amma bangec imoc meisinggeu Yacakowngo imoc negenu wiac engena anec. Kebungo fingecsaheyaac negensima bangecyombonnina nemmeec. Selac

⁵ Anutungo sogac sogaiac arogoc kurumennu enec. Kebungo trampet udumengtoagoc kurumennu enec.

⁶ Ngeni Anutuac oheha mema yegec heima eriendzong memima yegec heimibisia. Ngeni ngictaunina yaiyo kpemima yegec heimima dedengerecyegec heimibisia.

⁷ Anutu ye bangectoa bangec imocac ngictau. Ngeni yeac yegec heimima ye dengerebisia.

⁸ Anutu ye ngictau amma bangec monnunac ngicngacareng kucgoc garengyunuma kecde. Ye ngictau tataha kpetiacfu tacde.

⁹ Ngiha ngiha yeneac ngictauac medacfocngina yeni Awrahamgac Anutu yeac ngicngacfora. Nga yeni hama kpedzucnema tacgecde. Ngicngac bangectoa bangec imocac kaso amma kecandae, yeni Anutuac ngic. Imocac ye afehema afehekecbesonga.