Mitiyegec 41 - Deduamiti

Hafeigoc yeac nunumu

Yegecgareng yearu. Dawidngo yegec yofi heiec.

¹ Ngic mong ye ngicngac makpekpea yenenggareng ayemmeande, ye kenehagoc. Ebicnasou Kebungo ye ebicfunac mesima

² onggonggema kekeha garenggeu ye bangehau sogac sogaigoc kefude. Ngabafora yeneng megecdeac ayemmeu Kebungo yeneac mariu naric mi faiude.

³ Ye hafei ammiu femanu Kebungo meserima hafeia meickema monggoc mengereeude.

⁴ Neng yoac yofi deai, “O Kebu, ni gearu kopocsic meficgeai. Ge imocac neac ubaga manganeu mengerenuna.”

⁵ Ngabafocna yeneng neac yoac mangana dema yofi deandae, “Ye homeu kpara kpac ambeso.”

⁶ Ngic mongngo yugucnubeso hama ni tobannuudeac negen negeng ubahereau arenggeude. Ye yoac fora mong mi dema monggoc mama kemma imoc deyadiude.

⁷ Ngic neac modzongina tiande, yeni sasawango neac yoac sangic sangic denengeng amma wiac mangana yombong fingecnenudeac negemma

⁸ yofi deandae, “Ye hafei mangana yombong ammiu fefeunac monggoc naric mi yarude.”

⁹ Nga tosona nigoc wegenac kecande, ye negenserima kefai. Ye warac yaka nigoc nekefec nga yeng ifingoc gofoc gofohango tifacnuudeac hania miarec.

¹⁰ O Kebu, ge ubaga sifu neac manganeu miacnuna ngereema namma turunga merengyemmebade.

¹¹ Ngabafocna yeni firang amma mi memanugec, imocac yofi negenduae, ge neac negenna ngereede.

¹² Ni dindingac kecma kopocsic mong mi meficgeaiac geng nanggenuma geac hoannu fainuna ni imohai nasosoc kecbade.

¹³ Kebu Isracelac Anutu, ye nasoya nasoya kenehema keneengkecbesonga. Imoc fora nga fora yombong.