Mitiyegec 25 - Deduamiti

Ge kopocsicna nigecgubeso

Dawidngo yegec yofi heiec.

¹ O Kebuna, ubaongana miacma gearu faiba hade.

² O Anutuna, ni negenseriguma kecduae. Ngic yeneng game kpekpeu fainubauac geng kpae heiyemmena. Ngabafocna yeneng ebicnaac sogaima dedzomoc anembauac kpae heiyemmena.

³ Oc, ngic mong ye ge negensingguma tomai kefu yeneng desofoc ammibauac kpae heiyemmena. Nga ngicngac goa ikoc ayemmegecdeac areng faiandae, yeni ine game kpekpeu faiyunubesena.

⁴ O Kebu, ge singga edzacnuma hanisingga kpounenna.

⁵ Anutu ge neac ebicfunac mesi mesingic. Ge imocac yoacga forau hesicnuma faka fora edekpou anenna. Ni asoacnac kemma marai geac tomai kecduae.

⁶ O Kebu, ge wosoefacgagoc nga geng yoac dedzege amma imoc modackecnec, imocnoc hanac hanaheaunacngoc feec amma fehakecde, imoc negensina.

⁷ O Kebu, ge gombunga. Amma yoac dedzege amma imoc modackecnec, imocac neac negenna febeso. Ni ngicmedac kecma singyoac kpekecma kopocsic meficgeai, ge imoc ine mi negenna febeso.

⁸ Kebu ye gombunga, ye dindingac yombong. Ye imocac ngicngac kopocsicgoc kecdae, yeni yengena sing edekpou ayemmeude.

⁹ Ye ngicngac yumia faka dindingac modacma hesicyunuma yengena sing edekpou ayemmeude.

¹⁰ Ngicngac Kebuac dzadzahac nga dedekperagiyoac modacandae, yeni Kebu hemma yofi negenggecde, ye yoac modac modac Kebu. Amma ye yoac dedzege amma imoc modackefude.

¹¹ O Kebu, ni kopocsic ebira yombong meficgeai nga ge kpac kunenggaac amma imoc sifu wana.

¹² Ngic mong ye Kebuac ewea heikecde, ngic ifia ye merac? Kebungo yenoc sing edekpou ammiu ngic ye sing imoc meisinggema modacbeso.

¹³ Amma ngic imoc ye kekeha ngereeu wiac monggac mi obohoude nga yeac esamedacfora yeni bangec mema mingina yombong anggecde.

¹⁴ Nga ngic Kebuac ewea heikecdae, yeneng yeac ogofora anggecde. Ye yengena dzadzahac dekperagiyemmeu yeni imoc negentegecgecde.

¹⁵ Kebungo hanina uficfunac mesima meficnuudeac negeung amma kicna nasosoc yearu fikecbade.

¹⁶ Kebu, ni tembucna amma ebicgoc kecduaeac neacnec wosoefac anemma dzigenema nearu monggoc hana.

¹⁷ Ni ebicna herenau fede, imoc monggoc yadide. Ge ubaebicfunac mesinuma ebicna sasawa meickena.

¹⁸ Ge kpendzenna nga hereebicna negensima kopocsicna wadacna.

¹⁹ Neac ngabangic yeni homac amma yeni ngabatoanginagoc amma ngadenuandae, imoc negensina.

²⁰ O, ni geac hoannu hama sufubadeac kekecna onggonggema ebicfunac mesinuna. Nga ngic yeneng desofoc anembauac ge kpae heiyemmena.

²¹ Ni geac tomai kecduaeac dindingac kecma kopocsic mong mi meficgeanduae amma ikoc nga hamangecna kpac kecanduaeac faka imocngo onggonnubeso.

²² O Anutu, ge Isracel ngicngac bummenunuma ebicfunac mesinunudacna.