Mitiyegec 24 - Deduamiti

Kuc nga kibikperagiaac ngictau

Dawidngo mitiyegec yofi heiec.

¹ Bangeha bangeha nga wiac sasawa bangecfu fede, imoc Kebuac. Bangectoa bangec nga ngiha ngiha imocac witiau kecdae, yeni sasawa yeac.

² Yennoc bangec meficgema imoc kondungdoku nga dokutoa witinginau faiu seria fede.

³ Ngic merang Kebuac tikiu naric enude nga merang yeac ama kpetiacfu naric nanude?

⁴ Mong ye maria nga herea kongaha kecande nga nemuonga mi afeheude amma ikoc mi amma yoac mong mi deserima deude,

⁵ ye ifi kecmanu Kebungo ye keneheu Anutu ebicfunac mesimesi minginango ye ngic dindingac demiude.

⁶ Ngicareng Anutu hofocandae, yeni siricngina ifi. Yeni Yacakowac Anutu, yeac kicfu nambeso ayemmede. Selac

⁷ Nagutoa ngeni hereema witigec. Nagu feengkecdae, ngeni kuc nga kibikperagiaac ngictaungo ereudeac hereema kunengngoc witigec.

⁸ Nga kuc nga kibikperagiaac ngictau imoc merac? Ye Kebu kuctoa mingina amma Kebu yennoc dzikacfu firang angkecde.

⁹ Nagutoa ngeni hereema witigec. Nagu feengkecdae, ngeni kuc nga kibikperagiaac ngictaungo ereudeac hereema kunengngoc witigec.

¹⁰ Nga kuc nga kibikperagiaac ngictau imoc merac? Ye Kebu wasai habuya habuya yeneac kunengngina, yennoc kuc nga kibikperagiaac ngictau. Selac