Mitiyegec 22 - Deduamiti

Ge nocac wanudang

Yegecgareng yearu. Yegec yomoc yegec mong kpara Asoacac kebeseac, imocac uba modacma heibesonga. Dawidngo mitiyegec yofi heiec.

¹ Anutuna, Anutuna, ge ngadenuma wanudang, imoc naric mi ande. Ge neac hereau yombong kecma ebicfunac mi mesinunec, imoc mi ngereede. Ni asoring anenu kiacba ge nocac hereau namma yoacna mi negennec, ifi isoc ande.

² O Anutuna, ni hadzing tofocnac kiacba turunga mi merennennec, ni waickema mong mi kecbade.

³ Ge kpetiac, imoc fora. Isracel neneng eriendzong megenni, imocngo ngictau tatacga anude.

⁴ Bangecfocnina yeni warac negenseriguma kecgec. O, yeneng negenserigugec geng ebicfunac mesiyununec.

⁵ Yeni kpacgugec geng ebicfunac mesiyununec. Yeni negenseriguma seria nanggec ubangina kuha mi maec.

⁶ Anu ni ngic kpac, ni gususac. Ngic yeneng desofoc anenggec ngicngac yeni neac modzongina tide.

⁷ Ngicngac sasawa yeni nemma detenic anemma nedzarang sinenemma orucngina kpatitickenemma yofi dedae,

⁸ “Ge ebicga Kebuac mariu fainecac yeng ebicfunac mesigubeso. Ye geac songo negendeac ebicfunac mesigubeso.”

⁹ Kebu gennoc nonggo heremanaunac menuna fingecma sabacfu nenggacnaac namu nema febareng geng garennumana ruaegoc fekefai.

¹⁰ Ni fingeraiunacngoc geac hoannu fainugec geac anai. Ni nonggo heremanau taraifunac kecma yaguc ge Anutuna kecnecngoc.

¹¹ Ebicngo mewegenenuu mongngo mi meficnuudeac geng neac hereau mi kecbesena.

¹² Burumakangiwa homacngo oronnuma nandae. Basangac burumakangiwa kucnginagocngo oronnuma nandae.

¹³ Yeni mewegenenuma enacngina anggedae. Laionyangtoa yeneng soringina nga enacnginango wiac mong merecgegecdeac kucgoc yombong arohoandae, yeni ifi isoc andae.

¹⁴ Ngicngac yeneng doku bokonnunac kpakeandae, yeni ifi isoc ni kpakenugec mama kerengaiba sicna dzuhura sasawa fotockedacdac. Ni ubaherena kendokereha isoc amma herena manau sisingaima doku doku ande.

¹⁵ Enang dzame dzameaac noboha kerenga fede, ni ifi isoc gbanggema kucna dzikema kpac andac. Nedzarannango kerengaima dumbennau mendanggeu ge homecac sendunnu fainuna feduae.

¹⁶ Kasi yeneng oronnuma sinna tidzickecdae nga yarengic habunginagoc yeneng oronnuma nangkecdae. Yeni hanimarina nendanggedau.

¹⁷ Sicna sasawa fingectegeru ni imoc osobadeacsoc anduae. Nga ngicngac yeneng kic nearu fiyombonggema ni ifi nemma negenggec ngereede.

¹⁸ Yeni wambana botucnginau mederema ngakpina merang meudeac kpeing kpedae.

¹⁹ O Kebu, ge neac hereau mi kecna. O, neac memeficngic, ge bic hama meficnuna.

²⁰ Ge hama dzikacac beang, imohacnac mesinuna nga kekecna kasi yeneac kucfunac meickena.

²¹ Ge laionyangtoaac enacfunac mesinuna. O, geng kpacna negemma ubaongana ubaebicgoc kecde, imoc kate burumakaac baicfunac onggonggenecac

²² ni munafocna geac kpac kuneng dekperagiyemmema kpebung botucnginau namma ge eriendzong megembade.

²³ Ngicngac Kebu ewea heiandae, ngeni ye eriendzong memibisia. Nga Yacakowac gboricfora sasawa, ngeni ye afehebisia. Nga Isracelac gboricfora sasawa, ngeni hemma yeac negenggec engena andeac kicngina yearu fima afehema nambisia.

²⁴ Ye ngic kpendzengagoc hemma kpendzengtoaac amma ye mi ngadeheec nga ubango mi waec. Ye kicmesuya yearunac mi mesufuec nga kiaru yeng kiara negenec.

²⁵ Geng oyang boyang ubanau faina ni habutoa yeneac botucfu namma ge eriendzong megembade. Nga ngic geac ewega heiandae, yeneac kicfu namma dedeserinaac turung kpoudacbade.

²⁶ Ngicngac makpekpea yeni nema gebecyunuude nga ngicngac Kebu hofocandae, yeneng ye dengeregecde. O, ngeni herengina nasoya nasoya fekecbeso.

²⁷ Bangec tegiaunac ngiha ngiha yeneng yeac negemma ubangina dzigeneu kebuaru kenggecde. Nga ngiha ngiha yeni sasawango tosofocnginagoc hama yeac kicfu ngonducnema numumigecde.

²⁸ Kebu, kuc minginango bangec monnunac ngicngac garengyunuude.

²⁹ O, bangecac ngicngac yeni yenanggac negenggec wiac engena ande, yeni sasawango yeac kicfu ngonducnegecde. Yeni sasawango yeac kicfu ngonducnema bangecfu sendunnu kenggecde. Ngic yeni kekecngina garenggegecdeacsoc mi amma homedacgecde, yeni yeac kicfu ngonducnegecde.

³⁰ Bangecfocngina ngade hagecde, yeneng kingang kpemigecde. Ngicareng ngade fingecgecde, yeni yenemma Kebuac kpacsiduc dekperagiyemmegec negenggecde.

³¹ Yeneng yeac fakaya dindingac, imoc ngicngacareng ngade fingecgecde, yeni edeyunugecde. Ye uaya ifi mesiec, imoc edeyunugecde.