Mitiyegec 21 - Deduamiti

Ngictaungo firang ande

Yegecgareng yearu. Dawidngo mitiyegec yofi heiec.

¹ O Kebu, ge kucgagoc, imocac ngictau ye geac ubangerec negenude. Nga geng ye meficgekecnecac ye firang amma homac yombong sogaima kecde.

² Hereau songo feec, ge imoc meficgemidang nga enacbibihango wiacac kpesigenu ge imoc sasawa mima mong mi wadang. Selac

³ Geng ye heitaima kenecgaac finactoa mima ngictau ira gol tegengngo memea oruhau fainec.

⁴ Ye kekecac kpesigenu geng kekec mina nasoya nasoya fekengkefude.

⁵ Nga ge mefickena ye firang amma feracyunuma kuc nga kibikperagitoagoc ande. Ge ngickunenggac kuc nga kibikperagi mina ye kunengngina kefude.

⁶ O, kenecgango yegoc nasosoc feengkecbesande. Ge yegoc kecnecac ye ubangerec negemma sogaima kefude.

⁷ Ngictau ye Kebu negenserima kecde. Kebu Engenatoango yoac dedzege amma imoc modacma kecandeac wiac mongngo ngictau meu goroc goroc naric mi anude.

⁸ Ge marigango ngabafocga mendangyununade nga marifoigango ngic geac modzongina tiande, yeni meyunuude.

⁹ Ge didiu fingectegecnade, naso imohai ngaba yeni ngic gerecfu manganeandae, ifi isoc gerecgango yonohoude. Kebungo herebu amma gbokoyunuu gerecngo yonohou kpac anggecde.

¹⁰ Ge yeneac esafocngina kpetotieyunuma bangecfunac meicyununade. Amma ge yeneac gboricfocngina ngic medacfocngina botucnginaunac meicyununa kpac anggecde.

¹¹ Yeni mangana arenggema gubeso amma ge tobanggugecdeac sing mengeregecdeu uangina imoc naric mi fingerude.

¹² Ge tebega kicnginau kpesaina yeni dzigenema ngadeguma woragecde.

¹³ O Kebu kuctoagagoc, neni afeguma kuctoaga afehema yegec heinide.