Mitiyegec 149 - Deduamiti

Ngeni ubangerecgoc kecbisia

¹ Kebu eriendzong memini, hallelu Yac. Kebuac yegec gboria heimibesonga. Ngicngacfora yeac yoac modackecdae, ngeni kpekpeturangnginau yeac yegec gboria heimibisia.

² Yeng Isracel meficngunuu ngeni yeac ubangerec negembisia. Tsionggac medacfora, ngeni ngictaunginaac sogaibisia.

³ Ngeni yegec fedema yeac kpac kuneng heiwayong memibisia. Ngeni tambaring nga gita kpema udumeng gombunga meficgema oeha memibisia.

⁴ Kebungo ubangerecgoc ngicngacfora ngeneac negenu ngereeude. Yeng ngicngac yumia ebicfunac mesingunuu imocngo wiacngina sirihau anu heingemmeu kemeude.

⁵ Yoac modac modac ngicngac ngeni sogaima fefenginau fema ubangerec negemma yegec heimibisia.

^6-9 Ngeni bangec monnunac ngicngac yenearu dzikacac turungngina kpouyemmebisia. Ngeni ngiha ngiha kopocsicnginaac turunga momoc kpouyemmebisia. Ngeni seng mema imocngo ngictaufocngina witicyunuma ngickunengfocngina aiennu mendangyunubisia. Yoac bic oho ohoya fede, yeneac yoac imoc modacma yoacngina isinggema desibesonga. Ifi fingerudeac ngeni enacnginango dendzerenggema Anutu dengerema maringinau soe mana ngadea enaragoc mema kecbisia. Imocngo Anutuac ngicngac yeac yoac modacma kecdae, yeneac kuc kibikperagiagoc anude. Kebu eriendzong memini, hallelu Yac.