Mitiyegec 146 - Deduamiti

Yoac modac modac Kebu

¹ Kebu yoyomo heimini, hallelu Yac. O ubaongana, ge Kebu dengerebesena.

² Ni kekecnau Kebu afehema kekec kecbadesoc Anutunaac dedengerecyegec heibade.

³ Ngeni ngictauac medacfocngina nga bangecngicac medac sasawa mi negenseriyunubisia, imoc negembisia. Yeneng naric mi meficngunugecde.

⁴ Asunginango wayunuma kenu yeneng homema emu bangecfu monggoc kemegecde. Nga yeni ua hania hania megecdeac arenggekecgec, imoc uameme imohaingoc kpac andarude.

⁵ Yacakowac Anutungo ngic monggac memeficngic anude, imohai ngic imocngo kenehagoc anude. Ngic mong ye Kebu Anutu negensima fora fingerudeac tomai kecande, ye kenehagoc.

⁶ Anutungo kurumeng nga bangec meficgema kondung nga kondung manau wiac sasawa fede, imoc meficgedarec. Ye yoac modac modac Kebu. Ye ifi kecde nga nasoya nasoya ifi kecengkefude nga kecbesande.

⁷ Ngic goa yeneng ngic ogofocngina ebicfu faiyunugec ubaebicgoc kecgec Kebungo sing dindingac modacma isingyunuma yoacngina desiude. Ngicngac herenginaac homegec yeng yaka gumecyunuude. Kebungo ngicngac witicamau tacandae, yeni witicngina yungerude.

⁸ Kebungo ngicngac kicpisic kicngina merecgeude nga ngadehokuc ngadengina mesorongaima miacyunuude. Kebungo ngicngac dindingac kecandae, yeni songogoc hoangyunuude.

⁹ Ngicngac kuric kecgec Kebungo yenenggareng ayemmema ngachotsec ewefocngina homemea nga beging nanggeyunuude. Ngic Anutu ngadehema mangana megecdeac ayemmeande, yeneac singngina ine memanganeude.

¹⁰ Kebu Tsionggac Anutu, ye nasoya nasoya geac ngictau anggengkefude. Ye fingecsahega fekefudesoc geac ngictau anggengkecbesande. Kebu eriendzong memini, hallelu Yac.