Mitiyegec 132 - Deduamiti

Dawid nga Tsion meisingyuruec

Hombannu kekenggac yegec.

¹ O Kebu, Dawidngo ebicfu engkefec, imoc negenna feu yeac negenna ngereebeso.

² Kebu, Yacakowac Anutu Kuctoa mingina, ge yomoc negensibesena, yeng geac yoac deserima yofi deec,

³ “Ni amana manau mi embade me fefenau naric mi febade,

⁴ ni kicna gauac kpetarimima gau naric mi febade

⁵ kecma Kebu geac amatatac nga Kuctoa mingina Yacakowgoc kecande, geac amagerec meficgebade.”

⁶ Negenggec, neni Efrata bangecfu Anutuac dzadzahac katapaac siduc negemma Yara manennu imoc meficgeing.

⁷ “Hagec Kebuac amau kenni, nenang yeac hanitatahau fafoc heimima numumini.

⁸ O Kebu, ge yacma kucgaac katapagoc tacnegeng amagau hana.

⁹ Womonggarengfora, ngeni dindingac kekec heigec kemebeso nga ngicngacfora kpetiac kecandae, ngeneng desogai amma arohobisia.”

¹⁰ Ge kingang ngicga Dawidac gombunggac amma ngicga kerecngo nadzicminec, ye mi ngadehebesena.

¹¹ Kebungo yoac deserima Dawid yoac edeec, imoc naric mi meickeude. Ye yofi deec, “Ni geac bangecyombongga yeneac arennunac medacga mong meisinggema ye ngictautatacgau faiba tacbeso.

¹² Neac dzadzahac nga dedekperagiyoacna kpouyemmeba geac medacfocga yeneng imoc modacgecdeu yeneac medacfocngina ifingoc geac ngictau tatacfu nasoya nasoya takecgecde nga takecbesandae.”

¹³ Kebungo Tsion meisinggema ihai kefudeac ammide.

¹⁴ Ye yofi deec, “Ni ama yomocac negensongo negengkecba imocngo nasoya nasoya neac tacnegeng ama seria anu imohai tacyac ambade nga ambesandua.

¹⁵ Nga imohai wiac sasawa fede, imoc homac yombong kenehebade. Yeac ngicngac makpekpea semeng gumecyunuba negebec anggecde.

¹⁶ Ni womonggarengfora ebicfunac yungecyunubade, faka imoc ngakpi isoc heiyemmeba kemeu kecgec ngicngacfora kpetiac kecandae, yeni sogac sogaiac yegec heigecde.

¹⁷ Ni imohai Dawidac arennununac ngic mong faima yeac kuc heigboriba besaiude. Ni ngicna kerecdokungo nadzicmiba kefu yeac kifa mong mengeremiai.

¹⁸ Nga yeac ngabafora yeni ine game heiyemmeba kemeude. Ni ngictauac ira pirac pirac heimiba kemeu imocngo ye mekperagiude.”