Mitiyegec 127 - Deduamiti

Nambarac nemmeude

Hombannu kekenggac yegec, Salomongo yegec yofi heiec.

¹ Kebungo ama mi meudeu ngic yeneng uatoa mema ama mekecdae, imocngo memefihagoc mong mi anude, kpac. Kebungo amabangec mi garenggeudeu ama gareng yeni gaugbori anggec uangina sifu memefihagoc mi anude.

² Ngeni neneyaka meficgegecdeac asoac bic yacma uatoa mema kecma fefe nasongina ferahakecma uamemeac negengyohocgoc kecma yakangina nekecgecde, imoc ifingoc memefihagoc mi anude. Kebungo ngicngac songogoc hoangyunude, yeni gau femagec yaka meficgeyemmeude.

³ Kebungo nambaracfocnina nemmeande, yeni yearunac danggunucnina andae. Amma ngac hereaunac fora fingecande, imoc uaninaac bung.

⁴ Wasaingicac mariu tebemedaha homac femide, ngic sebigboringo medacfocngina meficyunuu kecdae, yeni medacfocnginagoc kecma wasaingic imoc isoc andae.

⁵ Ngic mong ye medacfora ifia homac kpedzucyunuma meyunukecde, ye kenehagoc. Ngabafora taong naguu yoacfu nangandae, yeng imohai yenigoc nanu yeneng game kpekpeu naric mi faigecde.