Mitiyegec 121 - Deduamiti

Kebu ye kasonina

Hombannu kekenggac yegec.

¹ Ni kicna tikiu fiba ende. Ni memeficac obohoduae, imocngo dahacnac haude, ifi kpesiduae.

² Kebungo kurumeng nga bangec meficgeec nga memeficna yearunac haude.

³ Kebu genggareng anggengkecde, yeng gau mi feude, kpac. Ye haniga garenggeu seria nanu wiac mongngo meu goroc goroc naric mi anude.

⁴ Negenggec, Kebu Isracel habu onggongyunuande, ye gaunec mong mi feande nga gau ebira mong mi feude.

⁵ Kebungo onggongguma marifoigau nanu ge yeac debannu kecna

⁶ wenacfu wenacngo mi guude nga tofocnac afongo mi memanganeguude.

⁷ Kebungo onggongguu yarefaka hania hania fede, imocngo naric mi memaguude. Kebu ye kekecga onggonggeude.

⁸ Ge amaunac manade me amau ennade dena Kebungo yofinenggac nga nasoya nasoya onggonggukefude nga onggonggukecbesande.