Mitiyegec 111 - Deduamiti

Anutuac ua feengkecbesande

¹ Kebu eriendzong memibesonga, hallelu Yac. Ngicngac uba kongaha amma ikoc nga hamangecngina kpac kecdae, yeneac kpebung habugoc namma heregoc yombong Kebu ubangerec ammibade.

² Kebungo uaya mekecde, imoc wiac engena nga imocac songo negengandae, yeneng imoc negengising angkecdae.

³ Kebungo wiac sasawa meec, imocngo ngictauac kuhagoc nga damuyagoc wakema fede. Ye fakaya dindingacngo nasoya nasoya feengkecbesande.

⁴ Ye uaya bibiagoc meec, imoc yeng negemmanu negenggec fekefude. Kebungo neneac ubea manganeu ubangerec anemmeude.

⁵ Ngicngac eweheihei ammiandae, ye yeni yaka yemmeude nga dzadzahac meec, imoc nasoya nasoya negensikefude.

⁶ Kebu ye ngicngacfora uayaac kuc edzacyunuma bangec monnunac ngicngac yeneac bangec imoc ngicngacfora yemmeu bangec mingina anggec.

⁷ Yeng wiac mariango meande, imoc yoara modacma faka dindingacgoc. Nenang yeac dederecgeyoac sasawa negenserima mekecbisina.

⁸ Ye dederecgeyoac faiu imocngo nasoya nasoya seria fema fefeseri feengkecbesande. Imoc ikoc nga hamangeha kpac kecma modacma kecbesonga.

⁹ Yeng wiacfora sueyunuu yeneng ngicngacfora yungecyunugec. Ye dzadzaha feengkecbesandeac yoac seria edeyunuec. Yeac kpac imoc kpetiac nga bibiagoc.

¹⁰ Kebu eweheihei ammima ye hoanggebesonga. Faka imoc negen negentegecac hania ande. Ye eweheiheigoc hoanggeandae, yeni negen negengngina irec ireckea. Yeac eriendzong, imoc nasoya nasoya feengkecbesande.