Mitiyegec 11 - Deduamiti

Kebungo onggonnuude

Yegecgareng yearu. Dawidngo yegec yofi heiec.

¹ Ni Kebuac hoannu hama sufuma kecba ngeni dafi negemma yoac yofi edenudae, “Ge neng isoc kemma tikigau worana.”

² Negenna, ngic Anutu ngadehema mangana megecdeac ayemmeande, yeni ngic goa herenginau ikoc nga hamangec mong mi fede, yenemma tebemedahango wedecyunugecdeac negemma kundunnu namma gurutu taima kpesaigecde.

³ Ngic yeneng dedeseriyoaraac titiseri kpetotieyunuma meickegecdeu ngicngac dindingac yeneng wiac imoc mengeregecdeac obohogecde.

⁴ Kebungo womonga kpetiacfu tacde. Ye ngictau tatahau kurumennu tacma kiwango ngicac nambaracfora yenemma kiwa yenearu fima fakangina hennegeng anude.

⁵ Kebungo ngic dindingac fakangina tobanggeude. Nga yeng ngic Anutu ngadehema mangana megecdeac ayemmeande, yeneac faka momoc tobanggeude. Amma ngic yarefakaac songo negengandae, yeni ubango wayunuude.

⁶ Ngicngac Anutu ngadehema mangana megecdeac ayemmeande, yeng yeneac witiu hoc gerec dzedzeagoc nga sarafa gerec borangagoc kpakeu yenereude. Yeneremanu firang gerea yenereude. Imoc pakenginau kpakegec kemema yenang wiac anu yeni ebic imoc pakeunac isoc negecde.

⁷ Kebu ye dindingac, imocac amma ye faka dindingacac songea negende. Nga ngicngac uba kongaha amma ikoc nga hamangecngina kpac kecdae, yeneng yeac kicmesuya henggecde.