Mitiyegec 106 - Deduamiti

Kebu eriendzong memini

¹ Kebu eriendzong memini, hallelu Yac. Kebungo yoac dedzege amma imoc modarude nga wosoefaha imoc nasoya nasoya feengkecbesande amma ye gombunga, imocac ubangerec memibesonga.

² Kebungo faka kuhagoc mekecde, ngic mongngo kucfaka ifia naric mi deude nga ye kucfaka imoc dengereudeacsoc kpac.

³ Ngicngac sing dindingac nasosoc modacbeso ayemmeande nga faka dindingac angandae, yeni kenecnginagoc.

⁴ O Kebu, ge ngicngacfocga gombunga ayemmema neac ifingoc negenna febeso. Ge ngicngac ebicfunac mesiyunuma ni ifingoc meficnubesena.

⁵ Geng ngicngacfocga meisingyununa yeni naric kecma wiac monggac mi obohogecde, imoc hembeso anende. Ngicngac arengfocga yeneng ubangerec negengandae, imoc hemma sogaibadeac anende. Geangga ngicngacfocga yeni sogaima ge dengeregugecde, imohai ni yenigoc sogaibadeac anende.

⁶ Warac mangesafocnina yeni kopocsic meficgegec nenang meficyunuma Anutu ngadehema mangana menideac anemmeu ngicngac ogofocnina memanganeyunuma faka mangana ayemmeing.

⁷ Esangabofocnina yeni Aigita bangecfu kecma geac kuc fakaga bibiagoc hengwa anggec. Geng yoac dedzege amma imoc modacnade, imoc wiac engena. Yeneng ine imoc nigecyunuu kondung sacsac tegiau kecma Anutu Engenatoaac yoac kpegec

⁸ ye yengena kparaac amma ebicfunac mesiyunuma kuhaac hania mekperagiyemmeec.

⁹ Yeng kondung sacsac yoac ngabasiric ammiu gbanggeec. Nga yeng dzohong keme kemeausing bangec gbangge gbanggeau kengandae, ifi isoc wangecyunuma nobocgeng enec.

¹⁰ Ye ifi amma ngic ngadeyunugec, yeneac mariunac mesiyunuma ngabafocngina yeneac kucfunac mesiyunuec.

¹¹ Doku imocngo ngabafocngina semeyunudaru kpac anggec yenearunac mongngo mi kefec.

¹² Ifi anu yeneng yeac yoac negensinggema dedengerecyegec heimigec.

¹³ Nga yeni ine bic yombong ye uaya mekefec, imoc nigecyunuu yoac dederecge ayemmeudeac tomai mong mi anggec.

¹⁴ Yeni bangeckisiu yakaac songo kuneng negemma imoc mi garenggema bangec gbangge gbanggeau Anutu faitobannu faigec.

¹⁵ Nga ye wiac mong yemmeudeac derecgegec, imohai yeng imoc yemmema hafei kuneng mong botucnginau sueu yenearu haec.

¹⁶ Anu ngic yeneng kporucamangina nangkenec, ihai kecma Moseac keracmangang amma Aharon, Kebuac kpetiacngic, yeac keracmangang ifingoc anggec

¹⁷ bangecngo anggema Datan gbokoma Awiram arengforagoc semeyunuec.

¹⁸ Gerecngo mama ngicngac yeni modacyunukecgec, yeni sasawa yonohoec. Gerecborangngo yarengic yonohodarec.

¹⁹ Anu yeni Horew tikiu kecma burumaka medahaac ongea mong mema nemuonga aiengngo mema, imoc eweheimima numumigec.

²⁰ Yeni Anutuac kuc nga kibikperagia wama imoc merenggec burumaka kpindzing neande, onga imocngo yeac tataha meudeac negemma faigec. Faima fafoc heimima numumigec.

²¹ Anutu memengerecnginango Aigita bangecfu faka kuneng mekefec, yeac nigecyunuec.

²² Yeng Hamgac bangecfu kucfaka bibiagoc mema kondung sacsacfu faka kicfuria meu kerectegec anggec.

²³ Yeneng ifi anggec yeng kpetotieyunuudeac deu Mose meising ngihango Anutuac kicfu namma yeac herebu menomaneec. Ye ifi mi nambac dede Anutungo kpetotieyunuu kpac ambau.

²⁴ Anutungo yoac deserima deu yeneng imoc mi negensinggema bangec gombunga yemmeu megecdeac dedea, imoc ngadehegec.

²⁵ Yeni kporucamanginau Anutuac pandzeng kpouma tacma Kebuac ubaudumeng negemma imoc mi tofohogec.

²⁶ Imocac yeng maria miacma yoac yofi deserima deec, “Ni bangeckisiu yunuba homema fedacbisia nga

²⁷ esamedacfocngina medereyunuba bangeha bangeha ngicngacareng yeneac botucfu kecgecde. Yeni ifi kecgec ngicngac yeneng yunukpebuc ayemmegec neng bangeha bangeha fekendae, imohai sueyunuba singsarang kpema kecbisia.”

²⁸ Imocac witiau yeni Pecor tiki Bacal nemuac ongagoc kpeketehama kecma nemuonga homemea yeneac sesegerec oho ohoya, imoc nekecgec.

²⁹ Yeni ifi amma Kebuac here miacgec yeng angammemenginaac amma ngaba ayemmeu hafei mangana mongngo yenearu fingerec.

³⁰ Anu Pinehasngo sifu yacma kebuaru nunumu ua meu hafei mangana imocac kuha mau kpac anec.

³¹ Yeng ifi anecac amma fingecsahe feerekecgecde, yeni sasawango Pinehasac fakaya dindingac, imoc negensikecgecde.

³² Anu yeni Meriwa dokuu kecma Kebu ngaba ifingoc meficgemigec Mosengo yeneac ebicac amma ebicfu enec.

³³ Yeneng Moseac asu mehodungaigec yeng yoac mi negentegecma deec.

³⁴ Kebungo dederecgeyoac ayemmeec nga yeni ine ifi isoc habu goa mi kpetotieyunuma meicyunugec, kpac.

³⁵ Yeneng ine bangeha bangeha ngicngacareng yenigoc kengha amma yeneac faka arenggema imoc modacgec.

³⁶ Yeni yeneac nemuonga hania hania modacgec. Faka imocngo botacngina amma mendangyunuu

³⁷ yeni naroangmedacfocngina meyunuma kpebucyunugec. Faka imocngo asu manganaac hosuc heiyemmekecgec.

³⁸ Yeni nambaracfocngina yeneac sac kopocsiha kpac kpakegecac bangecngina seuhagoc anec. Yeni naroang medacfocngina sese dema kpebucyunuma Kenacan bangecac nemuonga yeneac sesegerec ohogec bangecngo sacac kopocsicac amma seuhagoc anec.

³⁹ Ngicngac yeni angammemengina ifia angkecgecac amma ubau seucnginagoc amma Anutuac kicfu yeni kaisero siric anggec.

⁴⁰ Imocac Kebungo ngicngacfora ngaba ayemmema bangecarengfora yenenu seucnginagoc anggec ifi hemma modzea tiu wayunuec.

⁴¹ Wayunuma bangec monnunac ngicngac ye mi negemmidae, yeneac mariu faiyunuu yeneng ubango ukuyunuma garengyunugec.

⁴² Ngabafocnginango ebicfu faiyunugec ubaebicgoc kecgec yeneng meyunuma memayunuma kucngina bageau faiyunugec.

⁴³ Kebungo naso homac ebicfunac mesiyunukefec nga yeneng ine yoackpekpengic amma faka imocsac negensima kecgec. Yeni ngicngac ogofocngina memanganeyunukecgecac yeng memayunuu memeficac obohoma

⁴⁴ kpendzeng kpekecma kiacgec, fora. Nga yeng sifu ebicngina negensima memeficac kiacngina negenec.

⁴⁵ Ye warac dzadzahac yenigoc meec, imoc yeneac amma negenu feec. Yeng yoac dedzege amma imoc modackecde, imocngo efea kpac femideac amma yeneac ubamangang negengkefec.

⁴⁶ Ngic witicfu faiyunuma meyunuma kecdacgec, yeng faka ayemmeu yeneng yeneac ubahodung negengkecgec.

⁴⁷ Kebu, Anutunina, ge ebicfunac mesinunuma bangec monnunac ngicngac ge mi negenggudae, yeneac botucfunac menunuma kpedzucnununa. Geng ifi anna neni geac kpacga kpetiacac ubangerec negemma homac dengeregunide.

⁴⁸ Kebu Isracelac Anutu, ye nasoya nasoya kenehebesonga. Imoc fehereema fekecbeso. Ngicngac sasawango yofi debisina, “Imoc Fora.” Kebu eriendzong memini, hallelu Yac.