Mitiyegec 105 - Deduamiti

Fora meficgeude

¹ O ngicngac, Kebu ubangerec memima yeac kpac kuneng hofocbesonga. Yeng ua sasawa meande, imoc ngiha ngiha dekperagiyemmema edeyunugec yeneng imoc negendacbisia.

² Ngeni yeac yegec heimibisia. Ngeni dedengerecyegec heimima yeng ua bibiagoc meande, imoc ngicngac edeyunubisia.

³ Yeac kpara kpetiac. Ngeni imocac negenggec wiac engena ambeso. Ngicngac Kebu hofocandae, ngeni sogaibisia.

⁴ Ngeni Kebu hofocma yeac kuhaac kic fima yeac hoannu kemma kecgecdeac nasosoc angemmebeso.

⁵ Yeng ua bibiagoc amma kucfaka bibiagoc mekecma desi desiyoac enarango dekefec, ngeni imoc negenggec febeso.

⁶ O, yeng ngeni meisingngunuec. Ye kingang ngiha Awrahamgac gboricfora nga Yacakowac medacfora meisingngunuec.

⁷ Yennoc Kebu Anutunina nga yeng ngicngac yoacngina isinggema desiude, faka imoc bangecfu sokoma fede.

⁸ Ye dzadzahac meec, imoc nasosoc negensima dedeseriyoac edengunuec, imoc ngicngac fingecsahengina fekefude, imoc andenga tauseng feenude, imocacsoc negensima kefude.

⁹ Ye Awrahamgoc dzadzahac imoc mema Isakaac yoac deserimima edema

¹⁰ Yacakowaru dedeseriyoac imocnoc meserima Isracelgoc dzadzahac imoc fefeseri feudeac dema

¹¹ yofi deec, “Ni Kenacan bangec ge gemba mingina annade, imocngonoc geac bangec noboha anude.”

¹² Ngicngac imoc yeni kpetengina kuneng kpac. Yeni ngicngac efeanecsac amma bangec imohai kemma kuric kecgec.

¹³ Bangecareng yeneac bangecngina fekende, yeni imohai yerecgema ngictau monggac bangec yerecgema ngictau monggac bangecfu kengkecma ngicngacareng mong yenigoc kecma wayunuma monggaru kengkecgec.

¹⁴ Kebungo ngic kpae heiyemmeu mongngo mong ebicfu mi faiyunuec. Ye yeneac amma ngictau yoac ngabasiricfu ayemmema

¹⁵ yofi edeyunukefec, “Ni ngic meisinggema kerecdokungo nadzicyemmeai, ngeneng mi kpesereyunubisia nga profetefocna mangana mong mi ayemmebisia.”

¹⁶ Yeng bangec imohai boditoa fingerudeac edeec, imohai nenesemengngina sasawa kpetotieu kpac anudeac negemma

¹⁷ ngic mong bic sueu waraiyemmeec, imoc Yosef. Yeneng ye wanacngic anudeac dema suema dzo megec.

¹⁸ Yeni hania ic gigidangau faima ubiau becsac aiengngo memea dzegegec.

¹⁹ Yeng ifi kefu yeac kpefing yoac dedea, imoc erema heiu Kebuac yoacngo Yosefac hania tobanggeu seriec.

²⁰ Seriu Aigita yeneac ngictaungo ngicfora sueyunuu kemma Yosef yungecgec. Ngiha ngiha yeneac ngictaungo Yosef witicfunac yungerec.

²¹ Ngictaungo ye amea manaac enara faiu yeng iwaiya sasawa garenggeudeac uayoac demiec.

²² Demiu Yosefngo songeaac arennu ngictauac medacfora dederecge ayemmema ngic enarafora negen negentegec edekpou ayemmekefec.

²³ Ifi anu Isracel yeneng Aigita bangecfu hagec. Yacakowngo Hamgac bangecfu kuric kefu

²⁴ Kebungo ngicngacfora meficyunuu fingecsahe kuneng nga kucgoc amma ngabafocngina yeneac kuc ferahagec.

²⁵ Ferahegec yeng Aigita ngic yeneac negen negeng merenu yeneng ngicngacfora ubango ukuyunugec. Yeni yenahafoc yoac denegeng amma Kebuac kingang ngicfora faitobannu faiyunugec.

²⁶ Ifi anggec Kebungo kingang ngiha Mose suema Aharon ifingoc meisinggeu

²⁷ yereng yeneac botucfu faka kuhagoc meoc. Yeri Hamgac bangecfu kucfaka mi hehena mekefoc.

²⁸ Anutungo kundung sueu bangec mekundungkpeu yeneng ine yeac yoac kpema wagec.

²⁹ Ye dokungina sasawa heimerenu sac andaru kondungyang kpebucyunuu homedacgec.

³⁰ Sepeng yeneng hama bangecngina sokodacma ngickunengfocngina yeneac fefeamanginaungoc engkecgec.

³¹ Yeng yoac deu dawec nga dokuac mogocbisic habutoanginagoc hama ama bangecngina sasawa sokodarec.

³² Yeni kia kpeudeac negenggec yeng nomanggbomea yemmeu piratacngo amabangecngina sokoma heidarec.

³³ Yeng waing icngina kpedzamema fig ic amma icngina goa bangecnginau kpetackedarec.

³⁴ Ye ipua yoac edeyunuu yeneng hagec. Ipua gboria kucnginagoc hagec, yeneac kpetengina naric mi mebesonga.

³⁵ Yeneng hama bangecfu wiac maria tengging tengging sasawa nedacma bangecnginaac semeng nedacgec kpac anec.

³⁶ Yeng bangecnginau warac medacfocngina sasawa kpebucyunudacma kucnginaac fora warac fingecgec, yeni kpebucyunuu homedacgec.

³⁷ Imoc sasawa fingeru wisickeu ye Isracel habu meyunuu Aigita bangec wama kenggec. Yeni silwa nga gol momoc mema kenggec yeac ngicngac arengfora yenearunac mongngo mi tifainggema makpeec.

³⁸ Aigita ngicngac yeneng Isracel ngicngac yeneac homac kengecyunuecac amma yeneng wayunuma kenggec, imocac ubangerec negenggec.

³⁹ Anutungo hoeng tiameu imocngo kperacngina amma witinginau feu tofocnac gerec yemmeu imocngo mekperagiyunuec.

⁴⁰ Yeni kpesimigec yeng neng negecdeac yemmema kurumenggac yaka efea kpac yemmeu negebec anggec.

⁴¹ Ye hoc kpendziru doku dundungngo mama bangec dokuya kpac, imohai dzuamagoc mekeng feec.

⁴² Nocac ye dedeseri kpetiac deserima bic deec. Nga ye kingang ngiha Awraham, yeac ifingoc negenu feu

⁴³ ngicngacfora sogac sogaigoc wangecyunuec. Ye meisingfora hesicyunuu yeni yegec heima arohoma sogaima kenggec.

⁴⁴ Yeng bangec monnunac ngicngac yeneac bangec wangecyunuma meisingngicngacfora imoc yemmeu ngicngac yeneac semeng uaac mingina amma fora mema nekecgec.

⁴⁵ Yeneng yeac singyoac mekecma dedeseri yoara seria modacgecdeac ifi anec. Kebu eriendzong memini, hallelu Yac.