Mitiyegec 102 - Deduamiti

Ge ngictau tatacgau tacna

Kucmamango Kebuac kicfu hama desambic amma yoac yofi edede.

¹ O Kebu, ge nunumuna negenna memeficac kiacba imocngo gearu habeso.

² Ge neac ebicnasou kicga nearu mi sufuma kedzacga nearu faina. Ni kpacguba turunga bic merennenna.

³ Uamemena imoc hosuc ereande, ifi isoc erema kpac anggec sicnango gerea yombong amma gerec isoc dzekecde.

⁴ Kpindzing herecgegec dzanggema homeande, herenango ifi isoc dzanggede. Kucna kpac yombong anu yaka nenena nigecnude.

⁵ Ni kpendzeng kpema kunengngoc arohoduaeac amma sebi fusinango kemma sicnau kpeketahade.

⁶ Ni bangec gbangge gbanggeau kpendzo neng isoc anduae nga kpabekuruc mong amabangec sesuhau kecde, ifi isoc kecduae.

⁷ Ni gaugbori kecma neng mongngo ama witiau tembuha tacande, imoc isoc anduae.

⁸ Ngabafocna yeneng asoacnac kemma marai game kpekpeu fainuma deendema anemma kpacna soweckegecde.

⁹ Ni ic sogong nebadeac anenu hamango yakana angkecde nga kickumanango sokocfu kemema dokuna anu nekecduae.

¹⁰ Ge ubaga manganeu ngaba anennec, imocac menu emma ukununa mayai.

¹¹ Uamemena sasawa maraiac onganinango hereeande, ifi isoc ande nga ni kpindzing isoc homema dzanggeduae.

¹² O Kebu, ge nasoya nasoya ngictau tatacgau tacna geac kpac kuneng imoc ngicngac fingecsahenina fekefudesoc, nenearu feengkecbesande.

¹³ Ge monggoc yacma Tsionggac ubaga manganeu. Yagucnoc ubamangang amminadeac naso memea hade.

¹⁴ Kingang ngicngacfocga yeneng Tsionggac hoc songea negemma yeac sendunggac ubamangang negendae.

¹⁵ Bangeha bangeha ngicngac yeneng Kebuac kpac kunenggac kengec amma eweheimigec bangecfu ngictau sasawa yeneng geac kuc nga kibikperagigaac ewea heibisia.

¹⁶ Kebungo Tsion ama monggoc mema heigboriu kuc kibikperagiagoc fingectegeru henggecde.

¹⁷ Ye ngicngac makpekpea neneac nunumuac kedzac faiu wiacac desambic ammini imoc naric mi waude.

¹⁸ Ngicngac fingecsahe ngade anggecde, yeneac amma yoac yomoc kibiu ohogec ngicngac yeneng ngade fingecma Kebu eriendzong memibisia.

¹⁹ “Ye yengena kpetiac tikiau wi tacma kiwa fiu maec. Kebungo kurumennunac kiwa fima bangec henec.

²⁰ Ngic witicamau kecdae, yeng kiacngina negemma kiwa bangecfu fima homecac areng yungecyunuudeac kiwa fiu maec.”

²¹ Ifi anu Kebuac kpac kuneng Tsion taonnu dekperagibesonga nga Yerusalaimnu eriendzong memibesonga.

²² Ngiha ngiha yeni ngictau areng yenigoc kpeturanggema Kebuac kicfu ngonducnema numumigecde.

²³ Ye kucna dzongiau memama uameme nasona mewegeneu

²⁴ deai, “O Anutuna, ge kifaga nasoya nasoya ngicngac fingecsahengina fekefudesoc, imoc feracyunuma feengkecbesande. Ge uameme nasona dzongiau herecgema mi meicnuna.”

²⁵ Ge hanac hanaheaunacngoc kecma bangecac titiseri fainec imoc seria fede. Kurumenga kurumenga yeni geangga marikibinoc.

²⁶ Wiac imoc sasawa yeni kpac andacbesandae nga ge ine kecengkecbesannec. Yeni ngakpi isoc esea amma kuha maude nga wamba hesikpe amma ukuandimbe, siriha ifi isoc bangec nga kurumenga kurumenga yeni meicyununa kpac anggec gboria faiyunubesannec.

²⁷ Nga geng nasosoc siric mocgungoc kecnade nga kecbesannec amma geac kifa kpetega imoc wisic wisickea kpac.

²⁸ Geac kingang ngicfocga yeneac nambaracfocngina, yeneng geac hoannu kecgec geng esamedacfocngina hoanggau faiyununa yeneng gegoc serima kecgecde.