Mika 7 - Deduamiti

Isracelac kpendzeng

¹ Nocngo nearu ebic nga fagung fafic ande! Ni waing uau waing medacgec hofocandae ifi isoc kecduae. Amma waing gbomea gbariagoc nga fig kpaua nebadeac anenu hofocma sifu mong mi henduae.

² Bangecfu yoac modacmodac yeni sasawa kpac andacgec nga ngic mongngo dindingac mi kecdae. Yeni ikocfu sac kpakegecdeac tomai feandae amma yenaocngoc uficfu meemegedeac uficngina faiandae.

³ Yeni mangana megecdeac maringina miacgec efaiande. Ngic oruha nga desidesingic yeneng ngic ikocfu demekiri ayemmema kerereyunumagec hiedzo yemmegec ebicngina meandae. Amma ngickucnginagoc yeni songonginaac areng yoac dindingac imoc membaickema desiandae.

⁴ Yeneac gombungangina imoc somang isoc nga angammemengina dindingac imocngo modzang waea feraheyombonggede. Imocac Anutungo yugucngunuudeac naso hau garemmemengicngo tomeng fifiu, daracburuc nasongina anude.

⁵ Imocac tosoga gegoc wegenac kecde yearu mi heiribesena me songo tosogagoc dzoring mi ambesena. Nga ikocfu ngac gegoc wegenac kecde yegoc enacbibicgaunac yoac maude, imoc garenggebesena.

⁶ Naso imohai medacngo mamaac ewea mi heiude nga naroangngo nonggeagoc tohoemeecde. Amma ngacngo erangia ngacgoc easiemeecde nga ngicsere mocgu yenaocngoc ngaba angemegecde.

⁷ Anu neanna ine negennegenna Kebuaru faima Anutu memengerecna yeac tomai kecbare yengenaoc negennenude.

Isracel ngereegecde

⁸ Ngabafocna ngeni sogaima tenicfagoc mi anenggec! Ni makpema kundunnu kecduae nga Kebungo kperagina anu monggoc yacbade.

⁹ Ni kopocsic meficgeaiac amma Kebuac heregerecac fora meficgeduae, imocac kecma yoacna desima ihacnac memiacnuude. Amma ye kundunnunac meicnuma kperagiaugeng fainuu yeac faka dindingac hembade.

¹⁰ Anu ngabafocnina yeneng imoc hemma gamengo mebucyunuude. Yeni “Kebu Anutuga damoc.” Dekecgecac, kicnango yenembare makpegecde. Yeni hania bageau makpegec singtoaac singbisihau goteng isoc tipatangyunuude.

¹¹ Anu hocodaga memeac naso mong haude, imohai bangec botuc imoc meyadigecde.

¹² Naso imohai Asiria nga Aigitaac taongtoatoa amma Aigitanac kengkecma Eufrata doku nga kondunga kondunga amma tikia tikiaunac ngicngacngo tegecma gearu habesandae.

¹³ Hadacma ihai ngicngac kecgec yeneac faka manganaac amma bangecngo kisigbameng feude.

Nunumu nga dedengerec

¹⁴ Ramagareng ge maridzomingfocga kateu tembucngina kecgec yeni gareng kaponggango garengyununa. Amma bangec dokuyagoc nga kerehagocfu warac kecgec isoc, Basang nga Gilecad ihai ngicngacfocga faiyununa menec amma kecbisia.

¹⁵ “Anu naso imohai Aigitanac meicngunuma faka morora edzacngunuyai ifi isocngoc yeni edzacyunubesanduae.”

¹⁶ Anu bangeha bangeha yeneng imoc hemma kerectegec amma gameyunuu ubangina kuhamaude. Ifi amma yoacngina dugungkpeu kedzacngina kpefonggegecde.

¹⁷ Yeni boidzoc isoc godongnginango bangecfu ororonggema sendung nene kecgecde amma gisicgbiriring yeneng bangecfu medeng kpedeng kecandae isoc kecgecde. Yeni haricbengnginaunac dzonong fedefedegoc mama Kebu Anutuninaaru kengecgoc kenggecde.

¹⁸ Mongngo Anutu ge isoc mi kecdae, ge maridzomingfocga tosea kecdae, yeneac kopocsic wayemmeannec. Amma herebu naso herea mi mekecma ubamangang ayecayemmeac negenna ngereeande.

¹⁹ Imocac ge ubamangang monggoc anemmema kopocsicnina sasawa haniga bageau faima kondung kemekemeau tipetanggena kemedacbeso.

²⁰ Ge warac mangesahocnina Yacakow nga Awraham yerigoc dedeseri fora menec, imoc modacma yereac fingecsahe neni ubamangang anemmema songoga edzacnununade.