Mika 5 - Deduamiti

Bet Lehemnac enara fingecbesande

¹ Yerusalaim, ngaba yeneng Isracelac dzikacac oruhafocnina fifiricngo munggungnginau yunugecdeac bic tidzicnunudae. Imocac kucga tifininggema wasaingicfocga kpedzucyununa mocgu anggec.

² Nga “Bet Lehem Efrata, ge ine Yehuda taong kapia yenearunac mong. Gearunac mongngo neac hama Isracel bubunggeude amma yennoc hanac hanaheaunacngoc keceregec yeneac dzitec hania.”

³ Ifiac amma Isracelngo kebuac ubangadeau kecmanungoc ngacnaroang monggac medac meme naso haude. Anu dacmunacfora tosea Isracelareng yeneng yearu monggoc dzigenema tahockedacbesandae.

⁴ Anu ye Kebuac kucfu namma habufora garengyunuude nga Kebu Anutuyaac kpackunengnga eweheiheiagoc didiu mekperagiyemmeude. Anu yeni kengeha kpac kecmagec kpackunengngango bangec tegiau kendacbesande.

⁵ Ammanu Asiriangic yeneng bangecninau erema gbururucfu amagerecnina seriau kendacgecde. Ifi anggec neni gareng nga wasaiareng yeneac dederecgengicfocnina seria meisingyunumina Yengenaoc ruaenina anude.

⁶ Anu wasaibeanggac kucfu namma Asiria bangec garenggeude nga wasaibeangngo Nimerod amabangec sokoude. Sokou bangec botucninaac kpetea fede imohai tidacma kengha ambesandae. Anu Asiria yeneng bangecninau eregec, Yengenaoc yeneac mariunac mesinunuude.

⁷ Anu Yacakowareng tosea yeni ngiha ngiha yeneac botucfu Kebuarunac dzimbong nga kpindzingngo dzimbengagoc feande ifi isoc amma yeni mong me monggac tomai mi anggecde nga ngic monggaru mi heirigecde.

⁸ Anu bangeha bangeha yenearunac Yacakowareng tosea yeneng ngiha ngiha yeneac botucfu kateac wasaiyang yenearunac laiong isoc nga ramahabu yenearunac laiong medaha mong kuchagocngo mesariyunuma mereckperecge meyunumanu mongngo naric mi kasokpeude.

⁹ Ge mariga negengyohoa kpac ngabafocga yeneac witiu miacna kucga imocngo sasawa memanganeyunudarude.

¹⁰ Kebungo yofi dede, “Naso imohai, Ni ngenearunac becosi nga keretacfocngina memanganeyunubade.

¹¹ Ni bangecgaac taongtoatoa memanganema amagaac titiseria sasawa iriringgedacbade.

¹² Nga ngeneac dzinacfaka imoc memanganeba mosoc yoacngina imocngo fora kpahac andacbesande.

¹³ Anu ngenearunac nemuonga nga kebu ikohaac onga hocngo memea, imoc memanganebade ammanu maringinango marikibi megec, imoc monggoc mi ngonducnemigecde kpac.

¹⁴ Amma amatoatoangina memanganema Aseraac hocwotung herea ngenearunac ifingoc kpefuckema kpedzamedacbade.

¹⁵ Anu bangeha bangeha ngicngac damocngo eweheihei mi anendae, yeni herebu nga heregerecfu turunga kpouyemmebade.”