Mika 2 - Deduamiti

Ngicac negengareng nga Anutuac negengareng

¹ Yahec, ngic damoc ngeneng gaufefengina kpetereu mangana megecdeac negensi areng angandae. Anu ngeni asoacngoc yacma fakayau bic faiandae, imoc yofiac, ngeni faka imoc anganggac kucngina negenggec naric anu angkecdae.

² Ngeni keracmangang amma ngic yeneac heikpenec nadung nga amagerecngina imoc engsac kucgoc wangecyunuma mingina angandae. Amma ngeni ikocfu kerereyunuma amabangecngina nga maridzomingngina hamangec mema tigec engande.

³ Ifiac amma Kebungo yofi dede: “Ni ngicngac yomoc ngenearu ebictoa fingerudeac negensiduae nga ngeni imohacnac worama ngenaoc naric mi onggongemegecde. Amma sebiengenggoc kengha monggoc mi anggecde, ifi anu imocngo ebickunenggac naso anude.

⁴ Anu naso imohai ngicngac yeneng songgong yegecfu de-denggbaringgac yegec yofi heingemmegec: ‘Neni manganedacdimbe; Kebungo ngicngacfocna kekecnina sasawa imoc mema areng goa yemmede. Ye wiac sasawa nearunac meickedacde! Amma ye heikpenec sobennina mema benukererengic yemmeu tigec ende.’ ”

⁵ Ifiac ammaKebuac ngicngacfora yeneng kpeturanggema bangec imoc mendzicma monggoc ememagec, manganameme ngenearunac mongngonec noboha mong mi megecde, kpahac yombong.

Profete ikoha

⁶ Anu yeneac kpefingdede ngicfocngina yeneng neac yofi degec, “Ge imocac kpefingyoac mi dena. Ge wiac yomocac kpefing monggoc mi kpena. Neni gamekpekpeu monggoc mi ennide.”

⁷ Yacakowac esamedac ngeni yofi deandae, “Kebungo herebu mi anude, me? Nga yeng faka sasawa ifia naric anude, me?” “Damocngo faka dindingac angandae yenearu neac yoacngo faka gombunggac sing naric mi meficgeyemmeude, me?

⁸ Ngeni neac ngicngacfocna kecmaguc yaguc ine ngabafocna isoc andae. Amma ngic yeneng dzikacfunac dzigenema negengyohoha kpac ferecge kengha ammagec ngeneng ngakpi herecngina susuic imoc kucbiric wangecyunuandae.

⁹ Ngeni ngicngacfocna yenearunac ngachotsec songo amanginaunac meicyunuandae. Amma ngeni ngachotsec yeneac nambaracfocngina yeneac kenecngina yemmeai, imoc wangecyunuandae.”

¹⁰ Ifiac amma Kebungo monggoc yofi dede, “Ngeni bangec yomoc anggec fusekpohorehagoc nga manganedarecac amma ngeni yacma kenggec! Yomoc ngeneac tacnegeng sobeng kpac.

¹¹ Ammanu ikocngic mongngo hama nefarohoma deude, “Ni ngeneac waingdoku nga dokuseria homac fingerudecac kpefing kpebade,” ifi deu ngeneng profete ifiaac songo homac negemmigecde.

Anutungo ngicngacfora mesiyunuude

¹² “Foracngoc, Ni Yacakowac esamedacfora sasawa mekpedzuc angemmebade; Ni Isracel ngicngac ngeni monggoc wangecyunu habade. Ni rama odau kecandae ifi isoc kpedzucngunuba, ngicngac yeneng bangecnginau sokoma udumeng gombunga meficgema ramahabu yeneng kpindzing nema kpedzucfu kecandae, ifi isoc kecgecde.

¹³ Yennoc waraiyemmema sing meyemmeu; taonggac oda naguya hetackema ngadeau madacgecde. Imoc Kebu yengenaoc ngictaungina amma waraiyemmeude.”