Mareko 15 - Deduamiti

Yesu Piratoaru mekenggec

¹ Asoacngoc yombong womonggareng enara nga yudangic enarafocngina amma mitiac negen negengngic nga yudangic yeneac tutumangtoa memba sasawa, yeneng yoac deserigec. Deserima Yesu maria dedeckema Piratoaru mekenggec.

² Mekenggec Piratongo Yesu kpesimiec, “Ge yudangic yeneac ngictau me?” ifi deu merenec, “Imocnoc geanggaoc denec.”

³ Nga womonggareng enara yeneng Yesu yoacfu faima yeac haniaya homac degec.

⁴ Ifi degec Piratongo monggoc kpesimiec, “Yeni geac yoac homac yombong dedaemoc, imoc negemma turunga mong mi merennade me?”

⁵ Ifi deu Yesungo turunga monggoc mi merenu Piratongo negen negeng ua homac meec.

Yesu kpegecdeac deseriec

⁶ Anu makekeng nasousoc ngic mong witicamau takefu yudangic yeneng yeac kpara kpacgec Piratongo yenoc witicamaunac wau makefec.

⁷ Amma ngic goa warac ngicngac here miac miac faka amma ngic goa yunuhomegec witicamau faiyunugec, yenearunac ngic mong kpara Baraba.

^8-10 Nga womonggareng enara yeni Yesuac keracmangang amma yeac mariu mekenggec, Piratongo imoc bic negenec. Ifi negenu habutoa yeneng hama Piratongo angkefec, ifi isoc anudeac kpesimigec yeng meremma yofi kpesiyemmeec, “Yudangic ngeneac ngictau yungecngemmebadeac negendae me?”

¹¹ Ifi deu womonggareng enara yeneng habu fenggeyemmegec yeneng Yesu wama ine Baraba naric yungecyemmegecdeac degec.

¹² Ifi degec Piratongo monggoc meremma kpesiyemmeec, “Anu ni yudangic ngeneac ngictau dedae, yeac dafi ambade?”

¹³ Kpesiyemmeu yeneng arohogec, “Ge ye mariponnu kpena homeu.”

¹⁴ Ifi degec Piratongo monggoc kpesiyemmeec, “Nga ye noc kopocsic meec?” deu ine yeneng monggoc seriangoc arohogec, “Ye mariponnu kpebesena.”

¹⁵ Ifi degec Piratongo habu yeneac negen negeng modarudeac negemma Baraba wau kenec. Nga yeni Yesuac sebia dzikacngo kpemaguc mariponnu kpegecdeac wasai maringinau wayemmeec.

Deendema ammigec

¹⁶ Anu wasaingic yeneng Yesu mema gawamang yeneac amaoda manau emma wasaingic sasawa hafoangoc kpedzucnegec.

¹⁷ Kpedzucnedacma ngakpiherec mong giweng giweng heimima somang batihema ira isoc oruhau heimigec kemeec.

¹⁸ Kemeu eweheihei siricfu kpacma edegec, “Ohec, yudangic yeneac ngictau.”

¹⁹ Dema yasungo oruhau kpema sofohoma haniau fafoc heima numumigec.

²⁰ Anu yeni defagoc ammigec wisickeu ngakpiherec sacsac imoc hesima yengena wamba heimigec kemeu mariponnu kpegecdeac mema ngadeau kenggec.

Mariponnu kpegec

²¹ Kemmagec Kirene taonnunac ngic mong kpara Simong, ye Aresande nga Rufu yereac mangngira, yeng semeng uaunac sinnu hamanu wasaingic yeneng Yesuac maripong tofohoudeac ngombonggegec tofohoec.

²² Tofohou yeni bangec buma mong kpara Gorigata, titiha hatasic, imohai Yesu mekenggec.

²³ Mekemma sopo mong aengagoc kpara mira, imoc wainggoc yerecgema migec nga yeng ine imoc waec.

²⁴ Anu yeni ye mariponnu kpema wambaya mederema wiac mong me mong merang meude, imocac kpeing kpegec.

²⁵ Yeni asoac 9 kirocfu Yesu mariponnu kpegec.

²⁶ Kpema ye yoacfu faigec, imocac hania tafebisicfu yofi ohogec, “Yudangic yeneac ngictau.”

^27-28 Anu yeni godzungic yohockang, mong foiau nga mong kanayau yegoc mariponnu momoc yunugec. Ifi anggec yoac mitikibiu oho ohoya yomoc seriec, “Ye manganameme yenearunac mong, ifi negenggec.” (Yes 53:12)

²⁹ Anu ngic ihai kengha anggec, yeni Yesu deendema ammima orucngina kpatitickema degec, “Ngeni ngic imoc henggec, yeng womong hembarackema wenac harebecac manau monggoc meudeac deec.

³⁰ Ge geanggaoc onggongemema mariponnunac mesiemema mana!”

³¹ Anu womonggareng enara nga mitiac negen negengngic, yeneng ifingoc ye desusuic ammima denegeng amma degec, “Ye ngic goa onggongyunukefec nga yengena ine naric mi onggongemeude.

³² Ye Messia, Isracel neneac ngictau kecdengo yaguc mariponnunac mau hemma negensinggenide.” Nga ngic yohockang mariponnu ifingoc yurugec, yereng ifingoc deendema ammioc.

Yesu homeec

³³ Wenac dzongiau 12 kiroc ammanu imohai ama kundung kpema kundungngo bangec sokoma fekemmanu 3 kiroc marai anec.

³⁴ Imohai Yesungo ubaudumeng kunengngoc kpacma yofi deec, “Eroi, Eroi rama sabaktani.” Imocac titiha yofi, “Anutuna Anutuna, ge nocac wanudang.”

³⁵ Ye ifi kparu ngic wegenac nanggec, yenearunac goango imoc negemma degec, “Negenggec, ye Eria kpacsambic ammide.”

³⁶ Ifi degec ngic mongngo nedzikemma kondung sobing mong mema waing aengagocfu nemuruckema yasuu faiu Yesuac enarau enu deec, “Tomai namma henni, Eriango hama mesiude me kpac!”

³⁷ Ifi demanu Yesungo ine ubaudumeng kunengngoc kparu asuya ereec.

³⁸ Ereu womonggac kporuc kuneng imoc dzongiausing wihacnac tohoma mau yohockang anec.

³⁹ Anu wasaigareng yeac kicfu nanec, yeng Yesungo kparec nga homeec, imoc hemma yofi deec, “Foracngoc, ngic yomoc ye Anutuac medacnoc.”

⁴⁰ Nga ngac goa ifingoc hereau namma faka fingerec, imoc henggec, yeneac botucfu Maria kpara mong Madara nga Maria, Yakobo mong munea deandae, ye nga Yosec yereac nonggongira amma Sarome, yeni yenahafoc nanggec.

⁴¹ Yesungo Gariraia bangecfu kefu ngac imoc yenennoc ye modacma meficgekecgec. Amma ngac tosea homac, yeni Yerusalennu yegoc bic kemma ihai ye hemma nanggec.

Yesu tonggogec

⁴² Marai bic anu hombanggac memengereac naso wegene hau sabataac naso femanu

⁴³ Yosefe Arimataia taonnunac, yeng ihai haec. Ngic ye kpactoayagoc yudangic yeneac tutumangtoa, imocac membangina mong amma ye Anutuac eucererenggac tomai kefec. Yeng kengeha kpac Piratoaru kemma Yesuac fareng meudeac kpesimiec.

⁴⁴ Kpesimiu Pirato ye Yesungo bic homeec, imocac kpidohoma wasaienara kpacma Yesu bic homedac me kpac, imocac kpesimiec.

⁴⁵ Kpesimiu Yesu bic homedac deu Yesuac fareng Yosefe desimiec.

⁴⁶ Desimiu Yosefengo linengkporuc mong bummema Yesuac farenga mariponnunac mesiu mau kporucngo tembonggema kicsereu mekenec. Kicsere imoc hocsirau singa usu usuya, imohai farenga faima hoctoa mong kpedidinggeu singa hedzickeec.

⁴⁷ Anu Maria Madara nga Maria Yosec nonggea, yereng Yesuac farenga dahai faiec, imoc henoc.