Malecaki 4 - Deduamiti

Anutuac nasotoango habesande

¹ Kurumenggac wasaiareng habuya habuya yeneac Kebungo yoac yofi dede, “Negendae, naso hade imoc gerectoayagoc hade. Imocac ngic damoc yeni dehesi nga deengdema amma mangana meandae yeni naso imohai gerec seriango dzema yonohodacbesande. Imoc wiac mong dzuama harandanggeu gerecngo godeagoc sasawa dzemusunggeude ifi isoc yenearu fingecbesande.

² Anu kpacna eweheimiandae ngenearu dindingac kekec wenac isoc ereu memengerec meficgeyemmeude. Ifi anu burumakamedaha yeneng amanginaunac mesiyunugec bangecfu mama sogac sogai yuengyuma kengkecdae ngeni ifi isoc ambesandae.

³ Amma ni faka mebesandua naso imohai ngeni mangana meme tidzameyunugec hanitabenginaac bageau yube isoc ambesandae.

⁴ Ni enactofoc tofohongicna Mose nonoyoac nga singyoac Horew tikiu miai Isracel ngicngac sasawa ngeni imoc negensima modacdacbisia.

⁵ Amma negendae, Kebuac nasotoa kpembibiagoc mi fingecmanungoc ni profete Eliya suengemmebesandua.

⁶ Amma bangec yomoc soweckebaiac mangfocngina yeni ubamereng amma nambaracfocngina hoangyunugecdeac amma nambaracfocngina yeni ifingoc ubamereng amma mangfocngina hoangyunugecdeac Eliyango ua imoc mebesande.”