Malecaki 2 - Deduamiti

¹ Kurumenggac wasaiareng habuya habuya yeneac Kebungo womonggareng ngeneac negemma goroyoac yofi dede,

² “Ngeni neac yoac mi negenggecde amma heregoc neac kpacnaac ewe mi heigecdeu sowecnango ngeneac witiu enu kenecngina ifingoc soweckebade. Ni kenecngina imoc bic soweckeai nocac ngeni heregoc neac ewe mi heinenggec.

³ Ni nambaracfocngina nga esangabofocngina amma bangecfocngina memetinggac sing seria yemmebesandua amma nasotoanginau seseac yang mehabesandae imocac keraha taima kicmesunginau hosobesandua amma hoannaunac meicngunuma ramaburumaka keraha wanggema ukuandae ihai keracgoc ukungunubesandua.

⁴ Ifi amba ngeni yofi negentegecbesandae, Dzadzahacna Lewiac kisicareng yenigoc meai imoc feengkecbesandeac goroyoacna imoc deduae.

⁵ Amma ni Lewigoc ruae kekecac dzadzahacna meai imoc ye eweheinenudeac ifi anai. Ye imoc negemma goi heinemma kpacna eweheimiec.

⁶ Ye enacbibihango yoac forasac edekpou amma nedzarangango yoac sege segea mong mi dekefec. Ye nearu kpeketahema kecma ngicngac homac kopocsicac sinnunac meyunuec.

⁷ Womonggareng ye neac negen negentegecac kpoukpou yoacna garenggebeso. Ammanu ngicngac yeni kpoukpouyoac imoc megecdeac yearu hagec ye imoc kpouyemmebeso. Nocac ye kurumenggac wasaiareng habuya habuya yeneac Kebu yeac siducdede ngicnoc ande.

⁸ Ammanu womonggareng ngeni sing fora imoc ngadehegec nga edekpounginango ngicngac fuseyunuu sing segegec. Amma Lewi nga kisicfora yenigoc dzadzahac anai dzadzahacna imoc ngenennoc kpegec.

⁹ Amma neac sing wama sing siriha mong mong ifi edekpou ayemmekecgecac neng ngenearu faka meba Isracel ngicngac sasawa yeneng ngeneac deengdema angemmegec yeneac kicfu gamekpekpe witiau kecgecde.”

Yehuda yeneng Kebu hafoangoc ewea mi heimigec

¹⁰ Nenang sasawa mannina mocgu amma Anutu mocgu yennoc deu fingecdaring. Ammanu yeac dzadzahac kpema dedzege ikoha ogofocninagoc angemekecdimbe imoc mi ngereede.

¹¹ Yehudangicngac yeni Kebugoc dedzegengina feec imoc kpegec. Ifi anggec Isracel bangectoau nga Yerusalaim taunnu faka manganango sokodacma feec. Imoc Kebungo womonga hengsongo anec, yeni imoc seuc heigec. Yeni bangec monggac nemu yeac naroanggoc memeturang anggec.

¹² Ngicngac engena mameango faka ifia angkecdae, yeni kurumenggac wasaiareng habuya habuya yeneac Kebungo Yacakowac arennunac meicyunudacbesande. Amma yeni yeac sese sing segema faiandae yeni ifingoc meicyunudacbesande.

¹³ Ammanu faka mong yofi angkecdae, Ngeni sese faiandae imoc Kebungo songogoc mi hoanggeande imocac kiac ubahodungnginaac kickumanginango yeac aratau sokodacma feande.

¹⁴ Ifi ammagec, “Ye nocac sesenina mi hoangeande.” Ngeni yoac ifi dema ngenaocngoc kpesiemeandae. Imocac yofi deduae, “Ge sebigbori kecnec naso imohai Kebungo gemmanu ngac menec. Ge ngac yegoc dedeseri anna yeng ogo memeficga kefec. Ammanu ge sifu dedeseri imoc kpema enengga wanec.

¹⁵ Anu Kebungo ngacgoc meturangnguruu mocgu bic anoc, i. Ye ifi anecac ngeri asu nga sebi mocgu anoc. Amma ngeri yeac nambaracfora kpeficyunuecdeac yeng meturangnguruu mocgu anoc. Imocac asuu garengemema enengga sebigbori kecma menec amma dedeseri denec imoc mi kpebesena.”

¹⁶ Kebu Isracelac Anutungo yofi dede, “Ni mewa fakaac mi anengkecde. Amma ngeneac botucfunac mongngo faka mangana ifia enema ammiudeu ni faka ifiaac mi anengkecde imocac ngeni asuu garengemema dedeseringina degec imoc mi kpebisia.”

¹⁷ “Anu ngeni Kebu enacgebec homac ammikecdae.” Ifi edengunuba yofi meremma dekecdae, “Ii neni dafiu enacgebec ammikecdimbe?” Goa ngeni yoac yofi deandae, “Ngicngac sasawango faka mangana angkecdae, yeni Kebuac kicfu ngicngac gombunga anggec, yeng negengngereeyemmeande.” Ifi deandae. Amma goango yoac yofi deandae, “Anutu hengising mingina, ye kuha mamea.”