Malecaki 1 - Deduamiti

¹ Malecakingo Isracel ngicngac yeneac profeteyoac Kebuarunac mema yofi dema edeyunuec.

Edom nga Isracel yeneac yoac

² Kebungo ngeneac yoac yofi dede, “Ni heresongogoc hoangngunukecanduae.” Ifi deu ngeneng ine yofi kpesiandae, “Ge faka siriha dafiu neneac songo negengkecnec?” Ifi kpesidaeac ye yoac yofi dema merende, “Esaw nga Yacakow yeri daramuna fingeroc. Ifi fingecmaec ni sifu Yacakow heresongogoc hoanggema

³ Esaw ine ubanango wama bangecfora edomngicngac yeneac sifec memanganeba kisi fingerec nga bangecfocngina bangec kecgec imoc katekasi yeneac amabangec anec.”

⁴ “Yeni amabangecnina hembarackegec. Hembarackemagec neni amabaranina monggoc medzuacnide.” Edomngicngac yeni ifi degecdeu kurumenggac wasaiareng habuya habuya yeneac Kebungo yoac yofi dede, “Yeni amangina monggoc heigborigecdeu ni hembarackebadengoc.” Ifi ayemmeba yeneac yofi deyemmegecde, “Bangec imocac ngicngac yeneac fakangina mangacmanganea.” Amma monggoc “Kebuac herebungo bangec imocac mingina yenearu feeng kecbesande.”

⁵ Anu Isracel ngeni kicnginango faka imoc hemma yofi degecde, “Kebu Engenatoa kuhango amabangec goau amma Isracel bangecac kpete ferahema fede.”

Anutungo womonggareng dehanac ayemmeec

⁶ Ni kurumenggac wasaiareng habuya habuya yeneac Kebungo womonggareng damoc yeneng neac kpacna denggbaringgeandae, ngeneac yoac yofi deduae, “Medacngo mama sesehekecde nga uangicngo ngickunenga goi heimikecde. Ifi isoc ni mangngina kecbai dede ngeni sesehenugec naric ambac nga kunengngina kecbaiu eweheinenggec ngereebac. Ifi deba ngeneng ine yofi deandae, ‘Neni siric dafiu kpacga denggbaringgeandimbe?’ Ifi degec

⁷ imocac yofi edengunuduae, ‘Ngeni sesengina mangana imoc neac aratau faiandae.’ Ifi deba ngeneng yoac yofi dema dekpesi anengkecdae, ‘Neni dafi amma kpetiac kekecgaac kpacga memanganeandimbe?’ Ifi degecac yofi meremma deduae, ‘Ngeni neac arata imoc memefiha kpac. Ifi negengandae imocnoc kpetiac kekecnaac kpacna memanganeandae.

⁸ Ngeni sese ohogecdeac ramaburumaka kicpisic me hanimangang me hafeiagoc ifia faigecdeu imoc sing sege segea ande. Ngeni ramaburumaka ifia gawananginaac faigecdeu ye imocac songo mong mi negenude amma imocac ubangerec mong naric mi dengemmeude.

⁹ Imocac womonggareng ngeni Anutungo negeng ngereengemmeudeac bic numumigec yeng negeng ngereengemmeu heng. Faka imoc ngeneac kopocsicac amma fingerude.

¹⁰ Ngeni aratanau eng kpedzongemema sese ohobauac ngenearunac mongngo sesewomonggac nagu heiu ngereebac. Ni ngeneac mi negen ngereeduaeac amma modzona tiu sesengina faiandae imoc waanduae.’

¹¹ Ni kurumenggac wasaiareng habuya habuya yeneac Kebungo yoac yofi deduae, ‘Bangec sasawa wenac ere ereaunac kengkecma wenac keme kemeau kpac kunennango sokodacbesande nga amea amea yeneng hosuc homung gombung heinemma kpetiac sesena faigec kpac kunennango yadima kendacbeso.

¹² Anu ngeneng ine yofi dema kpacna meenti memati angkecdae, “Anutuac arata imoc seuhagoc.” Ifi dema aratanau sese seuhagoc hengsure surea imoc sicsauc faiandae.

¹³ Ifi faima yoac yofi deandae, “Ua imoc gebehagoc ande.” Ifi dema dehesi amma ramaburumaka kateac yangngo kpekpea me hanimangang me hafeiagoc ifiango neac sese dema faikecdae, fakangina ikoha imocac naric mi negeng ngereengemmebade.

¹⁴ Ngic mongngo ramaburumakafora yenearunac ngiwa mocgu neac sese faiudeac deseriec imoc herandzima rama me burumaka sebia mangana mong faiudemoc ye sowehagoc. Nocac ni ngictau engenatoa nga bangeha bangeha ngicngac yeneng eweheinengkecdae, ni kurumenggac wasaiareng habuya habuya yeneac Kebungo yoac ifinoc deduae.’ ”