Makekeng 6 - Deduamiti

Anutungo Mose monggoc meisinggeec

¹ Ifi deu Kebungo Mose yofi edeec, “Ni yaguc Parecoaru faka hania hania ammiba hembesena. Ni marina kuctoayagocngo ngombonggeba yeng uaac ebicfunac yungecyunuu kenggecde. O, ye Isracelac kisicfunac ngeni kucgoc yombong kporacngunuudeac ngombonggeba ngeni Aigitabangec wama kenggecde.”

² Ifi dema torokpema Mose yofi edeec, “Nennoc Kebu.

³ Nga ni Awraham, Itsak nga Yacakow fingecyemmeba yeni Anutu kuctoa mingina, kpacna imoc negenggec. Kpacna Kebu imoc mekperagima haniana mi deficgeyemmeai.

⁴ Nga yeni Kenacan bangecfu kuric kecgec naso imohai ni yenigoc dzadzahac mema imoc yemmebadeac deai.

⁵ Anu aigitangic yeneng Isracelngicngac wanac meyunuma ua ebiria deyemmegec mekecgec anu ni yeneac ubaebicac kiacaro negemma dzadzahacna meai, imoc negemba fekecde.

⁶ Imocac Isracelngicngac yofi edeyununa, ‘Nennoc Kebu, anu aigitangic yeneng mengunuma uatoa ebiria yombong ngemmema ngombongngunuma kecgec neng imohacnac onggongngunuma hesicngunuba kenggecde. Ni marina sinema yoacngina dema memetingtoa yemmema ngeni uaac ebicfunac yungecngunuba kenggecde.

⁷ Yungecngunuba kenggec ni mengunuba neanna ngicngacareng anggecde nga ni Anutungina amma kecbade. Ngeni aigitangic yeneac bageu wanac kecma faficua ebiria mema kecmagec ni mengunuma imohacnac hesicngunuba kenggecde. Ifi fingeru ngeni yofi negentegecyombonggegecde, ni neannaoc Kebu Anutungina.

⁸ Nga ni marina miacma Awraham, Itsak nga Yacakow bangec yemmebeso deseriyemmeai, ihainoc hesicngunuma emma ngemmeba imocac mingina anggecde. Nennoc Kebu.’ ”

Ubanginaac kuha mayombonggeec

⁹ Mose ye yoac imoc Isracelngicngac edeyunudaru yeni ine ubangina mayombonggeu kecgec nga wanacngic kekec nga faficua kpendzengtoayagoc anecac kedzac mi kpegec.

¹⁰ Anu Kebungo Mose yofi edeec,

¹¹ “Ge kemma Aigita ngictau Pareco ye Isracelngicngac bangehaunac nga uaac ebicfunac yungecyunuu kenggecdeac edena.”

¹² Ifi deu Mose ye Kebu yofi edeec, “Negennec, yoac deba Isracelngicngac yeni neac yoacac kedzac mi faidau nga ni yoac dedeac negen negentoa mong mi fenendeac deba Parecongo kedzac naric mi kpeude.”

¹³ Ifi deu Kebungo ine Mose nga Aharon dederecge ayecmema yoac yofi deec, “Ngeri Isracelngicngac nga Aigita ngictau Pareco yofi edeyunubesera, ‘Isracelngicngac Aigitabangecfunac wangecyunugec kembisia.’ ”

Isracel enarafocngina

¹⁴ Isracel enarafocngina yeneac kpacareng sasawa yofi, Isracel morocmedaha Recuwen yeac medacfora yeni kpacngina Hanok nga Pallu, Hetseron nga Karami. Ngic imoc yeninoc Recuwenggac medacfora.

¹⁵ Nga Simeconggac medacfora yeni kpacngina Yemucel, Yamin, Ohad, Yakin, Tsohar nga Sacul. Sacul ye ine kenacangngac yeac medac. Imoc Simeconggac gboricfora.

¹⁶ Nga Lewi medacfora fingecgec, yeneac kpacngina Gereson, Kehat nga Merari. Lewi ye kifaya 137 ammanu homeec.

¹⁷ Nga Geresonggac medachora yohockang imoc Liwni nga Simeci nga yereac arengfocngira.

¹⁸ Nga Kehat yeac medacfora Ameram, Itsahar, Heweron nga Udzicel. Kehat ye ine kifa 133 kecma homeec.

¹⁹ Nga Merari yeac medachora yohockang imoc Maheli nga Musi. Ngic imoc yeni Lewiac kisicfunac nga yenearunac fingecsahe arenga arenga fingeceregec.

²⁰ Anu Ameram ye mamaac naina Yokewed meu yennoc Mose nga Aharon meyuruec amma ye kifa 137 kecma homeec.

²¹ Yitsahar medacfora yeni yofi, Kora, Nefeg nga Dzikiri.

²² Udzicel medacfora yeni yofi, Misacel, Eletsafan nga Siteri.

²³ Aharon ye Amminadawac naroanga, Naheson naina, kpara Elisewac meu yeng Nadaw, Awihuc, Elecadzar nga Itamar meyunuec.

²⁴ Kora medacfora yeni yofi, Assir, Elekana nga Awicasaf. Ngic imoc yeninoc Koraac gboricfora.

²⁵ Aharon medaha Elecadzar ye Puticel naroangfora yenearunac mong meu yeng Pinehas meec. Ngic imoc yeni Lewiac kisicfunac arenga arenga keceregec, yeneac enarafocngina.

Aigitabangecfunac wangecyunuec mabisia

²⁶ Kebungo Mose nga Aharon, ngic imocnoc edeyuruma deec, “Ngeri isracelngic habusoc arengyunuma Aigitabangecfunac wangecyunuec mabisia.”

²⁷ Ifi deu Mose nga Aharon yereng Isracelac ngicngacareng Aigitabangecfunac wangecyunugecdeac Aigita ngictau Parecoaru yoac ua meoc.

²⁸ Anu Kebungo Aigitabangecfu Mose yoac edeec,

²⁹ naso imohai yofi deec, “Nennoc Kebu, imocac ni yoac sasawa edeguduae, imoc Aigita ngictau Pareco ededacbesena.”

³⁰ Ifi deu Mosengo ine yofi dema edeec, “Negennec, ni yoac dedeac kuc mong mi fenendeac anu Pareco ye neac yoacnaac kedzac naric mi kpeude.”