Makekeng 40 - Deduamiti

Kpetiac ama desigecdeac yoac

¹ Kebungo Mose yofi edeec,

² “Afo hanac hanaheau wenac uameme kpete mocgu imohai Kebugoc ewacemeemeac kporucamaac kporucwomong kpedzina nambeso.

³ Nanu imocac manau Kebungo wiac heigboringemmekecduaeac katapa faima imoc mana kpetiac nga kpataning yombonggac kporucngo hedzickebesena.

⁴ Amma tatac ifingoc manau meemma faina tacmanu witiau wiara arenggebesena. Kifanananga mema emma kifaya miacna imohai nambisia.

⁵ Nammagec hosuc homungkerenggac arata golngo memea meemma Kebungo wiac heigboringemmekecduaeac katapa imocac fanihau faima kporucwomong naguac kporuc faibesena.

⁶ Amma sesegerec hafoangoc ohogecdeac arata imoc meemma Kebugoc ewacemeemeac kporucamaac kporucwomonggac naguac fanihau faina tacbeso.

⁷ Tacmanu hanimaringina dzuacgecdeac tera kunengtoa imoc Kebugoc ewacemeemeac kporucama nga arata botucngirau faima imohai doku kpakena kemeu faina tacbeso.

⁸ Taru sobenggac oda faina yerecgedaru odanaguac kporuc gbedickena nambeso.

⁹ Faima hosogecdeac kerecdoku mema kporucwomong nga wiara sasawa imocac manau kpetiac anggecdeac desiyunuma nadzicyemmena wiac sasawa imoc yeni kpetiac andacgecde.

¹⁰ Amma sesegerecac arata nga imocac wiara sasawa ifingoc hosoma desina arata kpetiac nga kpataning yombong anude.

¹¹ Amma tera kunengtoa nga hania imoc ifingoc hosoma desina kpetiac ambeso.

Aharon nga medacfora desiyunuec

¹² Ifi amma Aharon nga medacfora hesicyunuma hama Kebugoc ewacemeemeac kporucamaac naguyau faiyununa nanggec doku nadzicyemmebesena.

¹³ Nadzicyemmema Aharon wamba kpetiac heimina kemeu kerec nadzicmima neac womonggareng kpetiac anudeac desimibesena.

¹⁴ Amma medacfora yeni ifingoc hesicyununa hama nammagec ngakpi herea kporuc isoc heiyemmena kemebeso.

¹⁵ Kemeu mangngina kerec nadzicmidang ifi isocngoc kerec nadzicyemmena yeni neac womonggareng ua mekecbisia. Nga kerec nadzicyemmenade imocac titiha yofi, yeneng nasosoc fingecsahengina feengkefudesoc ua imoc mekecbisia.”

¹⁶ Anu Mose ye Kebungo dederecge ammiec, imoc sasawa modacdacma medarec.

Afo kpete mocguac wenac uameme kpete mocgu

¹⁷ Anu kifa kpete yohockang imocac afo hanac hanaheaac wenac uameme kpete mocgu imohai kporucwomong kpedzigec enec.

¹⁸ Mosengo imohai kporucwomong kpedziu enu hania sasawa faima fombong sasawa faiyunuma fombonggac memeseriac ic amma icsira herea hafoangoc sasawa faidarec.

¹⁹ Faima icsira imocac witiau kporucwomonggac kporucama kperahaec. Imoc Kebungo Mose meudeac dederecge ammiec, imocacsoc modacma meec.

Wiac fingerecac dedekperagi

²⁰ Faima Kebungo wiac heigboringemmekecduaeac wiac katapa manau fau kemeu tofohogecdeac tofoya sineu kenu tapea katapa witiau heiec.

²¹ Heima katapa imoc kporucwomonnu meemma fau taru mana kpetiac nga kpataning yombonggac kpoructoa gbedickeu mama Kebungo wiac heigboringemmekecduaeac katapa hedzickeec. Kebungo Mose dederecge ammiec, imocac siricfu yombong meec.

Tatac faiec

²² Amma tatac imoc Kebugoc ewacemeemeac kporucamau kporucwomonggac tegia notfubigeng mana kpetiac nga kpataning yombonggac kpoructoaac ngadeau heiu tarec.

²³ Tacmanu imocac witiau Kebuac kicfu icsogong faima arenggeec. Imoc Kebungo Mose dederecge ammiec, imocac sirihau meec.

Kifanananga faiec

²⁴ Amma kifanananga imoc Kebugoc ewacemeemeac kporucamau kporucwomonggac tegiau tatac kiwau saotbigeng fau tarec.

²⁵ Amma Kebungo dederecge ammiec, imocac siricfu kifa sasawa imoc Kebuac kicfu faiec.

²⁶ Faima arata golngo memea imoc Kebugoc ewacemeemeac kporucamau mana kpetiac nga kpataning yombonggac kporucac fanihau heiu tarec.

²⁷ Taru imocac witiau hosuc homungkereng homuna gombunga ohoec, imoc Kebungo dederecge ammiec, imocac siricfu yombong meec.

²⁸ Amma kporucwomonggac naguu kporuc gbedickeu nanec.

²⁹ Gbedickema sesegerec dzeudeac arata imoc Kebugoc ewacemeemeac kporucamaac kporucwomonggac naguu faima imocac witiau sesegerec hafoangoc ohoma seseac yaka faiec. Kebungo warac derecgemiec, Mose ye imocac siricfu yombong meec.

Tera kunengtoa

³⁰ Anu nadzic nadzicac tera kunengtoa imoc Kebugoc ewacemeemeac kporucama nga arata botucngirau heiu tacmanu doku kpakeu kemeec.

³¹ Kemeu Mose nga Aharon amma medacfora yeni imohacnac kpakema hanimaringina dzuackecgec.

³² Yeni Kebugoc ewacemeemeac kporucamau engkecgec me arata wegenac kengkecgec, naso imohai yeni doku nadzickecgec. Imoc Kebungo Mose dederecge ammiec, imocac siricfu yombong megec.

³³ Anu wiac imoc wisickedaru kporucwomong nga arata hafoangoc yerecgedacma amasobeng odayagoc mema kporuha faima sobenggac nagutoaac kporuc gbedickeu nanec. Mose ye ifi amma ua imoc mesidarec.

Kebuac kibikperagi

³⁴ Anu hoengngo Kebugoc ewacemeemeac kporucama sememanu Kebuac kibikperagingo kporucwomong mewakeec.

³⁵ Nga Kebuac kibikperagingo hoeng manau tacma kporucwomong mewakeecac Mose ye Kebugoc ewacemeemeac kporucamau enudeacsoc mi anec.

³⁶ Anu Isracel medacfora sasawa yeni henggec hoengngo kporucwomong imoc wama enu yacma efaima singngina torokpema kengkecgec. Imoc bangeckisiu kengkecgecsoc ifi angkecgec.

³⁷ Nga hoengngo mi yaru isoc yeni tomai kecmagec wenac uameme damohai yaru yeni modacma kengandae.

³⁸ Imoc yofiac, wenacfu Kebuac hoengngo kporucwomong witiau tackefec nga tofocnacsoc hoeng manau gerec dzema fekefec. Isracel ngicngacareng hafoangoc sinnu kenggecsoc yeneac kicnginau ifi fingeckefec.