Makekeng 39 - Deduamiti

Womonggareng yeneac ngakpi megec

¹ Anu yeni witic kibia dorong, giweng nga sacsacngo kporuc mema kpetiac amau womonggareng ua megecdeac kpetiac kekecac wambangina megec. Kebungo Mose dederecge ammiec yeni ifi yombong Aharonggac wamba megec.

² Kpetiac uaac masecngakpi golwiticngo nga witic dorong, giweng nga sacsac amma linenwitic pososoc yumuyumuyango megec.

³ Nga marikibingic yeneng gol hepatanggegec efea yombong anu merecgegec witic fingeru imocngo wiac kibia dorong, giweng, sacsac amma linenwitic pososoc botucnginau faima kporuc memusunggegec kibi kibi fingerec.

⁴ Nga kpetiac uaac masecngakpiac fuau mendac mendanggeac kporuc mema tegia yohockannu mendangyurugec.

⁵ Anu kpetiac uaac masecngakpiac fadeng imocngo masecngakpi seria metarudeac meserigec, imocngo ngakpiac kporucgoc mocgu anec. Imoc Kebungo Mose dederecge ammiec ifi isoc gol, witic dorong, giweng, sacsac nga linenkporuc pososoc yumuyumuyango megec.

⁶ Anu golwitic mudzema dzegema hoc buma kuneng kpara oniks hoc imohai faigec. Hoc imohai Isracel medacfora yeneac kpacngina mendzicgec. Imoc onga mendzicma kpac imocngo meseriandae, ifi isoc mendzic mendzira.

⁷ Kebungo Mose dederecge ammiec imocac sirihau hoc imoc masecngakpiac fuayaac kporucac witiau faigec. Imoc Isracel medacfora yeneac negenggec fekefudeac ifi megec.

Mokucac kaso

⁸ Anu mokucac kaso imoc marikibimemengic yeneng memusunggema masecngakpi megec ifi isocngoc golwitic nga witic dorong, giweng, sacsac nga linenwitic pososoc yumuyumuyango megec.

⁹ Imocac tegia neackpac nga yohockango kpougec mocgu anec. Yohockangngo kpougec mocgu anu hereaya socfungoc sasawa span kpete mocgu anec nga odahaac span kpete mocgu anec.

¹⁰ Anu imocac witiau hoc arenga neackpac faigec, wi imohai hoc buma kuneng yofi arengyunugec. Rubi hoc mocgu topas hoc mocgu nga beryl hoc mocgu,

¹¹ nga areng imocac bageau emerald hoc safir hoc amma diamong hoc faigec.

¹² Nga areng yereac bagengirau imohai hayacint hoc, agat hoc amma ametist hoc imoc faiyunugec.

¹³ Nga emubigeng imohai krisolit hoc, oniks hoc nga yasper hoc faigec. Yeni golwitic mudzema dzegema hoc imoc kibingina gombunga tatacngina mengerema imohai faigec.

¹⁴ Hoc buma kuneng imoc Isracel kisicfora twelf yeneac kpacngina tembuc tembuc modacma faigec. Nga hoc tembuc tembucfu kpacngina tembuc tembuc mendzicgec, imoc onga mendzicma imocngo kpac meseriandae, ifi isoc mendzicgec.

¹⁵ Anu yeni mokucac kaso imocac witic goltegengngo mudzema seng mema faigec. Imoc witic mudzeandae, ifi isoc megec.

¹⁶ Mema areng yohockang golngo mudzema kambac kambac yohockang golngo mema mokucac kasoac tuturunga yohockannu faigec.

¹⁷ Faima seng yohockang golngo memea imoc kambac kambac yohockanggac manau mokucac kasoac tuturunnu mendangyurugec.

¹⁸ Nga golwitic tosea yohockang tarec imoc masecngakpiac fuayaac wambau kicnginaubigeng mendanggegec.

¹⁹ Meserima kambac kambac yohockang golngo mema mokucac kaso tegia noboc nga noboc kpetiac uaac masecngakpiubigeng faiyurugec.

²⁰ Amma kambac kambac yohockang golngo mema kpetiac uaac masecngakpiac fuaac wamba bageau kicnginaubigeng fadenggoc toroc torokpea fede, imohai masecngakpiac fadenggaru wihacnac megec maec.

²¹ Mema mokucac kasou kambac kambac imohai witickema kambac kambac imohacnac masecngakpiac witic kibia dorongngo wihanac fadenggaru kemeudeac megec. Imoc mokucac kasongo masecngakpiunac mi fotockeudeac ifi megec. Nga Kebungo Mose dederecge ammiec imocac siricfu wiac imoc medacgec.

²² Anu witicngo kporuc kibia dorong mema kporuc masecngakpiac ngakpi herea megec.

²³ Mema botuhau orucacsoc titinga mema wasaingic yeneac ngakpiu feande, siriha ifia isoc, imoc titinga imoc mi tegerudeac yerecgema meserima kpebigec.

²⁴ Nga ngakpi tegiaac marabeau imohai ine pommegranat icgbomeaac ongea kibia dorong, giweng nga witic sacsac yumuyumuyango megec.

²⁵ Amma wesic goltegengngo mema pommegranat icgbomeaac botucnginau faigec,

²⁶ wesic mong nga icgbomea mong amma wesic mong nga icgbomea mong, botuha botuha ifi nga ifi womonggarenggac uangakpi tegia hafoangoc imohai faikenggec. Imoc Kebungo Mose dederecge ammiec, imocac siricfu megec.

²⁷ Amma linenwitic pososoc mengerema imocngo kporuc mema Aharon nga medacfora yeneac ngakpi manau megec.

²⁸ Amma orucfu kporuc yerecgegec imocngo duya anec nga nasotoaac dungina imoc linenwitic pososocngo megec. Nga linenkporuc amma linenkporuc yumuyumuyango dzeingina mana gbotogec.

²⁹ Nga fadeng imoc linen pososoc yumuyumuya nga witic dorong, giweng amma sacsac imocngo megec. Imoc Kebungo Mose dederecge ammiec, imocac siricfu yombong medacgec.

³⁰ Amma yeni ira kpetiacac wiac dabac dabac efea goltegengngo mema kpac meserigecdeac onga mendzicandae, ifi isoc imohai yoac yofi mendzicgec, Kebuac kpetiacngic desi desia.

³¹ Amma imoc witic dorongngo witic kuneng mudzema du witiau meserigec feec. Imoc Kebungo Mose dederecge ammiec, imocac siricfu yombong megec.

Kpetiac ama medacgec

³² Yeni ifi amma Kebugoc ewacemeemeac kporucamaac kporucwomongagocac ua imoc sasawa mesidacgec. Kebungo Mose dederecge ammiec, Isracelac medacfora yeni imoc sasawa modacma medacgec.

³³ Medacma kporucwomong nga imocac wiac sasawa, imocac honaha sasawa, fombonga sasawa, memeseriac ic sasawa nga icsira herea hafoangoc sasawa nga hania sasawa mema Mosearu mekenggec.

³⁴ Nga kporucama nga wiara sasawa semegecdeac ramangiwaac sebera sacsac amma dolfin kondungyanggac sebera nga mana kpetiac nga kpataning yombonggac kpoructoa katapa hedzickema nanudemoc

³⁵ amma Kebungo wiac heigboringemmekecduaeac katapa tofoyagoc nga tapeagoc

³⁶ nga tatac amma imocac wiara sasawa nga Kebungo nenigoc kecdeac icsogong

³⁷ amma kifa hania goltegengngo memea nga imocac kifa amma imocac wiara sasawa nga kifananangagocac kerecdoku

³⁸ amma arata golngo memea nga hosogecdeac kerecdoku nga hosuc homungkerengagocac sopo nga kporucama naguyaac kporuc

³⁹ nga arata aieng sacsacngo memea nga imocac waiac aieng sacsacngo memea nga imocac tofoya nga imocac wiara sasawa amma tera kunengtoa haniagoc

⁴⁰ amma amasobennu kporuc nanude nga icsira herea hafoangoc nga witicngina nga kpingngina seria nga Kebugoc ewacemeemeac kporucamaac kporucwomonggac enactofoc tofoho uaac wiara sasawa

⁴¹ nga kpetiac amau womonggareng ua megecdeac wamba kporucngo memea, imoc Aharonggac kpetiac kekecac wamba nga medacfora yeneac womonggareng uaac wamba, imoc sasawa Mosearu mekenggec meec.

⁴² Kebungo Mose dederecge ammiec, imocac siricfu Isracel medacfora yeni ua hafoangoc ifinoc modacma medacgec.

⁴³ Anu Kebungo ua sasawa megecdeac dederecge ayemmeec yeni siriha ifia yombong megec. Anu Mosengo imoc hafoangoc henu ngereeyombonggeu kenecyunuec.