Makekeng 38 - Deduamiti

Sesegerec oho ohoac arata meec

¹ Anu ye sesegerec hafoangoc dzeudeac arata akasia icngo meec imoc hereayaac kubitkpete marimong nga odahaac kubitkpete marimong amma imocac noboha nga titiha neackpac imoc sasawa yeneac kpetengina socfungoc anec nga emuhacnac wi enude kubitkpete harebec anec.

² Amma tuturunga neackpac imocac baiha neackpac meu aratagoc mefosoema nammanu aieng sacsacngo gborockedarec.

³ Semedacma arataac wiacgedanga sasawa aieng sacsacngo meec nga hamaac sokoc, sapaha, sokoha kuneng amma saraha nga gerecac teraya, ifi medarec.

⁴ Mema waiac mong aieng sacsacngo mema arata memeseriac bageau emu nga wi botucngirau faiec.

⁵ Amma tofoac negemma aieng gerea hetinggegec patatakeu kambac kambac neackpac anggec meyunuma tuturunga neackpac imohai faiyunuma waiac aieng sacsacngo memea imocngo tofoya meseriu nanec.

⁶ Nanu tofo akasia icngo mema aieng sacsacngo gborocyurudarec.

⁷ Gborocyuruma arata tofohogecdeac tofo tegiau sineu kenec. Arata imoc parangngo managoc meec.

Dzuac dzuac tera kunengtoa megec

⁸ Anu tera kunengtoa nga hania mong aieng sacsacngo meec. Ngac Kebugoc ewacemeemeac kporucamaac naguyau enactofoc tofoho ua mekecgec yeneng wikingngina aieng sacsacngo memea imoc migec teratoa imocngo meec.

Amasobeng megec

⁹ Anu ama ngadeau oda manau sobeng tegia saoutbigeng imohai kporuc totong manau nanggecdeac linen pososoc yumuyumuya kubitkpete 100, ifi meyunuec.

¹⁰ Mema icsira herea hafoangoc twenti nga yeneac hania twenti aieng sacsacngo mema honacngina nga witicngina imoc silwango meec.

¹¹ Mema tegia nortbigenggac kporuc hereanginaac kubitkpete 100 nga icsira herea hafoangoc twenti nga haningina twentingoc aieng sacsacngo mema honacngina nga witicngina imoc silwango medarec.

¹² Anu tegia wenac keme kemeaubigenggac kporuc hereanginaac kubitkpete fifti nga icsira herea hafoangoc ten amma haningina ten nga honac nga witicngina silwango megec.

¹³ Anu wenac ere ereaubigenggac kporuc hereanginaac kubitkpete fifti ifingoc meyunugec.

¹⁴ Nga nagu nobohaac kporuc imoc hereanginaac kubitkpete fiftin nga imocac icsira herea hafoangoc harebec nga haniangina harebecngoc.

¹⁵ Amma nagu nobohaac siriha ifingoc meec. Ifi anu kporuc noboc nga nobocac kubitkpete fiftin nga ic harebec harebec nga haniangina harebec harebec ifi nangkenggec.

¹⁶ Nga kporuc sasawa oda manau sobeng yerecgema fai kengkena imoc linenwitic pososoc yumuyumuyango memea.

¹⁷ Sobenggac icsira herea hafoangoc sasawau silwawitic kpefusegec yeregeec. Ic herea haniangina imoc aieng sacsacngo memea nga honac nga witicngina imoc silwango megec. Amma ic yeneac kunengngina wi megec imoc silwango gborocyunugec.

¹⁸ Anu sobeng naguyaac kporuc imoc odahaac kubitkpete twenti nga hongngaac kubitkpete marimong amma emubigeng made imocac odahaac kubitkpete marimong anec. Marikibimemengicngo imoc witic kibia dorong, giweng nga sacsac mema linenwitic memusunggema meu odaac kporuc megec imocngo kibi kibi ifi fingecma feec.

¹⁹ Nga imocac icsira herea hafoangoc neackpac mema haniangina neackpacngoc aieng sacsacngo mema honacngina nga witicngina silwango megec wisickeu kunengngina wi silwango gborocyunugec.

²⁰ Nga womonggac ngadeau sobeng oda manau yerecgedacma feec, imocac kping sasawa aieng sacsacngo megec.

Kporucwomong medacgec

²¹ Anu Mose ye Kebungo wiac heigboringemmekecduaeac kporucwomonggac areng hemma kpetea isinggema wiac mehagecdeac dederecge ayemmeu wiac imoc sasawa mema megec. Womonggareng Aharonggac medaha Itamarngo garengyunumanu Lewiac kisicarengfora yeneng wiac imoc osodacgec.

²² Anu Kebungo Mose ua sasawa megecdeac dederecge ammiec nga Yehuda kisicfunac Uri medaha, Hur esea kpara Betsalecel, yeng ua imoc medarec.

²³ Anu yegoc Danggac kisicfunac Ahisamak medahango Oholicaw meficgema ua meec. Yeng kibi aiennu heihei nga marikibimemeac negen negenggoc nga marikibi, kibi kibi arenggeudeac negen negenggoc amma witic kibia dorong, giweng nga sacsac amma linenkporuc pososocngo kporuc memusunggema mekefu kibi kibi fingerec.

²⁴ Nga kpetiac amaac ua hafoangoc megecdeac gol sesengina sasawa faigec gol imoc talent kpeteac ebiha 29 nga shekelkpeteac ebiha 730anec. Imoc kpetiac amaac ebiha modacma osogec.

²⁵ Nga habu kpacngina nga kpetengina oho ohoya yeneng silwa yemmegec, imoc talent kpete 100 nga shekelkpete ebiha 1 775 imoc kpetiac amaac ebiha modacma osogec.

²⁶ Anu ngic kifangina twenti namma ende warac osoyunugec tembuc tembuc sasawa yeneac kpetengina 603 550 anec. Ammanu kpetiac amaac ebic feec, imocac sirihau yeni tembuc tembuc beka kpete mocgu, imoc shekelkpete ½ deyec deyemmea, imocacsoc faidacgec.

²⁷ Nga yeni silwa talent 100 gerea hetinggegec patatakeu imocngo kpetiac amaac hania nga mana kpetiac nga kpataning yombonggac kpoructoaac hania megec. Imoc hania 100ac negemma talent 100 feecac hania mocgu mocgungo talent ebiha mocgungoc anec.

²⁸ Nga silwa shekelkpete 1 775ngo icsira herea hafoangocac honac mema ic kunengngina wi gborocyunudacma witicngina megec.

²⁹ Anu aieng sacsac seseac onga faifaia imocac ebiha talent kpete 70 nga shekel 2 400.

³⁰ Anu ye imocngo Kebugoc ewacemeemeac kporucama naguac hania nga arata aieng sacsacngo memea nga waiac aieng sacsacngo memea, imoc amma arataac wiac sasawa

³¹ nga amasobenggac ic totong yerecgedarec imocac hania nga sobenggac nagutoaac icac hania nga kporucwomonggac kping sasawa amma totong yerecgedarec imocac kping sasawa imocngo medacgec.