Makekeng 37 - Deduamiti

Dzadzahacac katapa megec

¹ Anu Betsalecel ye akasia icngo dzadzahaac katapa hereayaac kubitkpete yohockang nga noboha amma odahaac kubitkpete mocgu nga noboha amma emuhacnac wi enudeac kubitkpete imoc mocgu nga noboha ifi meec.

² Mema mana nga ngadea goltegengngo witiau gborocyurudacma tegia mong golngo meu yerecgeec.

³ Mema gol gerea hetinggeu patatakeu hania neackpac imocac kambac kambac neackpac imocngo mema yohockang noboc, yohockang noboc ifi faiyunuec.

⁴ Faiyunuma akasia icngo tofo mema golngo gborocyuruec.

⁵ Anu katapa tofohogecdeac tofo imoc katapa noboc nga noboc tofoho kengkenggac kambac kambacfu fau kenec.

⁶ Ifi amma katapaac tapea goltegengngo meec imocac hereaya kubitkpete yohockang nga noboha amma odahaac kubitkpete imoc mocgu nga noboha anec.

⁷ Amma gol mema keruwac onga yohockang heimengere amma memusungyuruma tapea tegiau noboc noboc faiyuruu taroc.

⁸ Mong imoc tegia noboc nga mong imoc tegia noboc katapaac tapea tarecfu ifi mefosoeyuruma meyuruu mocgu amma taroc.

⁹ Nga keruw onga yohockang yeri kicmesungirango engemma tacma kpegangngira miacma namma katapaac tapea semeoc. Amma engemma tapea hemma taroc.

Tatac megec

¹⁰ Anu akasia icngo tatac hereayaac kubitkpete yohockang nga odahaac kubitkpete mocgu nga emuhacnac wi enude imoc kubitkpete mocgu nga noboha meec.

¹¹ Mema goltegengngo gborockema tegiaac tegiau parang mong golngo meu yerecge enec.

¹² Mema tegiau parang mong noboc nga noboc kpetea imoc marimedaha budong nga dzegaric yereac yapangngiraac kpete isoc mema tegia imoc golngo meu yerecge enec.

¹³ Amma gol gerea hetinggeu patatakeu tatacac kambac kambac neackpac mema hania neackpac imohai tuturunga mocgu mocguu faima meseriec.

¹⁴ Nga tofo sinegec kenu tatac tofohogecdeac kambac kambac imoc tegiaac kpeherinnu faigec tofo imohai taroc.

¹⁵ Ye tatac tofohogecdeac tofo imoc akasia icngo mema golngo gborocyuruec.

¹⁶ Anu tatacfu seseac dokuac ua megecdeac teragedanga, sokocgedanga, nga seseac doku hetinggegecdeac kpakenecgedanga kapia nga kpakenecgedanga kuneng, imoc sasawa goltegengngo meyunuec.

Kifanananga megec

¹⁷ Anu kifaac nananga imoc goltegengngo meec. Ye gol mema imoc hamango heimengere amma kifananangaac hania nga wotunga medarec. Amma sokoha, gbomea nga dzuria mema mefosoeu mocgu andarec.

¹⁸ Wotungaac kebangaunac fawa siks tohoma nanggec. Nobocac fawa harebec nga nobocac harebec.

¹⁹ Amma fawa monnu sokoc harebec yeni almond icac dzuria isoc mema faiyunugec. Imohai gbomea mong nga dzuria mong megec. Nga fawa monnu ifingoc sokoc harebec nga gbomea mong nga dzuria mong megec. Kifanananggac wotunnunac fawa siks tohoma nanggec, imohai ifingoc meyunugec nandacgec.

²⁰ Nga kifanananggac kebangau sokoc neackpac almond dzuria isoc mema gbomea nga dzuriangina megec.

²¹ Nga fawa wi nanec noboc noboc imocac bageau gbomea mong faigec imoc kebangagoc mefosoeyunugec mocgu andacgec. Amma fawa botuc noboc noboc, imocac bageau gbomea mong faima mefosoegec mocgungoc anec. Amma fawa emu noboc noboc, imocac bageau gbomea mong faima mefosoegec mocgu anec. Ifi faikenu fawa siks imoc yeni kebangaunac erema nandacgec.

²² Gbomeangina nga fawangina yeni mefosoegec mocgungoc andacgec. Wiac imoc sasawa goltegeng wiac mocgungosac mema heimengere amma megec.

²³ Amma ye imocac kifa sewen nga yeneac fitac nga fifitac sasawa amma teratoaya sasawa imoc goltegengngo medarec.

²⁴ Ye goltegeng ebiha talent mocgu imocngo kifanananga nga wiara sasawa medarec.

Hosuc homung oho ohoac arata megec

²⁵ Anu akasia icngo hosuc homungkerenggac arata meec imoc hereayaac kubitkpete mocgu nga odahaac socfungoc nga wihanac emu imocac kubitkpete yohockang. Nga baiha imoc arataac icgoc mefosoegec wiac mocgu anec.

²⁶ Amma ye imoc goltegengngo meu wi nga emuhacnac maec sasawa amma baiha gborocyunudarec. Gborocyunudacma tegia mong goltegengngo meu arata yerecgedarec.

²⁷ Nga tegia imocac bageau noboc nga noboc kambac kambac golngo memea yohockang fau tofo imohai sinegec kenu arata tofohogecdeac ifi meec.

²⁸ Nga tofo imoc akasia icngo mema golngoc faima gborocyuruec.

Wiac homuna gombunga megec

²⁹ Amma hosuc homungkereng oho ohoac uamemengic yeneng wiac meandae, ifi isoc yeng nadzic nadzicac kerecdoku kpetiac nga hosuc homungkereng oho ohoac sopotegeng meec.