Makekeng 34 - Deduamiti

Tafe gboria

¹ Kebungo Mose yofi edeec, “Ge hocngo tafe yohockang warac warac heiyai isoc heima mengerena. Amma warac tafe ukuna kpedzameec, yoac imohai feecmoc ni imocngoc monggoc imohai mendzicgembade.

² Nga ge asoacngoc yacma efaima Sinai tikiu erena neng gembadeac tiki bumau nambesena.

³ Ngic mongngo gegoc mi erebeso. Amma mong ye tikiu eng ereu henggecde imoc ifingoc kpaeyagoc ande. Tiki hafoangoc ngiha kpac ambeso. Anu ramafocngina nga donggiburumakafocngina tikiac fanihau kpindzing nema mi nambisia.”

⁴ Ifi deu Mose ye hocngo tafe yohockang warac warac heiec isoc heimengere amma ama werec wereckenggac Kebungo dederecge ammiec, imoc modacma Sinai tikiu enec. Ye tafe yohockang hocngo memea imoc mariau meyuruma enec.

⁵ Enu Kebungo hoeng manau mama yegoc imohai namma yengena kpara Kebu imoc dekperagiec.

⁶ Anu ye nammanu Kebungo kiwau ferecgema kpacma deec, “Kebu, Kebu Anutu ye ngicngac yeneac ubahodung negemma wosoefac ayemmeande. Ye herebuya bic mi fingerude amma yoac dedzege amma imoc modackecma yoac foragoc kecande.

⁷ Amma ye yoac dzegema imoc modackefu imocngo tausenga tausenga yenigoc seria fekefude. Nga faka mangana ngicngac ayemmekecgec amma singyoac ferahegec amma turungnginagoc yeni kopocsicngina wayemmeude. Ye mangana megec imocac turunga eng mi wadarude. Ye imocac kpemeting imoc esamedacfocngina nga bangecfocngina yeneac fingecsahe arenga harebec nga neackpac yenearu imoc kpouyemmeude.”

⁸ Ifi deu Mose ye bic yombong bangecfu ngonducnema numumima

⁹ yofi deec, “O Kebu ge neac negenna ngereeudeu nenigoc botucninau kengkecbesena. Neni ngicngac ubaseri nga fakanina dindingac kpac. Anu geng sifu kopocsicnina wama geangga ngicngac annideac menununa.”

Dzadzahacac yoac

¹⁰ Ifi deu deec, “Negennec, ni dzadzahac mong ngenigoc mebade. Nga ngicngacfocga hafoangoc yeneac kicfu faka bibiagoc mebade. Faka ifia warac bangectoa bangec sasawau nga bangecareng sasawa ngenearu mi fingec fingera imoc meba henggecde. Anu Kebu neng faka meba ge ngicngacareng botucnginau kecnec yeni sasawango imoc henggecde. Imoc yofi, neng faka anggembade imoc wiac bibiagoc nga engena.

¹¹ Nga ni yaguc yoac dederecge anggenduae imoc modacbesena. Negennec, ni geac kicfunac Amoringic, kenacanngic, hittingic, peridzingic nga hiwingic amma yewusingic kisangyunuba worama kendacgecde.

¹² Nga ge kennade bangec imohai ngicngac kecdae yenigoc dzadzahac mema botucnginau botac mebanggac garengga meemema dzadzahac mong yenigoc mi mebesena.

¹³ Anu ngeni yeneac aratangina meickedacma hocwotungherecngina hodunga kpedzamema aserawotungngina herea kpetiac negendaemoc, imoc hetackedacgec mama febisia.

¹⁴ Ni Kebu kpacna Keracmangang Kpetiac. Ni Anutungo heresongogoc hoangguma keracmangang kpetiac amba herenau gerec isoc dzema fede, imocac amma ge nemuonga me anutu monggaru mi ngonducnema numumibesena.

¹⁵ Bangec imoc kecdae yeni singtoangac isoc nemufocngina nga anutufocngina hania hania hoangyunuma yeneac sese dema wiac kpema faiandae nga goa yeni heitaigugec ge seseyakangina imoc nebanggac. Imocac amma ge ngicngac bangec imohai kecdaemoc yenigoc dzadzahac mi mebesena.

¹⁶ Ge yenigoc dzadzahac menadeu naroangfocngina medacfocgaac negemma meyunugecde. Meyunugec yeneng singtoangac isoc amma nemufocngina nga anutufocngina hania hania hoangyunuma medacfocngina kosa kpedziyunugec yeneng ifingoc serofaka amma anutufocngina hania hania hoangyunugecde.

¹⁷ Ge aieng nganoc gerea hetinggena patatakeu imocngo nemuonga nga anutungina hania hania mi meyunubesena.

¹⁸ Ge icsogong aenga kpac imocac nasotoa kecma wenac sewen icsogongga aenga kpac, ifiasac nekecbesena. Afo awiw imohainoc Aigitabangec wama hanec. Hanec imohai icsogong aenga kpac negecdeac dederecge anggenai, naso imoc modacma tacbesena.

Warac warac fingec fingera

¹⁹ Nenggac herenginaunac medac warac warac fingec fingera sasawa imoc neac andacbisia. Nga ramaburumakafocngina ngiwa warac warac fingec fingera sasawa yeni desiyununa neac andacbisia.

²⁰ Nga donggifocga ngiwa warac warac fingec fingera yeneac turunga imoc ramangiwa faibesena, me ifi mi annadeac negennecfu ubia kpetackebesena. Nga morocmedacfocga yeneac turunga faibesena, ngenearunac mongngo neac kicfu sesea kpac eng mi habeso.

²¹ Ge wenac uameme siks imohai ua mekecma wenac kpete seweng imohai tacnegembesena. Uau bangec memengerenasou nga kpememenasou ifingoc uameme imohai tacnegembesena.

Nasotoa goaac dederecgeyoac

²² Anu ge semeng ua gboriaunac wit yaka hanahema kpememe annade imohai wit buma heigecdeac nasotoa tacbesena amma kifa wisic wisickeau kpememeac nasotoa takecbesena.

²³ Anu ngicfocga sasawa yeni kifasoc naso harebec kebungina, ni Kebu Isracelac Anutu, neac hoannu hakecbisia.

²⁴ Imoc yofi, ni kicgau bangecareng meicyunuma bangecga meyadibade. Anu ge kifasoc naso harebec Kebu Anutugaac hoannu nannadeac hakecnadeu mong ye geac bangecga mebeso mi negenude.

²⁵ Nga ge neac sese dema seseac yang houma ohogecdeac yanggac sawa imoc wiac aengagoc imocgoc mi kpeturangyurubesena. Amma ge onggo onggongge nasotoaac seseyang kpema houma ohomigec imocac tosea faina tacmanu ama mi wereckembeso.

²⁶ Ge uaga gboriaunac semeng hanac hanahea gombunga yombong imoc Kebu Anutugaac amau mehabesena. Ge noningmedahaac fusia nonggeaac namugoc birikennu mi ohobesena.”

²⁷ Anu Kebungo Mose yofi edeec, “Ni ge nga Isracel ngenigoc yoac imoc modacma dzadzahac anduaeac amma imoc mekecnadeac ohobesena.”

²⁸ Nga ye Kebugoc hadzing tofocnac foti kecma yaka nga doku mi nenekefec. Kecmanu tafe imohai dzadzahacac yoac ten mendzicma miec.

Mose kicmesuya kperagiagoc anec

²⁹ Anu Mose ye Sinai tikiu Kebugoc yoacyoac anu wisickeu Kebungo wiac heigboringemmekecduaeac tafe yohockang, imoc mariau mema maec. Anu kicmesuya kperagiagoc anec imoc mi negengemeec.

³⁰ Anu Aharon nga Isracel medacfora yeni Moseac kicmesuya kperagiagoc hemma yeac wegenac kembeso kengec anggec.

³¹ Ifi anggec Mose ye hagecdeac yoac fau Aharon nga isracelkpebunggac ngicenara sasawa yeni dzigenema yearu hagec yoac edeyunuec.

³² Edeyunuu wisickeu Isracelngicngac sasawayeni yeac wegenac hagec Sinai tikiu Kebungo yoac ededarec, imoc sasawa modacgecdeac edeyunuec.

³³ Edeyunudaru wisickeu kicmesuya kporucsusucngo semeec.

³⁴ Semema Kebuac kicfu kemma yegoc yoacyoac anudeac nasosoc kporucsusuc meickeu mau yoacyoac amma kporucsusu monggoc heikefec. Anu Kebungo yoac dederecge ammiec imoc Isracelngicngac edeyunukefec.

³⁵ Nga Isracel yeni Moseac kicmesuya kperagiagoc hengkecgec. Henggec ye kporucsusucngo kicmesuya monggoc semema kecma monggoc Kebugoc yoacyoac ambeso kengkefec.