Makekeng 32 - Deduamiti

Ngicngac yeni burumakamedaha golngo megec

¹ Mose ye tikiu kefu naso hereeu ngicngacareng yeni imoc hemma Aharonggaru kemma kpedzucnema yofi edegec, “Mose ye Aigitabangecfunac menunuma hesicnunuec, imoc yearu noc wiac fingecmiec imoc mi negendimbeac ge bic yacma anutu mong menemmena yeng warainemmema kembeso.”

² Ifi degec Aharongngo yofi edeyunuec, “Ngeni enengfocngina nga naroangmedacfocngina yeneac kedzacnginaunac wiac kambac kambac golngo memea wangecyunuma nearu mehagec.”

³ Ifi deu ngicngac sasawa yeni wiac kambac kambac golngo memea kedzacnginaunac mesidacma yearu mekenggec.

⁴ Mekenggec yeng imoc mocgu mocgu mema gol gerea hetinggeu patatakeu burumakamedahaac ongea mong meu yeni hemma yofi degec, “Yomoc Isracel geac anutuga engena. Yeng Aigitabangecfunac hesicguma haec.”

⁵ Anu Aharon ye ifi hemma arata mong imocac fanihau mema kpacma yofi edeyunuec, “Wereckenu Kebuac nasotoa tacbisina.”

⁶ Nga yeni ama werec wereckenggac yacma sesegerec hafoangoc ohogec nga ruaeac sese mehama ohoma yenahafoc negec. Negec wisickeu ngicngac yeni matacma yaka nga dokuseria nema yacma yegec fedema serofaka anggecdeac tobangemegec.

Kebuac herebu

⁷ Ifi anggec Kebungo Mose yofi edeec, “Ngicngacfocga Aigitabangecfunac meyunuma hesicyunu hanec yeni kekec nga angammemengina manganeyombonggedeac ge yacma bic kemena.

⁸ Ni sing modacgecdeac dederecge ayemmeai imoc bic wama sing segema kendau. Kemma gol gerea hetinggegec patatakeu burumakamedahaac onga mong mema yeac kicfu ngonducnema numumima sese faimima yofi dedau, yomoc Isracel geac anutuga engena, yeng Aigitabangecfunac hesicguma meguma hadac.”

⁹ Ifi dema yofi edeec, “Negennec, ngicngac imoc yeni yenengkecba ubaseri yombong andae anu ge ifingoc yennennec.

¹⁰ Imocac amma herebunaac gerecngo yonohou yeni kpac anggecdeac ayemmebadeac ge wanuma kenna. Amma ge anggemba gengsac ngicngacareng kuneng annade.”

¹¹ Anu Mose ye Kebu Anutuyaac kicfu kpacsambic ammima yofi numumiec, “O Kebu, gennoc ngicngacfocga Aigitabangecfunac kuctoagagoc nga mariserigango meyunuma hesicyunuma hanec. Ge yenearu herebugaac gerecngo yonohoudeac denec, imoc mi ngereede.

¹² Ge ifi anna Aigitaareng yeni yofi debauac, ‘Ebictoau faiyunuudeac negensima wangecyunuma tikibangecfu kemma yunuhomema bangecfunac medzigueyunuu kecma kpac anggecdeac ifinoc anec!’ Imocac ge sifu herebugaac gerec wama ngicngacfocga ebictoa yemmebeso negensinec imoc sifu wana.

¹³ Amma enactofoc tofohofocga Awraham, Itsak nga Isracel imoc yenearu geangga kpac kpacma yoac deserima yofi edeyununec imoc negenna fekecbeso, ‘Ni bangecfocngina mesaheyunuba kpetengina sawaac asomeng isoc anggecde. Amma bangec hafoangoc yemmebadeac dedzege anaimoc yemmeba nasoya nasoya imocac mingina amma kecbesandae.’ ”

¹⁴ Ifi deu Kebungo ngicngacfora ebictoau faiyunuudeac warac deec imoc negenu naric mi anu waec.

¹⁵ Anu Mose ye Kebungo wiac heigboringemmekecduaeac tafe yohockang, noboc nga noboc mendzic mendzira, imoc mariau mema tikiunac dzigenema maec.

¹⁶ Nga tafe imoc Anutungo meec. Amma imohai kibi mendzic mendzira imoc Anutu yengenaoc mendzirec.

Mose dzigeneec

¹⁷ Anu Yehosuac ye ngicngac yeneac arongina nga orongngina negemma Mose yofi edeec, “Ni dzikacudumeng kporucamabangecfu fingeru negenduae.”

¹⁸ Ifi deu yofi meremmiec, “Imoc dzikacac firangyegec me dzikacfu yunuyunuyaac yegecudumeng isoc mi negenduae, kpac. Imoc yegectehecac udumeng negenduae.”

¹⁹ Amma Mose ye ngicngac yeneac kporucamabangecngina imocac wegenac kemma burumakamedaha nga ngicngac yegec fedema fegec yenemma yeneac herebu kuneng yombong negemma tafe mariaunac ukuyuruu tiki haniau mama kpedzameyurudarec.

²⁰ Kpedzameyuruu burumakamedaha megecmoc mema gerecfu fau dzeu kpedzamekefu uha anu doku witiau faima Isracelac medacfora yeneng negecdeac ngombongyunuec.

²¹ Ifi amma Aharon yofi edeec, “Ngicngacareng yomoc yeni dafi anggenggec kopocsic kuneng yombong ifia witinginau faiyemmedang?”

²² Ifi deu Aharongngo yofi deec, “O kunenna, ge herebuga gereagoc ifi fede, imoc naric wabang me? Ngicngacareng imoc yeni mangana bic anggec imoc negennec.

²³ Amma ni yofi edenugec, ‘Mose ye Aigitabangecfunac menunuma hesicnunu haec, ngic imoc yearu noc wiac fingecmiec imoc neni mi negendimbe, imocac ge anutu engena mong menemmena yeng warainemmeudeacsoc anu kengkecbisina.’

²⁴ Ifi degec edeyunuba golnginagoc kecgec yeni imoc mesidacma nenggec ni imoc gerecfu ukuba kemeu imohacnac burumakamedahaac onga yomoc eng fingerec.”

Faka anggecac turunga

²⁵ Aharongngo ngicngacareng wayunuma kpae mi heiyemmeu yeni faka gombunga wama memesufu andauac ngabafocngina yeneng yenemma imoc wiac gameagoc dema dzomoreyemmegec. Anu ngicngacareng memesicfuc anggec

²⁶ Mose ye imoc hemma kporucamabangecnginaac singgac naguyau namma kpacma yofi deec, “Kebuac areng andae ngeni tembuc tembuc sasawango nearu hagec.” Ifi deu Lewiac kisicarengfora sasawa yearu kpedzucnegec.

²⁷ Kpedzucnegec yofi edeyunuec, “Isracelac Kebu Anutungo yofi dede, ‘Ngic tembuc tembuc sasawango dzikacac beangngina mema fadengnginau dzegema kporucamabangec manau tegia noboc noboc odaac nagu sasawa yerecgema dacmunafocngina nga ogofocngina amma ngicngac ngenigoc wegenac kecdae imoc sasawa yunuhomedacbisia.’ ”

²⁸ Ifi deu Lewiac kisicarengfora yeni Moseac yoac modacgec ngicngacareng imoc yenearunac ngicngac 3,000 isocngo wenac imohai homegec.

²⁹ Ifi anggec Mosengo yofi edeyunuec, “Kebungo keneha ngemmeudeac ngeni medacfocngina nga dacmunafocngina kpebucyunuma yaguc Kebuac uau desiemedau.”

³⁰ Anu ama wereckenu Mosengo ngicngacareng yofi edeyunuec, “Ngeni kopocsic ebira yombong meficgedauac amma ni Kebuaru monggoc emma kopocsicngina wawaac sing meficgengemmebade gedang.”

Kebuaru monggoc enec

³¹ Mose ye ifi dema monggoc Kebuaru dzigene emma desambic amma yofi edeec, “O Kebu, ngicngac yomoc yeni kopocsic ebira yombong meficgema anutungina mong golngo medau.

³² Nga ge sifu kopocsicngina wana nga kopocsicngina mi wanadeu kekecac kibigaunac neac kpacna ohonecmoc dzuacna.”

³³ Ifi deu Kebungo yofi meremmiec, “Ngicngac damoc yeneng neac kicfu kopocsic meficgedaumoc yeni kibinaunac meicyunubade.

³⁴ Nga yaguc ine ge ngicngacareng hesicyunuma bangec edeguai imohai kenna neac angerongo waraigenude. Anu turung kpoukpouac wenac naso hauguc kopocsicnginaac turunga kpouyemmebade.”

³⁵ Amma Kebungo ngicngac burumakamedahaac ongea megec, imocac turunga hafeihomec fau yenearu haec. Nga Aharongngo imoc meec.