Makekeng 29 - Deduamiti

Womonggareng ua maringinau faifai

¹ Yeni womonggareng ua megecde nga neac kicfu kpetiac anggecdeac yofi ayemmebesena, ge burumakangiwa mong kifaya mocgu nga ramangiwa yohockang sebingira soronga yombong nga puringa kpac, ifi meyunubesena.

² Ge icsogong aenga kpac nga icsogong kambac kambac aenga kpac kerecdokuyagoc memea amma icsebera kerecdokungo hoso hosoya ifi meyunubesena. Wiac imoc wit uha gombungango mebesena.

³ Mema imoc sakac mocguac manau faiyununa kemegecde. Amma burumakangiwa kifaya mocgu nga ramangiwa yohockang imoc momoc mema haude imohai sakac imoc sese dema faibesena.

⁴ Faima Aharon nga medacfora meyunuma hesicyununa Kebugoc ewacemeemeac kporucama naguyau hama nanggec doku nadzicyemmebesena.

⁵ Nadzicyemmema ngakpi mana nga kpetiac uaac masecngakpiac ngakpia herea nga masecngakpi yengena amma mokucac kaso imoc Aharon heimina kemebeso. Heimina kemeu masecngakpi fadengango dzegebesena.

⁶ Dzegema oruhau duya heimima du witiau ira kpetiac imohai mendanggema faibesena.

⁷ Amma ge kerecdoku momoc mema oruhau kpakena mau nadzicmibesena.

⁸ Nadzicmima medacfora wangecyunu hama ngakpingina mana imoc heiyemmena kemebeso.

⁹ Kemeu Aharon nga medacfora fadeng dzegeyemmema du heiyemmena kemebeso. Anu womonggareng ua imoc yeneac ua yombong anude imoc singseringina amma nasoya nasoya feengkecbeso. Ge ifi amma womonggareng ua Aharon nga medacfora maringinau faibesena.

Kopocsicac seseac dederecgeyoac

¹⁰ Anu ge burumakangiwa Kebugoc ewacemeemeac kporucamaac hoangau mehana Aharon nga medacfora yeni maringina oruhau faibisia.

¹¹ Faigec ge imoc Kebuac kicfu Kebugoc ewacemeemeac kporucamaac naguyau kpehou ambesena.

¹² Kpehou amma sawa tosea efeanec gbonggango nemuruckema arataac baihau hosoma sawa tosea imoc arata haniau hetinggedacbesena.

¹³ Nga kereha sasawa kerac nga woso biranggema fede, imoc bawaac kerec nga sorea yohockang kerecngiragoc imoc mema arataac witiau faina gerecfu dzebeso.

¹⁴ Anu fusia, sebera nga keraha imoc ine kporucamabangecac ngadeau gerecfu faina dzedacbeso. Imoc womonggarenggac kopocsic meickeudeac sese.

Sesegerecac dederecgeyoac

¹⁵ Anu ramangiwa mocgu mehana Aharon nga medacfora yeni maringina oruha witiau faibisia.

¹⁶ Faigec kpehou amma sawa kapianec mema arata yerecgema gigibesena.

¹⁷ Nga ramangiwa yengena ine houma keraha nga hanimaria dzuacma oruha nga fusia witiau faibesena.

¹⁸ Faima imoc hafoangoc aratau faina dzedacbeso. Imoc Kebuac sesegerec amma ye homuna gombunga yombong negenu ngereeudeac amma sese imoc gerecfu faina dzema Kebuaru kembeso.

Womonggareng uau faifaiac ramangiwa

¹⁹ Ifi amma ramangiwa mong imoc mehana Aharon nga medacfora yeni maringina oruha witiau faibisia.

²⁰ Faigec ge imoc kpehou amma sawa kapianec mema Aharon nga medacfora yeneac kedzacngina foiubigeng emu tegiau hosoma maringina nonggea foiubigeng nga haningina nonggea foiubigeng imoc momoc hosobesena. Hosoma sawa tosea imoc arata yerecgema gigidacna heibeso.

²¹ Heiu sawaac tosea arataunac mema nadzic nadzicac kerecdoku mema gigina Aharon yengena nga wambaya witiau heiu medacfora ifingoc yenang nga wambanginaac witiau momoc gigina heibeso. Ge ifi annadeu Aharon nga medacfora yeni yenang nga wambangina momoc neac kicfu kpetiac andacgecde.

²² Anu ramangiwaac kereha sasawa yofi mebesena, dzia kerehagoc nga wosea manau kereha nga keraha semema fede amma bawa nga sorea yohockanggac kereha amma tabuya foiubigeng mebesena. Ramangiwa imoc womonggareng uau faiyunugecde imocac ramangiwa.

Sese fendzonggegecdeac dederecgeyoac

²³ Nga Kebuac kicfu icsogong aenga kpac sakac imohacnac icsogong kambac kambac mocgu nga icsogong kerecdokuyagoc memea mocgu amma icsebera mocgungoc mebesena.

²⁴ Mema wiac imoc sasawa Aharon nga medacfora yeneac maringinau faina yeni sese imoc Kebuac kicfu fendzonggebisia.

²⁵ Ifi anggec ge imoc maringinaunac monggoc mema imocngo sesegerecac witiau aratau faina hafoangoc dzebeso. Imoc Kebuac kicfu homungkerengagoc amma imocngo gerecfu dzema Kebuaru kemma sesegerec gombunga ambeso.

²⁶ Nga Aharon womonggareng uau faigecdeac ramangiwa imocac mondahaac fusia mema Kebuac kicfu sese imoc miacma fendzonggena imocngo geac ambeso.

²⁷ Anu ge mondacac fusia miacma fendzonggegec sese denec nga tabuyaac sese fendzonggegecdeac dedea imoc kpetiac anudeac desibesena. Womonggareng uau deserigecac ramangiwaac tabuya fendzonggegea nga wiac sese dema faifaia noboha imocngo Aharon nga medacfora yeneac ambeso.

²⁸ Nga Isracelngicngac yeni Aharon nga medacfora yeneac ifi faiengkecbisia. Imocngo yeneac sesengina angkefude. Isracel ngichabu yeni ruaeac sese ohoma yenahafoc neandae, imocac tosea imoc Aharon nga medacfora yeneac ambeso. Yeni ifi amma sesengina Kebu mima kecbisia.

Womonggarenggac wamba kpetiacac dederecgeyoac

²⁹ Nga Aharonggac wamba kpetiac imoc medacfora ngade eregecde yeneac ambeso. Anu yeni imoc heima mekecmagec kerecdokungo nadzicyemmema womonggareng ua megecdeac desiyunubisia.

³⁰ Nga medacfora yenearunac mongngo erema yeac tatac mema womonggareng amma Kebugoc ewacemeemeac kporucama mana kpetiacfu enactofoc tofoho ua meudeac uameme sewen wamba imocngoc heu kemeu kecbeso.

Wenac sewen

³¹ Womonggareng ua meudeac desigec ramangiwa imocac fusia mema kpetiac sobeng monnu ohobesena.

³² Ohona Aharon nga medacfora yeni ramafusia nga icsogong sakac manau imoc Kebugoc ewacemeemeac kporucama hoangau nebisia.

³³ Imoc ngaba meic meickeac yaka andeac womonggareng anggecdeac ngic desiyunugec kpetiac anggec kecdae yenengsac nebisia. Anu wiac imoc kpetiac yombong andeac monggac mi dedeango imoc mi nebisia.

³⁴ Nga womonggareng yeneac desi desiac fusia noboha me icsogong noboha wagec takecfu asoac anudeu imoc wiac kpetiac andeac mi nebisia, imoc sasawangoc gerecfu faina dzedacbeso.

³⁵ Ni yoac dederecge anggendua imocacsoc yombong Aharon nga medacfora yenearu medacbesena. Womonggareng ua megecdeac desigecde imocac wenac sewen mekecbesena.

³⁶ Nga kopocsic meickeudeac sese dema womonggareng yeneac kopocsic meic meicke fingerudeac wenacsoc burumakangiwa mocgu faibesena. Amma aratau kopocsic meic meickeac ua mema seuha kpac anudeac ifi anna. Ifi amma imohai kerec nadzicmima desina kpetiac ambeso.

³⁷ Nga wenac sewen arataac kopocsic meic meicke ua mena kpetiac anudeac desibesena. Mena arata imocngo kpetiac nga kpataning yombong ammanu wiac tembuc tembuc sasawango arata kpesereude ye ifingoc kpetiac anude.

Wenacsoc sesegerecac dederecgeyoac

³⁸ Ge wenacsoc ramamedaha yohockang kifangira mocgu angana imoc seseac aratau tatahoc faikecbesena.

³⁹ Sese imoc mong asoacac nga mong ama marai anu faiyurubesena.

⁴⁰ Nga rama sese dema warac warac fainade, imocgoc wit uha gombunga efakpete 1/10 mema imocac witiau oliwa fora kpekpea, imocac kerec hinkpete ¼ imocngo wit uha witiau hetic hetinggea amma seseac doku dema waindoku hinkpete ¼ faibesena.

⁴¹ Amma rama mong imoc ama marai anu sese dema faibesena. Imoc asoacac seseac yaka nga seseac doku faidang ifi faima mekic mekiriac homungkerenga anudeac imocngo hafoangoc dzeu Kebuaru kemma yeac sesegerec ambeso.

⁴² Anu sesegerec imoc Kebugoc ewacemeemeac kporucamaac naguu Kebuac kicfu hafoangoc ohokecgecde, imoc fingecsahengina fingecenggecdesoc ngenearu wenacsoc fekecbeso. Ni imohai fingecngemmema gegoc yoac denegeng angkecdede.

⁴³ Amma ni imohai Isracelac medacfora yenigoc eacnide nga tatac imoc neac kibikperagitoanagoc andeac amma kpetiac anude.

⁴⁴ Ni Kebugoc ewacemeemeac kporucama nga arata yeri kpetiac anecdeac ambade. Amma Aharon nga medacfora momoc kpetiac anggecdeac desiyunuba yeni neac womonggareng ua mekecbisia.

⁴⁵ Anu ni Isracel medacfora yeneac botucnginau kecma Anutungina kecduae nga kecbesandua.

⁴⁶ Ifi amba negenggecde, ni Kebu Anutunginango botucnginau kecbadeac Aigitabangecfunac hesicyunukenai. Ninoc Kebu Anutungina kecdua kecduae nga kecbesandua.