Makekeng 28 - Deduamiti

Womonggareng yeneac wamba kpetiacac dederecgeyoac

¹ Ge Isracelngicngac yeneac botucfunac dacga Aharon nga medacfora Nadaw, Awihu nga Elecadzar amma Itamar edeyununa yeni gearu hama neac womonggareng amma uana mekecbisia.

² Nga dacga Aharon ye wambaya kpataninga heiudeac meminade imoc heiu eweheihei meficgemibeso nga siriha gombunga ambeso anu yeng imoc heima Anutuac ua mekecbeso.

³ Marikibimeme nga negen negentegec ngic sasawa negen negentegecac Asungo mewakeyunuai, ge ngic imoc yeni sasawa edeyununa yeni Aharonggac wamba ifi memigec, yeng heu kemeu neac kpetiacngic amma womonggareng uana mebeso.

⁴ Anu wamba imoc yofi mebisia, mokucac kaso nga kasoac masecngakpi nga imocac bageau ngakpi herea isoc maria kpac. Amma ngakpi mana herea mariagoc kporuc kibiagoc memuc memusunggea mema du nga fadeng mebisia. Yeni kpetiac wamba imoc mengeregec dacga Aharon nga medacfora yeni imoc heigec kemeu Aharongngo neac womonggareng ua mebeso.

⁵ Nga yeni gol nga witic kibia dorong, giweng nga sacsac amma linenwitic pososoc, imoc sasawa mema imocngo yeac wamba mebisia.

Masecngakpiac dederecgeyoac

⁶ Marikibingic yeni kpetiac uaac masecngakpi megecdeac dema gol nga witic dorong, giweng nga sacsac amma linenwitic pososoc yumuyumuya mema kporuc memusunggema mebisia.

⁷ Imoc yofi mengerebisia, fua noboc nobocac kporuc yohockang mema wi nericyurugec tarecde.

⁸ Nga masecngakpiac fadeng, imocac masecngakpiac kporuc mema kporuc imocngo megec mocgungoc ambesera. Imoc ifingoc witic dorong, giweng nga sacsac amma linenwitic pososoc yumuyumuyango mebisia.

⁹ Ge oniks hoc yohockang mema imocac witiau Isracel medacfora yeneac kpacngina mendzicbesena.

¹⁰ Imoc fingecgecsoc hoc mong imocac witiau siks yeneac kpacngina ohoma mong imocac witiau siks yeneac kpacngina ifingoc ohobesena.

¹¹ Imoc mendzic mendzicngic yeneng kpac meserigecdeac kibi hocfu mendzicande, ifi isoc hoc yohockannu Isracel medacfora yeneac kpacngina mendzicbesena. Mendzicma hoc imoc gombunga faiyuruma witic golngo mudzema yerecgedacma mendangyurubesena.

¹² Ge masecngakpiac fuayaac kporuc witiau hoc yohockang imoc faiyuruna Isracel medacfora yeneac negensigec febeso. Anu Aharon ye negenu feudeac kpacngina imoc Kebuac kicfu tofohokecbeso.

¹³ Nga imocac witiau witic golngo mudzena witic mocgu ambeso.

¹⁴ Mudzema goltegengngo seng yohockang mema witic isoc yumuyuruma witic mudzenec imohai mendangyurubesena.

Mokucac kasoac dederecgeyoac

¹⁵ Nga yoacfu yoac isinggema desigecdeac mokucac kaso mong mebesena. Imocac kporuha masecngakpiac kporuc isoc golwitic nga witic dorong, giweng nga sacsac amma linenwitic pososoc yumuyumuyango kporuc memusunggema mebesena.

¹⁶ Mema kpouna yohockang anu tegia neackpac yeni socfungoc anggec hereanginaac dzerat kpete mocgu nga odahaac dzerat kpete mocgu ambeso.

¹⁷ Ammanu hoc areng neackpac witiau mendanggema faibesena, areng wi imohai hoc kpacngina rubi, topas nga beryl hoc, imoc faibesena.

¹⁸ Areng imocac bageau imohai tukos, safir amma emeralhoc faibesena.

¹⁹ Nga areng imoc yereac bagengirau imohai yasint, agat amma ametist hoc faiyunubesena.

²⁰ Amma areng emu imohai krisolit, oniks nga yasper hoc, imoc yeni gol mudze mudzeaac manau faiyununa tacbisia.

²¹ Nga hoc imoc Isracel medacfora twelf yeneac kpacnginasoc mendzicbesonga. Amma twelf anggec hoc tembuc tembucfu kisicfocngina twelf yeneac kpacngina sasawa minginaac kpac hocfu mendzicyunubesena. Hocfu kibi mendzicma kpacngina imocngo meseriandae, ifi fingecma tembuc tembuc tackembeso.

²² Nga mokucac kasoac witic goltegengngo mudzema seng meyurubesena, witic yumuma mudzeandae ifi isoc meyurubesena.

²³ Nga mokucac kaso imocac kambac kambac yohockang golngo mema kasoac tuturung yohockannu faibesena.

²⁴ Nga witic yumuyumuya yohockang golngo memea mokucac kasoac tuturunnu kambac kambac yohockanggac manau mendangyurubesena.

²⁵ Anu witic yumuyumuyaac tosea yohockang imoc kpetiac uaac masecngakpiac kiwaubigeng fuaac kporucfugeng wiac mudze mudzea yohockannu mendangyurubesena.

²⁶ Mendangyuruma kambac kambac yohockang monggoc golngo mema mokucac kasoac tuturung yohockang eng tacdape tegia masecngakpiubigeng faiyuruma meketahebesena.

²⁷ Nga golngo kambac kambac yohockang mema imoc masecngakpiac fuaac kporuc emu kiwaubigeng, imohai masecngakpi fadeng witiau torokpegecde imohai mendangyurubesena.

²⁸ Nga mokucac kaso imoc masecngakpiunac mi fotockeudeac kaso kambac kambacfusing witic kuneng yumuyumuya dorongngo masecngakpiac kambac kambacfusing masecngakpiac fadennu wi dzegegec tacbeso.

Aharon womong kpetiac manau

²⁹ Anu Aharon ye kpetiac womonnu enude, imohai Isracel medacfora yeneac kpacngina imoc yoac isinggema desigecdeac kasou woucboraac witiau heima kpetiac amau engkecbeso. Imoc Kebungo yeneac negenu fekefudeac yeac kicfu tatahoc heikefude.

³⁰ Nga yoac isinggema desigecdeac kasou urim nga tummim faiyuruna Aharonggac woucboraac witiau mama nammaec ye Kebuac kicfu kenude. Ifi anu ye imoc woucboraac witiau heima kecma Isracel medacfora yeneac yoac isic isingge imoc Kebuac kicfu tatahoc kecengkecbeso.

Ngakpi dorong hereaac dederecgeyoac

³¹ Anu masecngakpiac bageau ngakpi herea imoc kporuc kibia dorongagocngo hafoangoc mebesena.

³² Nga oruc enudeac wi botuhau singagoc mema tegia mi tegerudeac kporucmemengicngo titingau kporucngo tegia mong mema yerecgema kpebibeso. Imoc wasaingicac aiengngakpiac tegia ifia isoc ambeso.

³³ Nga ngakpi herea imocac tegiau emubigeng wiac yofi faibesena, pommegranat icgbomeaac onga witic kibia dorong, giweng nga sacsacngo mema yerecgema wesic golngo memea botucnginau faikembesena.

³⁴ Imoc yofi mebesena, wesic golngo memea mocgu nga pommegranatgbomea mocgu nga monggoc wesic golngo memea mocgu nga pommegranatgbomea mocgu nga wesic golngo memea mocgu imocac tegiau emu kporucfu hafoangoc yerecgedacbisia.

³⁵ Anu Aharon ye enactofoc tofoho ua meudesoc ngakpi imoc heima mana kpetiacfu Kebuac kicfu engemmama anude, naso imohai udumenga negenggecde. Ye kemeere anudesoc ifi amma mi homeude.

Kebuac kpetiacngic

³⁶ Nga ge wiac dabac dabac efea mong goltegengngo memea pirac pirac mena minginango kpara meseriudeac hocfu mendzicandae, ifi isoc imohai kibi yofi mendzicbesena, Kebuac kpetiacngic desi desia.

³⁷ Nga imoc witic kibia dorongngo mema duyaac mesuyaubigeng meserima faina tacbeso.

³⁸ Imocngo Aharonggac mesuu takecbeso. Imoc yofiac, Isracelngicngac yeni kopocsic goa meficgema ubangerecac wiacngina kpetiac faigec yeng kopocsic imocac ebic tofohoudeac Kebungo sesengina hemma negenu ngereebeso.

Ngakpi herea nga du amma fadenggac dederecgeyoac

³⁹ Anu linenwitic pososocngo kporuc kibi kibi memusunggema ngakpingina mana mena. Nga ge orucac du linenkporucngo mema fadeng mong kporuc kibi kibingo memusunggebesena.

⁴⁰ Nga Aharon medacfora yeneac ngakpi mana nga fadeng amma du imoc mena heigec eweheihei meficgeyemmebisia nga siricngina gombunga ambeso. Medacma imoc dacga Aharon nga medacfora heiyemmena kemebeso.

Womonggareng anggecdeac desi desiac yoac

⁴¹ Heigec kemeu kerecdokungo nadzicyemmena yeni neac womonggareng ua megecdeac deseriyemmebesena amma yeni kpetiac anggecdeac desiyunubesena.

Dzeiac dederecgeyoac

⁴² Nga ngakpi manau senggangngina semegecdeac dzei linenkporucngo memea bunginaunac mama tabunginau maudeac mebesena.

⁴³ Anu Aharon nga medacfora yeni Kebugoc ewacemeemeac kporucamau kenggecdesoc me womonggareng ua megecdeac arata mewegenegecde, naso imohai dzei imoc heima kengkecbisia. Yeni kopocsicac turung mema homebauac ifi angkecbisia. Singseria imoc Aharon nga fingecsahea fingecenggecdesoc yenearu feengkecbeso.