Makekeng 25 - Deduamiti

Kporucamaac dederecgeyoac

¹ Kebungo Mose yoac yofi edeec.

² “Ge kemema Isracel ngicngacareng sasawa yofi edeyununa, ‘Ngeni heresongongina fedesoc seseac wiac kpedzucnema nearu mehadacbisia.’

³ Amma sese dema wiac yomoc ngemmegec mebisia, gol, silwa nga aieng sacsac

⁴ nga witic dorong, giweng nga sacsac, linenwitic pososoc amma noning dzoeya.

⁵ Nga ramangiwaac sebera sacsac amma dolfin kondungyanggac sebera amma akasia ic.

⁶ Nga kifaac kerecdoku amma wiac hosogecdeac kerecdoku nga hosuc homungkerengagoc dema semeng uaunac wiac homuna gombunga.

⁷ Amma sesememengicac kpetiac uaac masecngakpiu nga mokucac kasou hoc faigecdeac oniks hoc nga hoc goa seria buma kuneng.

⁸ Anu botucnginau naric kecbadeac yeni neac womong kpetiac mong megec.

⁹ Ni kporucwomonggac ongea nga wiara sasawaac ongea edzacgubeso anduae, ge ifia isoc yombong mebesena.”

Dzadzahac katapaac dederecgeyoac

¹⁰ Anu akasia icngo katapa mong megecde, imocac hereaya kubit kpete yohockang nga noboha, odahaac kubitkpete imoc mocgu nga noboha, hongaac kubitkpete imoc mocgu nga noboha.

¹¹ Amma manau nga ngadeu goltegengngo gborockema wi tegia mong golngo mena yerecgebeso.

¹² Amma gol gerea hetinggena patatakeu katapaac kambac kambac neackpac imocngo mema hania neackpac faiyunubesena, yohockang tegia noboc nga yohockang noboc.

¹³ Amma akasia icngo tofoya mema imoc golngo gborocyurubesena.

¹⁴ Tofo imoc katapa tofohogecdeac tegiau kambac kambac manau sineyuruna kemeecde.

¹⁵ Nga tofo imoc ine nasosoc katapaac kambac kambac manau takecbesera, imoc imohacnac mi meickebesonga.

¹⁶ Ni Kebungo wiac heigboringemmekecduaeac wiac gemba geng imoc katapa imocac manau faibesena.

Tapea

¹⁷ Faima goltegengngo tapea mong mebesena. Imocac hereaya kubitkpete yohockang nga noboha ambeso amma odahaac kubitkpete imoc mocgu nga noboha ambeso.

¹⁸ Ifi faima hamango gol heimengere amma keruw onga yohockang mema tapaac witiau tegia wegenac imocac witiau noboc noboc faiyurubesena.

¹⁹ Keruw onga mong imoc tegia wegenac monggac nga mong imoc tegia wegena monggac ifi faiyurubesena. Tapeau tegia tegia ifi faiyuruna tacbesera. Imoc mefosoeyuruna yeri katapaac tapeagoc mocgu ambesera.

²⁰ Tacma kpegangngirango katapa semebesera nga kicmesungirango katapaac tapea hemma engemma tacbesera.

²¹ Ge katapa witiau tapea faima katapa manau Kebungo wiac heigboringemmekecduaeac wiac hania hania gembade, imoc imohai faina kemema fekecbeso.

²² Anu keruw onga yohockang Kebungo wiac heigboringemmekecduaeac katapaac witiau tacdape, ni yereac botucngirau gegoc ewacma yoac denegeng ambade. Ni imohai yoac dederecge anggemba geng Isracel medacfora dederecge imoc ayemmebesena.

Tatacac dederecgeyoac

²³ Ge akasia icngo tatac mong mebesena, imocac hereaya kubit yohockang nga odahaac kubit mocgu nga hongayac kubit mocgu nga noboha.

²⁴ Ifi mema goltegengngo gborockedacma tegiaac witiau areng golngo mena yerecgedacbeso.

²⁵ Amma ge tatacac tegiau parang mong mena imocngo marimedaha budong nga dzegaric yereac yapangngiraac kpete isoc amma tatac yerecgedacbeso. Nga imocac tegiau ngebaha golngo mema faina yerecgedacbeso.

²⁶ Ge tatacac kambac kambaha golngo memea imohai tuturunga neackpac ifi haniau wi faidacbesena.

²⁷ Kambac kambac yeni parang tegiau menec imocac wegenacfu wi faibesena. Imoc tofohogecdeac tofo imohai sineyuruna kemeecde.

²⁸ Ge akasia icngo tofo mema golngo gborocyurudacna imocngo tatac tofohobisia.

²⁹ Nga teraya, sokoha kuneng nga seseac doku hetinggegecdeac kpakenec kuneng amma kpakenec kapia, imoc sasawa goltegengngo mebesena.

³⁰ Anu tatac witiau icsogong kpara Kicmesuna ngeneac botucfu kecde, imoc neac hoannu tatahoc faina takecbeso.

Kifanananggac dederecgeyoac

³¹ Anu goltegeng mema kifanananga mong hamango heimengere amma mebesena. Imocac hania nga kebanga, sokoha nga gbomea amma dzuria imoc gol wiac mocgungosac mema kpefosoeyununa wiac mocgu anude.

³² Nga fawa siks kebangaunac erema tacbisia, noboc harebec nga noboc harebec.

³³ Amma fawa warac warac imohai sokoc harebec almond dzuriaac siriha mocgu mema fawa mocguu faibisia. Amma imoc sasawau gbomea mocgu nga dzuria mocgu ngadeau yerecgedacma dzuria faibisia. Fawa imoc sokoc harebec almond dzuriaac siric isoc fawa monnu ifingoc faibesonga. Ifi faigec ic maria ngadeau yerecgema dzuria haniaac kebangaunac fawa siksfu eredacbisia.

³⁴ Nga kifa kebangau sokoc neackpac almond ic dzuriaac siric isoc imocac gbomea nga dzuriagoc tacbeso.

³⁵ Nga kifa kebanga nga fawa warac warac meficemedae imohai gbomea faina imoc kebanga nga fawagoc kpefosoema mocgu andacbeso. Imoc ifi isocngoc fawa siksfu mebesena.

³⁶ Nga gbomea nga fawangina sasawa wiac mocgu anudeac amma goltegeng mema hamango heimengere amma kpefosohegec wiac mocgu ambeso.

³⁷ Miackema kifaya sewen mema miacyunuma tatacnginau faigec mana kifanananggac hoannu mekperagibisia.

³⁸ Nga kifaac fitacgedanga nga teratoaya ifingoc goltegengngo mebesena.

³⁹ Nga wiac sasawa imoc kikkarkpete mocguacsoc goltegengngo mebesena.

⁴⁰ Ni tikiu imocac onga edzacgudarai, ge siricngina imoc yombong modacma wiac sasawa medacnadeac henghomema mebesena.