Makekeng 24 - Deduamiti

Kebugoc dzadzahac anggec

¹ ANU Kebungo Mose yofi edeec, “Ge Aharon, Nadaw nga Awihu amma Isracel enarafocngina sewenti yenigoc Kebu nearu erema hereau namma bangecfu fafoc heinemma ngonducnema fema eweheihei anembisia.

² Ammagec Mose ge tembucga Kebu neac hoannu habesena, ngic sewenti yeneng neac wegenacfu mi habisia. Amma ngicngac habutoa yeneng ifingoc gegoc mi erebisia.”

³ Ifi deu Mose ye ngicngacareng yenearu kemma Kebuac yoac nga dedesiyoac sasawa edeyunudarec. Edeyunuu ngicngacareng hafoangoc yeni sasawa uba mocgu amma dendzerenggema degec, “Kebungo yoac sasawa edegudac imoc tofohodacnide.”

⁴ Ifi degec Mose ye Kebuac yoac sasawa ohodarec. Ohodacma ama werec wereckenggac yacma tiki haniau kemma arata mong mema Isracelac kisicngina twelf yeneac kpete imocacsoc hoc twelfngoc gunungyunuu nanggec.

⁵ Ifi amma Isracel sebigboringic yeni sueyunuu kemma Kebuac sesegerec dema burumakangiwa faigec hafoangoc dzeec amma ruaeac sese yenahafoc neandae imoc momoc faigec.

⁶ Anu Mose ye sac tosea mema sokocfu kpakeu kemeu tosea mema arata witiau gigiec.

⁷ Ifi amma dzadzahac kibi mema ngicngacareng osoyemmeu negemma degec, “Kebungo edegudac yoac imoc sasawa tofohodacma modacdacnide.”

⁸ Ifi degec Mosengo sac mema ngicngachabu witinginau kpegima yoac yofi deec, “Negendae, Kebungo ngenigoc yoac sasawa dedzegeecmoc imocac dzadzahacac sac yomoc.”

⁹ Ifi amma Mose nga Aharon, Nadaw nga Awihu amma Isracel enara sewenti yeni tikiu enggec.

¹⁰ Emma Isracelac Anutu henggec, hanitabea bageau imoc wiac mong sing hocngo memea isoc nga siriha imoc safir hoc seria buma kuneng, ifiango memea. Nga imoc kurumenga kurumenga yeni isoc kongac koporarac kpema feec.

¹¹ Anu ye mariango Isracelac ngicenara mi yunuec. Yeni Anutu hemma tacma nenedoku negec.

Mose Sinai tikiu enec

¹² Anu Kebungo Mose edeec, “Ge nearu tikiu erema kecna singyoac seria nga dederecgeyoac tafe hocngo memea imohai ohoyaimoc imoc edekpou ayemmenadeac gembade.”

¹³ Ifi deu Mose ye enactofoc tofohongiha Yehosuac yerahafoc yacma Anutuac tikiu enoc.

¹⁴ Nga ngicenara yofi edeyunuec, “Ngeni nereac tomai yomohai kecmagec neri kemma ngenearu monggoc dzigene hadede. Amma Aharon nga Hur yeri ngenigoc momoc yei kecgecde, imocac wiac goaac ebicyoac fedeu imoc ngeni yerearu mekembisia.”

¹⁵ Ifi dema ye yacma tikiu enu hoengngo tiki medzickeec.

¹⁶ Medzickemanu Kebuac kibikperagingo Sinai tikiu mama femanu hoengngo tiki biranggema feu wenac siks wisickeu wenac kpete sewen ihai Kebungo hoeng manaunac Mose kparec.

¹⁷ Anu Kebuac kibikperagingo tiki bumau Isracel medacfora yeneac kicfu gerec isoc dzema feec.

¹⁸ Femanu Mose ye hoeng manau tikiu emma hadzing tofocnac foti ihai kefec.