Makekeng 20 - Deduamiti

Anutungo nonoyoac yemmeec

¹ Anutungo yoac yomoc sasawa deec.

² “Neng Kebu geac Anutu. Ni Aigitabangecfunac wangecguyai. Aigita yeneng wanac meguma ua ebirau faigugec ama imohacnac wangecguyai.

³ Ge ni hoannukecma nemuonga nga anutu hania hania mi hoangyunukecbesena.

⁴ Wi kurumennu wiac fekende me imocac bageau bangecfu me dokuu me emu bangec manau wiac fekende imocac nemuonga mong me onga mong geanggaoc mema mi hoanggekecbesena.

⁵ Ge imoc yeni mi ngonducneyemmebesena amma yeneac enac mi tofohobesena. Nocac ni Kebu geac Anutu, ni ngicngacfocna heresongogoc hoangyunukecduaeac yeneac keracmangang kpetiac amba herenau gerec dzede. Mong ye ni ubango ukunuudeu manggac yeneac kopocsic imocac turunga naroangmedac esangabofocngina fingecenggecdesoc arenga harebec nga neackpac kpouyemmebade.

⁶ Nga mong ye heresongogoc hoannuma dedeseriyoacna tofohoudeu fingecsahe tauseng nga tauseng fingecenggecdesoc, yenigoc yoac dzegeai imoc modackecbade nga modacma kecbesandua.

⁷ Ge Kebu Anutuga yeac kpac eng sicsauc mi kpacbesena. Imoc yofiac ngicngac yeni yeac kpac eng sicsauc kpacandae ye kopocsicnginaac turunga mi waude.

⁸ Ge tacnegenggac wenac segerema kpetiac mekecna kpetiac anudeac negenna febeso.

⁹ Imoc yofiac, ge wenac uameme siks ua mema uaga sasawa medacbesena.

¹⁰ Nga wenac kpete sewen imoc Kebu Anutuga yeac tacnegennaso. Ge nga naroangmedacfocga nga enactofoc tofohofocga ngic me ngac yeni nga burumakafocga amma ngic kuricngo amagau kecdae ngeni naso imohai ua mong mi mebisia.

¹¹ Kebu ye wenac uameme siks ua mema kurumenga kurumenga nga bangec nga kondung amma wiac yeneac manau fekendacdae imoc meficgedarec nga wenac kpete sewen imohai tacnegenec. Imocac Kebungo tacnegenggac wenac kenehema segerema kpetiac annideac desiec.

¹² Anutungo bangec gemma faiguude, imohai naso herea kechereenadeac nonggomanghocga seseheyurubesena.

¹³ Ge ngicngac mi yunuhomebesena.

¹⁴ Ge eweenengfaka femanu ferahama serofaka mi ambesena.

¹⁵ Ge wiac hamangec mi mebesena.

¹⁶ Ge ngic me ngac gegoc wegenac kecde ye enacfu faifai mi ammibesena.

¹⁷ Ge yeac ama hemma imoc hensongo mi ambesena. Ge ngic yeac enema hemma ye hensongo mi ammibesena, me yeac enactofoc tofohongiha me enactofoc tofohongaha hensongo mi ammibesena. Amma ge burumakangiwa me donggi me wiara hania hania yenemma imoc hensongo mong mi ambesena.”

Geng yoac edenunubesena

¹⁸ Anu ngicngac yeni sasawa ginggbururung, piratac nga trampet udumeng heima feu negemma henggec tiki hosuc kpeu wiac imoc sasawa hennegeng amma kengec kuneng yunuu dzonongngina fedeu monggoc kpesikehema nanggec.

¹⁹ Namma Mose yofi edegec, “Geng yoac edenununa negembisina. Kecma homebinggac Anutungo ine yoac mong mi edenunubeso.”

²⁰ Ifi degec Mosengo ngicngac yofi edeyunuec, “Mi kengecngunuu, ngeni Anutuac damungunuu kopocsic mi meficgegecdeac ye haniangina hennegeng anudeac ngenearu hadac.”

²¹ Ifi deu ngicngac yeni tihereema nammagec Anutungo hoeng kundung dzicnambac imocac manau taru Mose ye imohai kenec.

²² Kenu yofi edeec, “Ge Isracelngicngac yofi edeyununa, ‘Ni kurumennunac yoac ngenigoc deba madacdac imoc ngeni ngenaoc hennegeng andau.

²³ Ngeni ni hoannukecma anutu dema nemuonga silwa me golngo memea mi meyunuma hoangyunukecbisia. Amma anutu dema nemuonga golngo memea imoc mi mebisia.

²⁴ Nga arata menennade imoc bangecngo mema imocac witiau sesega hafoangoc dzeudeac fainade nga ruaesesega hafoangoc ngenahafoc neandaemoc amma ramaburumakagedangga ohonembesena. Neng amabangec mong ihai me ihai kpacna negensima afenunadeac degembade, imohai gearu hama kenecgubade.

²⁵ Nga ge arata mong hocngo menennadeac negemma ine hoc dzake dzakea aiengngo memea imocngo mi mebesena. Ge hoc aiengngo kpeserenadeu ge imoc ammina kpetiac mi anude.

²⁶ Nga ge neac aratau enna senggangga mi hembauac tire tima mi embesena.’