Makekeng 18 - Deduamiti

Yitrongo Mose yuguckeec

¹ Anutungo Mose nga Isracel ngicngacfora meficyunuma yenearu faka sasawa medarec amma Kebungo Isracelngicngac Aigitabangecfunac wangecyunuu magec, imocac siduc Mose yofea, imoc Midyanbangecfunac sesememengic kpara Yitro, yeng negendarec.

² Anu Mosengo warac enema Tsipora nga medachora faiyunuec. Nga ye mamaac amau monggoc dzigenegec. Anu Yitro ye siduc imoc negemma yeni wangecyunuu Mosearu kenggec.

³ Nga medaha mong yofi dema Geresom kparec, “Ni bangec furiau kuric kecduae.”

⁴ Amma yofi negemma mong Elicedzer kparec, “Mannaac Anutungo meficnuma Parecoac dzikacbeannunac onggonnuec.”

⁵ Nga yofea Yitro ye Moseac enemmedacfora hesicyunuu kengkecma bangeckisiu Anutuac tikiu Mosengo kporucamayau tacyac anecfu, ihai kensikegec.

⁶ Sikema Mosearu yoac yofi dema fau kenec, “Ni yofoga Yitro, ni nga enemmedacfocga neni gearu hama kecdimbe.”

⁷ Ifi fau Mose ye yofea meficgeudeac kenec. Kengkecma meficgema ngonducnemima titikokoc ammiec. Anu yeri wenacngerec angemema kporucbedzoyaac manau enoc.

⁸ Emma Mose ye Kebungo Isracel yeneac amma Pareco nga Aigitangicngac yenearu faka sasawa meec imocac yoacsiduc yofea ammidarec. Amma sinnu kemmagec ebic hania hania sasawa kucngina memaudeac fingecyemmeu Kebungo ebic imohacnac onggongyunuec imocac siduc momoc ammiec.

Kebu ye engenatoa

⁹ Nga Mose ye Kebungo Isracel gombunga yombong ayemmema Aigita maringinaunac yungecyunuu kenggec, imocac siduc sasawa Yitro ammiu ubangerec negemma sogac sogai anec.

¹⁰ Amma yofi deec, “Kebu kenehebisina! Yeng Aigitangic nga Pareco yeneac mariunac mesiyunuu komoc kpegec, ye ngicngac yomoc Aigita yeneac mariunac mesiyunuec.

¹¹ Ni yaguc negenduae, Kebu ye engenatoa, ye nemuonga nga anutu hania hania feracyunude. Imoc yofiac, Aigita yeni sebiengeng amma ngicngacareng yomoc faka mangana yombong ayemmegec yeng yeneac mariunac yungecyunuu kenggec.”

¹² Anu Mose yofea Yitro ye Anutuac sese mong mehau gerecfu hafoangoc dzedarudeac yemmeu seseyang goa houma tosea faigec. Fau Aharon nga Isracel enarafocngina sasawa yeni ifingoc hama Anutuac kicfu Mose yofeagoc yaka negec.

Moseac desi desiua

¹³ Anu ama wereckenu Mose ye ngic yenearu desi desiua meudeac tatac heima tarec. Tacmanu ngicngac yeneng asoacngoc hama yeac kicfu oronggema nanggec marai anec.

¹⁴ Nga Mosengo ngicngac yenigoc ua sasawa mema kefu yofea ye imoc hendacma yofi deec, “Ge ngicngac yenigoc noc uaareng mema kecnec? Amma ge nocac tembucga tacmana ngicngac yeni asoacngoc hama geac kicfu nangkecmagec ama toforede?”

¹⁵ Ifi deu yoac turunga yofi meremmiec, “Ngicngac yeni Anutuarunac negen negeng megecdeac nearu hadae.

¹⁶ Yeni yoacngina mong botucnginau fedeu hagec neng yoacngina isinggema desima Anutuac singseria nga desi desiyoac dekperagiyemmeanduae.”

Yofeango areng edzaheec

¹⁷ Ifi deu yofeango deec, “Ge uaga menec imoc gombunga mi arenggedang.

¹⁸ Ngeni ifi anggec geac kuc nga ngicngac gegoc kecdae, yeneac kuc imoc kpac yombong anude. Ua imoc ebiria yombong anu geac kucga ferahede, ge imoc tembuc menadeac siriha mi annec.

¹⁹ Ni yoac goa derecgegemma areng edzacguba negenna, ge ifi ammana Anutungo gegoc kefude. Geng ngicngac yeneac amma Anutuac kicfu kemma yeneac yoac sasawa edebesena.

²⁰ Ge ifingoc singseria nga desi desiyoac kpouyemmena nga yeni kekecngina dafi kecma imoc modacma noc ua megecde, imoc momoc dekperagiyemmena.

²¹ Nga mong yofi, ge ngicngac sasawa yeneac botucfunac ngic yofia segereyunuma meisingyununa, ngic negen negentegec nga angammemengina gombunga feyemmede amma Anutuac damuyunude. Yoac edeyunugec imoc modacyombonggegecde nga goa yeneng wiac ikoc amma megec yeni imocac modzongina tiande. Ngic ifia meisingyunuma ngicngac yeneac enarafocngina faiyunubesena. Goa yeni ngicngac tauseng dafiguc garengyunubisia, goa yeni handred dafiguc yeneac gareng kecbisia nga goa yeni fifti dafiguc garengyunubisia amma goa yeni ten dafiguc yeneac enara kecbisia.

²² Kecma yeni nasosoc ngicngac isingyunuma yoacngina desiyemmebisia. Yoac ebira sasawa imoc ine gearu faidacbisia, nga efea imoc yeni yenaoc desorongaiyemmema desidacbisia. Ifi amma yeni yoacac ebic noboc meficguma tofohogec uaga efaude.

²³ Anutungo uayoac imoc dederecge anggenude nga ge ifi annadeu imoc naric serima mema kecnade nga ngicngac yomoc yeni sasawa ubaefacgoc bangecnginau kenggecde.”

Ngicenara faiyunuec

²⁴ Ifi deu Mose ye yofeango yoac ededarec isoc, ifi yombong negentofoho andarec.

²⁵ Ye Isracel hafoangoc yenearunac ngic ua megecdeac negen negeng gombunga feyemmeec ngic imoc segereyunuma meisingyunuma uayoac yemmema ngicngac yeneac enara faiyunuec, goa ngic tauseng dafiguc yeneac enara, goa ngic handred dafiguc yeneac enara, nga goa ngic fifti dafiguc amma yeni goa ngic ten dafiguc yeneac enara faiyunudarec.

²⁶ Ngic imoc yeni nasosoc ngicngacareng botucnginau desi desiua megecdeac faiyunuec. Yeni ngicngac yeneac desi desiyoacac obohoma yearu faigecdeac edeyunuec nga soha negentegecgec imoc yeni yenaoc desigecdeac deyemmeec.

²⁷ Wisickeu ye yofea fau monggoc bangehau dzigenema kenec.