Makekeng 16 - Deduamiti

Yaka nga neng meficgeyemmeec

¹ Anu Isracelkpebung hafoangoc yeni Elim wama kengkecma bangeckisiu bangec mong, kpara Sin, ihai kensikegec. Sin bangec, imoc Elim nga Sinai botucngirau fede. Yeni Aigitabangec wama kengkecma afo yohockang imocac uameme fiftin ihai kensikegec.

² Anu Isracelkpebung hafoangoc yeni bangeckisiu Mose nga Aharon yereac ubakpekpeyoac homac deyecmema

³ yofi edeyurugec, “Neni Aigitabangecfu kecmina Kebuac maringo nunuu homeni ngereebac. Ihai birikenninau yang ohoma tacma yaka homac fenemmeu negebec amma kefing. Nga ngeri nocac yeac kpebung hafoangoc yomoc neni yakaac homema kecma homedacnideac bangec kisi yomohai wangecnunuec hama kecdimbe.”

⁴ Ifi degec Kebungo Mose yofi edeec, “Negennec, neng deba icsogong kurumennunac kiadzimbong isoc makefude. Mau ngicngac yeni wenacsoc yaka neandae, imocacsoc wenaha wenaha kemema mekpedzuc ambisia. Ifi ammagec ni faka imohai yeni singyoac seria edeyunuai, imoc modacma kecdae me kpac, imocac hania hembesare.

⁵ Nga wenac kpete siks imohai yaka mekpedzuc amma imoc ohomengere anggec imocngo wenacsoc meandae, imocac siriha ferahama uameme yohockanggacsoc anude.”

⁶ Ifi deu Mose nga Aharon yeri Isracelngicngac sasawa yofi edeyunuoc, “Kebungo noc Aigitabangecfunac yungecngunuu hagec, ngeni imoc negentegecgecac yeng imoc ama toforebeso ammanu edzacngunuu hentegegecde.

⁷ Ngeni Kebuac ubakpekpeyoac demima kecdae, imoc yeng bic negendacac ama werec wereckenggac yeac kuc kibikperagiagoc henggecde. Nerinec ngictehec nga ngeni nereac ubakpekpeyoac dedae, imoc mi ngereede.”

⁸ Ifi dema yofi deoc, “Ngeni Kebuac ubakpekpeyoac demigec yeng imoc negendacac ama toforebeso anu wiac fusingina songeagoc ngemmema ama werec wereckenggac icsogong ngemmeu negebec anggecde. Nerinec ngictehec nga ngeni nereac ubakpekpeyoac dema mi anecmedae, ngeni Kebu emmidae.”

⁹ Ifi dema Mosengo Aharon edeec, “Ge kemma Isracelkpebung hafoangoc yofi edeyununa, ‘Kebungo ubakpekpeyoacngina negendacac ngeni yeac kicfu hama fingecmibisia.’ ”

¹⁰ Anu Aharon ye Isracelkpebung hafoangoc yoac edeyunuma nammanungoc yeni bangec kisiubigeng kic figec kenu Kebuac kuckibikperagia hoeng manau fingeru henggec.

¹¹ Hemmagec Kebungo Mose yofi edeec,

¹² “Ni Isracelngicngac yeneac ubakpekpeyoac bic negenduaac ge yofi edeyununa, ‘Ama marai anu wiac fusingina songeagocngo hangemmeu negecde nga ama werec wereckenggac icsogong negebec anggecde. Ifi amma ni Kebu ngeneac Anutungina imoc negentegecgecde.’ ”

¹³ Anu ama toforebeso anu koneng neng gurugoc hama kporucamabangecngina semegec nga ama werec wereckenggac songorocngo bangec semema yerecgema feec.

¹⁴ Nga songoroc gbanggeu wiac kapic kapic kondungyang sekeha efea yombong nga pereckea ifia isoc henggec bangeckisiu tackenec. Wiac imoc nomang manau ais isoc efea anec.

¹⁵ Nga Isracelngicngac yeni hemma imoc noc wiacngo ande, imocac obohoma yenaocngoc yofi dekpesi angemegec, “Imoc noc wiac?” Ifi anggec Mosengo yofi edeyunuec, “Imoc icsogong, Kebungo imoc negecdeac faidac.

¹⁶ Nga Kebungo wiac imocac yofi dederecge angemmede, ‘Ngeni tembuc tembuc sasawango yaka imoc negecdeac socngina socngina mekpedzuc ambisia. Amma kporucamanginau ngicngac naroangmedac feyac angandae, yeneac kpetengina modacma ama mingina sasawango omerkpete mocgu ngicngac mocgu mocguacsoc ifi mebisia.’ ”

¹⁷ Ifi deu Isracelngicngac yeni ifinoc anggec, goango efea goango homac, ifi mekpedzuc anggec.

¹⁸ Mema kpetea netec betec henggecdeac omerkpeteu faigec kemeu yofi fingerec, yeni tembuc tembuc sasawango mekpedzuc amma homac megec yeneac yaka imoc ine omerkpetengina mi wakeyombonggeec nga efea megec yeneac omerkpete soha yombong anec. Ifi amma yeni herenginaacsoc yaka imoc kpedzucnegec.

¹⁹ Anu Mosengo yofi edeyunuec, “Mongngo wereckenu asoacac negemma mong mi fau tacbeso.”

²⁰ Anu goango Moseac yoac negentofoho mi amma maunga wagec tacmanu ama werec wereckenggac kamango kiu hoaema homuna fiec. Ifi anu Mose ye ngaba ayemmeec.

²¹ Anu wenacsoc amanegeng anu yeni tembuc tembuc sasawango herekeracnginaacsoc manyaka mekpedzuc ammagec wenac erema seriu sisingaima kpac angkefec.

²² Nga wenac kpete siks imohai ine wenac goau manyaka megec, imocac siricfu torokpema tembuc tembuc sasawaacsoc omerkpete yohockanggacsoc mekpedzuc anggec. Ifi anggec ngicngachabu enarafocngina sasawa yeni Mosearu kemma edegec.

²³ Edegec yofi edeyunuec, “Kebungo imocacnoc yofi deec, ‘Wereckenu tacnegennaso, imoc Kebuac tacnegeng kpetiac. Imocac ngeni dzegoc ohobeso dema dzegoc ohogec me dokugoc ohobeso dema ohogec. Nga tosea taru imoc sasawa wereckenuac negemma faigec tacbeso.’ ”

²⁴ Anu yeni Mosengo dederecge ayemmeec, imocac siricfu mema asoacac negemma manyaka faigec tarec imoc homuna mong mi fiec amma ihai kama mong mi fingerec.

²⁵ Ifi anu Mosengo yofi deec, “Ngeni yaguc imoc nebisia. Nga yaguc Kebuac tacnengennaso andeac ngeni yaguc ngadeau bangecfunac mong mi meficgegecde.

²⁶ Ngeni wenac uameme kpete siks imohai manyaka mekpedzuc angkecbisia nga wenac kpete sewen, imoc tacnegennaso, imocac imohai mong mi fingecma feude.”

²⁷ Anu ngicngac goa yeni ine sifu wenac kpete sewen ihai mekpedzuc anggecdeac kemma hofocgec.

²⁸ Ifi anggec Kebungo Mose yofi edeec, “Isracelngicngac ngeni nasoherec kecma dederecgeyoacna nga singyoacna seria wama negentofoho mi angkecdae. Ngeni fakangina mangana imoc bic wabisia.

²⁹ Negendae, Kebu nennoc tacnegennaso meficgengemmedua, imocac wenac uameme kpete siks ihai icsogong wenac yohockanggacsoc faingemmeduae. Faingemmeba wenac kpete sewen ihai ngicngac tembuc tembuc sasawa ngeni amasobengnginausac tacbisia, imohai mongngo amasobenga wama monnu mi kembeso.

³⁰ Ifi deu ngicngac yeni wenac kpete sewen imohai tacnegeng anggec.”

³¹ Anu Isracelngicngac yeni wiac imocac kpara manyaka kpacgec. Imoc koriandergbomea ifia isoc nga kongac kongac amma negec imoc icsogong efea songea hanifosoc, ifi isoc anec.

³² Anu Mosengo yofi deec, “Kebungo dederecge yofi anemmeec, ‘Ni Aigitabangecfunac wangecngunu mama bangeckisiu icsogong gumecngunudua imoc fingecsahengina fingecenggecdesoc yeneng henggecdeac ngeni yaka imoc gomerkpete mocgu mewakema faigec tacbeso.’ ”

³³ Ifi dema Aharon yofi edeec, “Fingecsahengina ngade fingecenggecde yeneng henggecdeac negemma ge enang mong tapeagoc mema ihai omerkpete mocguacsoc manyaka kpakena kemeu imoc Kebuac kicfu faigec tacbeso.”

³⁴ Anu Aharon ye Kebungo Mose dederecge ammiec, imocac siricfu amma Kebungo wiac heigboringemmekecduaeac wiac, imocac fanihau fau tarec.

³⁵ Nga Isracelngicngac yeni ine manyaka nema kengkecmagec kifa foti wisickeec. Yeni ngickekecfu kensikegec imohai manyaka kpac anec. Yeni manyaka nema kecma Kenacanbangecac ma fekende ihai kensikegec.

³⁶ Anu omerkpete mocgu imoc ten faigec efakpete mocguacsoc fingerude.