Makekeng 15 - Deduamiti

Dedengerecyegec

¹ Naso imohai Mose nga Isracelngicngac yeni Kebu afehema yegec yofi heigec, “Kebungo firang amma ngabafora feracyunudacma kpactoayagoc andeac ni eriendzong memibade. Yeng becosic nga ngic becosic witiau tacgec kpefacyunuu kondung manau kemegec.

² Kebu ye kucna nga yegecna amma yeng onggonnuec. Ni ye dengerekecbade yennoc Anutuna, ye kpac kuneng mibade, ye mannaac Anutu.

³ Kebu ye wasaingic seria, ye kpara Kebunoc.

⁴ Ye Parecoac keretac nga wasaingicfora habuya habuya kondunnu ukuyunudarec. Parecoac dzikacngic enarafora meisingyunuyunuya yeni Kondung sacsacfu kemedacgec.

⁵ Doku keme kemeango semeyunuu hoc isoc emu yombong kemegec.

⁶ Kebu, geac marifoigaac kuc imoc damuyagoc yombong. O, Kebu marifoigango faka kuhagoc mema ngabafocga kpedzameyununec.

⁷ Kebu ge ngictau kucga engenango firang amma ngabafocga yunuhomenec. Ge herebugaac gerecborang mesima faina imocngo kemma kpindzingsiraac hania isoc yonohoec.

⁸ Geng samacgango fifina kondungdoku kperecgeu wi emma dindingac amma nanec. Siritembong yeni yacma oda isoc nanggec. Doku dzuamagoc kondung keme kemeau serima nanec.

⁹ Anu ngabafocnina yeneng yofi degec, ‘Neni kporacyunuma meficyununide. Neni wiacngina mema mederema emema mekecdacnide. Neni turung kpoukpou ayemmennideac anemmede, imoc yenearu mesinide. Neni wasaibeannina taima marininango kpetotieyununide.’

¹⁰ Kebu, ge firangga kpeudeac dena kondungngo semeyunuec. Yeni aieng ebira isoc emu dokutoa manau kemedacgec.

¹¹ O Kebu, nemuonga nga anutu hania hania yeneac botucfu ge isoc mong mi kecdae! O, ge isoc mong mi kecdae. Ge engenatoa ngictauac kucgagoc amma ge kpetiac. Ge damu damugagoc amma faka bibiagoc angkecnecac geac heiwayong anggemma yegec heigembesonga.

¹² Ge marifoiga sinena bangecngo gbokoyunuec.

¹³ Ge yoac dedzege amma imoc modackecnec. Ge faka imoc amma ngicngacfocga uaac ebicfunac bummeyunuma hesicyununa kenggec. Ge kucgango wangeckpeteng ayemmema kpetiac amagau faiyununec.

¹⁴ Anu ngicngacareng yeni imoc negemma dzonongngina fedeu Peleset bangec mingina yeni ubaongangina ebiriec.

¹⁵ Naso imohai edomngictaufora yeni bibictakpac takpacge anggec. Mocaw enarafocngina kucnginagoc yeni dzonongina fedeu kengecyunuec. Kenacan bangec mingina yeni sasawa sisingaima kpac andacgec.

¹⁶ Kengectoa nga bibictakpac takpacge ayemmeec. Mariga kuctoayagoc imocngo faka mena yeni hoc isoc kockpaha kpac nammagec habufocga yeni ferecgegec. O Kebu, ge geanggaoc ngichabu bummenununec nenennoc ferecgeding.

¹⁷ Nga ge wangecnunuma kemma geangga tikibangec yombonnu heihomec anemmenade. Ge geanggaoc tacyac annadeac amabangec mengerenec, yainoc geangga marigango ama kpetiac menec.

¹⁸ Kebu ye ngictautatac mekecde amma nasoya kpac meengkefude.

¹⁹ Kondunnu sing fingeru Parecoac becosic nga keretac amma wasaingicfora becosic witiau kenggec yeni sasawango imohai hagec, imohai Kebungo kondung deu dzigenema witinginau emma semeyunuec. Isracelngicngac neni ine kondung dzongiau bangec kerengau ferecgeing.”

Miryam ye yegec heiec

²⁰ Anu Miryam profetengac, ye Aharon naina, yeng tambaring mariau meu ngac sasawa yeni ye modacma tambaringngina mema kpema yegec fedegec.

²¹ Nga Miryamngo yegec yofi heiyemmeec, “Kebu ye firangngic engenatoa. Ye becosic nga wasaingic becosicfu tacgecmoc kondung manau ukuyunuu kemedacgec. Neni yeac yegec heimini.”

Bangec dokuya hodungagoc

²² Anu Mose ye Isracelngicngac Kondung sacsacfunac wangecyunuu Sur bangeckisiu kemma kecmagec uameme harebec anu doku mong mi meficgegec.

²³ Amma kengkecma Mara bangecfu kensikema doku meficgegec. Nga doku imoc hodungagoc anecac yeni imoc negecdeacsoc mi anggec. Imocac amma bangec imocac kpara Mara dedea.

²⁴ Amma ngicngac yeni Moseac ubakpekpeyoac homac demima yofi edegec, “Neni doku dahacnac nenide?”

²⁵ Ifi degec Mose ye Kebu kpacsambic ammiu Kebungo ic siriha mong edzahau ye imoc mema dokuu ukuu kemeu doku sawera anec. Kebu ye imohainoc singyoac nga dederecgeyoac edeyunuec amma imohai ifingoc tobangyunuec.

²⁶ Anu yofi deec, “Ge Kebu Anutugaac ubaudumeng negemma kecnadeu nga yeng negenu faka dindingac andacde, imoc angkecnadeu amma yeng dederecgeyoac edeguu ge kedzac kpema faka imoc tofohonadeu amma singseria sasawa tofohonadeu yofi negemma kecbesena, ni Kebu geac memengerec, imocac amma hafei hania hania deba aigitangicngac ayemmeec, hafei imocfia ebihagoc geac witiu faiba mi enude.”

²⁷ Anu yeni kengkecma Elim amabangecfu kensikegec. Imohai dokudzohong twelf kiwaunac erema fegec nga pam ic sewenti nangkenec. Yeni imohai doku tegiau kporucamanginasoc kpedzigec enu tackenggec.