Makekeng 14 - Deduamiti

Kondung sacsac ferecgegec

¹ Kebungo Mose yofi edeec,

² “Ge Isracelngicngac yofi edeyununa, ‘Ngeni dzigenema kondung nga Migdol amabangec botucngirau Pi-Hahirot taong wegenahau imocac hoangaubigeng kporucamanginasoc kpedzigec enu guru mema kondung tegiau Bacal-Tsefon kiwaugeng, imohai tacbisia.’

³ Ifi anggec Pareco ye yofi deude, ‘Isracelngicngac yeni sing segema bangec kisi imoc dafi wagecdeac obohoma sing hofocma kecma sicsauc kengkecdae.’

⁴ Nga ni Pareco ye ubaseri yombong meficgemiba kporacyunuude. Kporacyunuu ni yeac wasaihabufora sasawa yenigoc ewema firang amba eweheihei fingecnenude. Ifi fingeru aigitangicngac yeni yofi negentegecgecde, ni Kebu.” Ifi deu Isracelngicngac yeni ifi anggec.

⁵ Anu Isracelngicngac yeni worama kenggec aigitangicngac yeni ngictaungina siduc edegec. Edegec negemma ye yengena nga enactofoc tofohongicngacfora yeni siduc imoc negemma negen negengngina monggoc meremma degec, “Nenang mi negentegecma Isracelngicngac yungecyununi kemma wanac uanina wama monggoc mi megecde, imocngo mi ngereede.”

⁶ Anu ye dzikacac keretac meefaigecdeac edeyunuu hagec wasaingicfora meyunuu kenggec, imoc yeneac kpetengina yofi anec.

⁷ Ye Aigitabangecfu keretac meisingyunuyunuya gombunga 600 amma keretac sasawa Aigitabangecfu feec, imoc ifingoc medacma wasaingic enarafora tembuc tembuc sasawa yemmeec.

⁸ Anu Isracelac ngicngacareng hafoangoc yeni kengeha kpac kucgoc kemmagec Kebungo Aigita ngictau Pareco ubaseri meficgemiu kporacyunuma kenec.

⁹ Aigitangic, imoc Parecoac becosicfora nga keretac amma becosicfu kengkengngicfora nga wasaihabufora hafoangoc yeni Isracel kporacyunuma kemma Bacal-Tsefon tihereema kiwaubigeng dindingac Pi-Hahirot taong wegenahau Isracelngicngac yeni kporucamangina kpedzigec enu guru mema kondung tegiau tacmagec meficyunugec.

¹⁰ Anu Pareco wasaihabuforagoc yeneng mewegeneyunugec Isracelngicngac yeni kic figec kenu yenenggec wasaihabu yeni mewegeneyunuma arennu hagec. Ifi yenemma kengec kuneng amma Kebu kpacsambic ammima kiacgec.

¹¹ Amma Mose yofi edegec, “Aigitabangecfu kicsere homac fedenoc. Nga ge ine yei bangeckisiu homenideac hesicnununa hading, imoc naric mi ande. Ge nocac ifi amma Aigitabangecfunac wangecnunu hadang.

¹² Neni edi Aigitabangecfu yofinoc edeguing, ‘Ge meickena. Neni aigitangicngac yeneac wanacngic kecma uangina naric mekecdimbe.’ Neni yeneac wanacngic kecma uangina mema kecbing debac imocngo efaibac. Neni bangec kisi yomohai homenide.”

¹³ Ifi degec Mosengo ngicngac yofi edeyunuec, “Ngeni kengec imoc wama serima namma henggec Kebungo uaac ebicfunac yungecngunuudeac faka meude, imoc yaguc hembisia. Imoc yofi, ngeni aigitangic yaguc yenendae nga yeni ine monggoc mi yenenggecde.

¹⁴ Kebungo ngeni meficngunuudeac yenigoc eweude. Imocac ngeni wosongina makiu tacbisia.”

¹⁵ Anu Kebungo Mose yofi edeec, “Geng kpacsambic anennec, imoc wama Isracelngicngac yofi edeyununa, ‘Ngeni monggoc yacma kembisia.’

¹⁶ Isracelngicngac yeni kondung botuhau bangec kerengau ferecge kenggecdeac ge yasuga miacma mariga kondunnubigeng sinema kondung herecgena botuhau tegecma yohockang ambeso.

¹⁷ Nga ni aigitangic ubaseri meyunuba yeni modacngunugecde. Pareco nga wasaihabufora sasawa keretacnginagoc amma becosicfu kekengngicfora yeni ifi anggec neng firang amba eweheihei fingecnenude.

¹⁸ Anu ni Pareco keretacyagoc nga wasaingicfora becosicfu hadae yenigoc ewema firang amba eweheihei fingecnenu Aigitangic yeni yofi negentegecgecde, ninoc Kebu.”

¹⁹ Anu Kebuac angerongo isracelhabu waraiyemmekefec, ye tataha wama ngadenginau kemma nanec. Nga hoeng herea ifingoc tataha wama kicnginaunac meickema kemma ngadenginau nanec.

²⁰ Ifi amma Aigita yeneac wasaihabu nga isracel yeneac wasaihabu botucnginau kpae isoc amma nanec. Namma tofocnac hafoangoc hoengngo Isracel kperagi yemmekefec nga Aigita ine kundung meficgeyemmeu yeni Isracel mi mewegeneyunumagec ama wereckenec.

²¹ Ifi anu Mose ye kondung witiau maria sineu Kebungo deu wenac ere ereaunac firangtoango tofocnac hafoangoc kpekecma kondung kpendziru yohockang anu botuhau kondungbuyau bangec mekerengaiu kerengaima feec.

²² Amma kondungngo noboc noboc serima oda isoc amma nammanu Isracelngicngac yeni bangec kerengau tima ferecgegec.

²³ Ferecgegec aigitangic yeni ifingoc ferecgeni dema foro foro amma kporacyunugec Pareco nga yeac becosic sasawa nga keretac amma ngic becosicfu tacgec momoc kondung botuhau kenggec.

²⁴ Kenggec ama wereckembeso anu Kebungo gerecborang herea nga hoeng hereaac manau kecma aigitangic yenearubigeng kic fiu kenu yenemma wasaihabu botucnginau homecac kengectoa meficgeyemmeu kpidohogec ubangina sufuec.

²⁵ Nga ye deu keretacnginaac wilya merenu yeni kucgoc kenggecdeac ambibiegec. Ifi fingeru aigitangic yeni yofi degec, “Kebu yengenaoc Isracelngicngac meficyunuma nenanggoc ewema kecdeac nenang bic yombong wayunuma worama kenni.”

²⁶ Anu Kebungo Mose yofi edeec, “Ge mariga kondung witiau sinena kondungngo dzigenema aigitangic nga keretac amma ngic becosicfu kendae semeyunubeso.”

²⁷ Ifi deu Mose ye maria kondung witiau sineec. Sinemanu ama werec wereckenggac kondungngo monggoc warac fekefec isoc ifi feudeac dzigene haec. Hamanu aigitangic yeni worabeso anggec kondungngo hama yeneac sing tidzickema merucyunuu Kebungo kondung dzongiau kpebucyunuma namma mendzicyunuu singsararang kpema kendacgec.

²⁸ Imoc keretac nga becosicfu kekengngic nga Parecoac wasaihabu hafoangoc yeni Isracelngicngac modacyunuma kondunnu hagec kondungngo dzigenema hafoangoc semeyunudarec. Yenearunac mongngo mong mi woraec.

²⁹ Nga Isracelngicngac yeni ine kondungngo foinginau nga kananginau serima oda isoc amma nanu kondung botuhau bangec kerengau ferecge kenggec.

³⁰ Ifi amma Kebungo wenac imohai Isracelngicngac aigitangic yeneac mariunac mesiyunuec nga Isracelngicngac yeni aigitangic yeneac farengngina yenenggec kondung tegiau sangiu fekenggec.

³¹ Anu Kebu kuctoayagocngo aigitangic faka ayemmeu Isracelngicngac yeni imoc henggec. Hemma damuyunuu Kebu negensinggegec nga enactofoc tofohongiha Mose ye ifingoc negensinggegec.