Makekeng 13 - Deduamiti

Warac warac fingec fingera sasawa imoc Kebuac

¹ Kebungo Mose yofi edeec,

² “Warac warac fingecgecde sasawa yeni neac anggecdeac segereyunuma meisingyunugec neac kpetiacareng amma kecbisia. Isracelareng ngeneac botucnginau ngic me yang nonggo heremanaunac warac warac fingerude, imoc neac ambeso.”

Icsogong aenga kpac imocac nasotoa

³ Ifi deu Mosengo ngicngac yofi edeyunuec, “Kebunina ye mariseriango Aigitaac wanac uaac manaunac wangecngunuu magec, wenac imoc negenggec fekecbeso. Imocac wiac aengagoc naso imohai mi nekecbisia.

⁴ Ngeni afo awiwac wenac yomohai mama kenggecde.

⁵ Ngeni Kebungo wangecngunuu Kenacanngic, hittingic, amoringic, hiwingic nga yebusingic yeneac bangec dokuyagoc nga kerectoayagoc imohai kengsikegecde. Ye kisicfocngina yoac deseriyemmema imoc genudeac deec. Amma imoc genu ge yeac enac tofohoma afo yomohai yeac eweheiheifaka yomoc ammibesena.

⁶ Ngeni wenac sewen icsogong aenga kpac nema kecma wenac kpete sewen imohai Kebuac nasotoa tacbisia.

⁷ Ngeni icsogong aenga kpac nema kecmagec wenac sewen wisickebeso. Imohai geac amau wiac goa aengagoc ngicngac kicnginau mi fingecbeso nga bangectoanginau uha dokugoc yerec yerecgea aengagoc mong mi mekecbisia.

⁸ Ifi amma wenac imohai medacga yofi dekperagimima edebesena, ‘Kebungo faka kuneng mema Aigitabangecfunac wangecnuma haec, imocac ifi anduae.

⁹ Nga ye mariseriango Aigitabangecfunac wangecgu haec, imocac ge kecnadesoc angammeme imoc nigecgubacac marigau nga kicmesugau ma isoc faima Kebuac singyoac seria imoc enacbibicgau febeso.

¹⁰ Nga singseria imoc kifasoc negentofoho amma kecbesena.

Warac warac fingec fingera

¹¹ Anu Kebungo ngeni nga kisicfocngina yoac deseringemmema deec, ye imoc modacma Kenacanngic yeneac bangecfu faingunuma bangec ngemmeude

¹² imohai ngeni nonggo heremanaunac morocmedacfocngina nga ramaburumaka warac warac fingec fingera ngiwa imoc sasawa Kebuac anggecdeac desiyunubisia.

¹³ Nga donggi yeneac warac warac fingec fingera sasawa, imocac turunga ine ramamedaha faibesena. Nga mi faibeso negennecfu ine ubia kpetackebesena. Nga ngic waracmedacfocngina sasawa yeneac turunga ramamedaha faikecbesena.’

¹⁴ Anu kecma medacgango yofi kpesigenude, ‘Faka imoc hania dafiac angandae?’ Ifi deu yofi edebesena, ‘Kebu mariseriagocngo Aigita wanac ua manaunac wangecnunu haec.

¹⁵ Nga Pareco ye ubaseri yombong amma segerenunuma uaac ebicfunac yungecnunuudeac waec. Imocac amma Kebungo Aigitabangecfu ngic nga amayang warac fingec fingera sasawa, homecfu faiyunudarec. Imocac amma yang heremanaunac warac warac fingec fingera sasawa imoc Kebuac sese dema ohoanduae. Nga ngic morocmedacfocnina sasawa yeneac turungngina kpouanduae.

¹⁶ Kebu mariseriagocngo Aigitabangecfunac wangecnunuecac faka imocngo ma isoc anu marigau faima kporucsusucfu kibi ohoma kicmesugau dzegebesena.’ ”

Hoeng nga gerecborang

¹⁷ Anu Pareco ye ngicngac uaac ebicfunac yungecyunuu Anutungo yofi dema Pelistibangecac singtoa wegenac feec, imocac sing mi wangecyunuec. Sinnu kemmagec dzikac fingecyemmeu yeni modzongina tiu Aigitabangecfu monggoc dzigenebauac ifi anec.

¹⁸ Anutu ye ifi negemma ine ngicngac hesicyunuu sing hereau yerecgema bangeckisiu kondung sacsacfugeng kenggec. Anu isracelngic yeni Aigitabangec wama wasaingicac wiacngina sasawa mehei amma mama kenggec.

¹⁹ Yosefngo warac Isracelkpebung yeni yofi deserigecdeac deec, “Anutungo yugucngunuude naso imohai ngeni sicna amabangec yomohanac meickema mema kembisia.” Imocac amma Mose ye Yosefac sic momoc mema kenec.

²⁰ Anu yeni Sukkot amabangecfunac yacma kengkecma Etam amabangecfu, bangec kisicac tegiau kensikema kporucamangina taigec enu guru mema ihai tacgec.

²¹ Yeni wenacfu nga tofocnac naric kenggecdeac Kebungo wenacfu sing edzacyunuudeac hoengherec manau waraiyemmekefec nga tofocnac ine kperagiyemmeudeac ine gerecborang mong herea dzema feec, imocac manau kefec.

²² Amma wenacfu hoengherec hongngoc nangkefec nga tofocnac gerecborang herea imoc nasosoc dzetarec. Yeri ngicngac mi wayunuma ngicngac waraiyemmemangoc kefoc.