Makekeng 12 - Deduamiti

Onggongyunuudeac ramamedaha

¹ Mose nga Aharon Aigitabangecfungoc kecmaec Kebungo yofi edeyuruec,

² “Ngeni kalendanginau afo yomocac negenggec kifa hanac hanaheaac afo ambeso. Imocngo afo goa sasawa waraiyemmebeso.”

³ Nga Isracelkpebung hafoangoc yofi edeyunuec, “Afo yomocac wenac uameme kpete ten imohai ngic tembuc tembuc enemmedacfocnginagoc kecdae, yeng yeneac rama me noningmedaha mocgu mocgu mebeso. Amamana mong ye mocgu, ifi sasawa.

⁴ Anu amamana monnu ngicngac naroangmedacfocngina efeanecsac kecma ramamedaha naric mi nedacgecdeu yofi ambisia. Ama yohockang wegenac wegenac tacdape imocac manggac yeri rama me noningmedaha mocgu mema kpeturanggema ngicngac naroangmedacfocnginaac kpetengina negemma tembuc tembuc sasawa yeneac socngina hendzicma nebisia.

⁵ Nga rama me noningngiwa imoc kifaya mocgu angana sebia soronga yombong nga puringa kpac, ifiasac meisinggebisia.

⁶ Meisinggema garenggema kecmagec afo yomocac wenac kpete fotin ammanu ama marai anu Isracelkpebung sasawa yeni ramanoningmedaha bic meisinggegec imoc kpebucyunubisia.

⁷ Kpebucyunuma ubangina herecgedacma sacngina mebisia. Mema imocngo nagu sangoya noboc noboc nga wibigeng hosobisia. Amma ama imohaingoc tacma fusia nebisia.

⁸ Nga yeni fusia imoc tofocnac imohaingoc hafoangoc gerecfu faigec dzebeso nga icsogong aenga kpac nga mondzang hodungagoc imocgoc nebisia.

⁹ Amma yang imoc gbori me birikennu dokuu mi ohoma nebisia. Imoc ine oruha nga hanimaria nga keracbawa tacmanungoc gerecfu hafoangoc faigec dzeu nebisia.

¹⁰ Nema fusia mong mi wagec tacmanu ama wereckembeso. Nga ama wereckenu mong tarudeu imoc gerecfu faigec dzedacbeso.

¹¹ Ngeni singgac efaima yofi amma wiac imoc bic yombong nebisia, ngakpiherecngina fadenggoc dzege dzegea ambeso nga hanitabengina heigec kemeu, yasungina maringinau mema tacgecde. Imoc hania yofiac, imoc Kebungo onggongngunuudeac naso.

Aigita yeneac warac warac fingec fingera yunuhomebade

¹² Ni tofocnac imohaingoc Aigitabangecfu ferecgema warac fingec fingera ngic nga medac amma yang sasawa yunudacbade. Anu Aigita yeneac nemuonga nga anutu hania hania sasawa isingyunuma haniangina desibade. Ni Kebungo.

¹³ Amma ngeneac nagunginaac sangoyau sac hosogec imoc hemma feracngunubade nocac ngeneng amau tacdae, imocac kpetengina sacngo anude. Nga Aigitabangecfu warac fingec fingera kpetotieyunubade imohai ngeni yenigoc mi kpetotiengunubade.

¹⁴ Anu wenac imocngo ngeneac nasotoangina angkecbeso, imoc kifasoc tacbisia. Nga tacgecdesoc Kebungo faka meec imocac negensima kecbisia. Imoc fingecsahengina feengkefudesoc imoc meserima mekecgec singngina seria amma feengkecbeso.

¹⁵ Nga ngeni icsogong aenga kpac nema kecmagec wenac kpete sewen wisickebeso. Wenac uameme kpete mocgu imohaingoc uha dokugoc yerec yerecgea aengagoc imoc amanginaunac meickebisia. Imoc yofiac, tembuc tembuc sasawa ngenearunac mongngo wenac kpete mocgunac kemma wenac kpete sewen imohai wiac aengagoc neudeu ye isracelhabuunac meickegec ngadeau kemebeso. Yoac imocngo dederecgengina amma feengkecbeso.

¹⁶ Wenac kpete mocgu imohai kpekpedzuc kpetiac mong fingecbeso amma wenac kpete sewen imohai kpekpedzuc kpetiac monggoc ambisia. Nga wenac yohockang dedea imohai ua mong mi mebisia. Ngicngac tembuc tembuc sasawango yaka negecde imocac sirihausac ohomiacke ua mebisia.

Aigitabangecfunac hesicngunuba kenggecde

¹⁷ Ni wenac imohainoc Isracelngicngac habufocngina Aigitabangecfunac hesicyunuba kenggecde. Ifiac amma icsogong aenga kpacac nasotoa negentofoho ambisia. Ngeni fingecsahengina feengkefudesoc wenac imocac negensima faka imoc negentofoc ambisia. Imoc singseringina wisic wisickea kpac feengkecbeso.

¹⁸ Ngeni afo kpete mocgu imocac wenac kpete 14, marai imohai hanahema icsogong aenga kpac nema kecemmagec wenac twentiwan marai ambeso.

¹⁹ Nga amanginau uha dokugoc yerec yerecgea aengagoc mong mi tacmanu wenac kpete sewen ambeso. Ngicngac tembuc tembuc sasawa ngenearunac kuric me bangec mingina mongngo wiac aengagoc neudeu ye meickegec Isracelkpebung ngeneac ngadeau kemebeso.

²⁰ Ngeni wiac mong aengagoc mi nebisia. Ngeni amangina dahai dahai fekendesoc icsogong aenga kpacsac nebisia.”

Kemma nasotoa tacbisia

²¹ Ifi deu Mose ye Isracel enarafocngina kpedzucyunudacma yofi edeyunuec, “Ngeni kemma amaarengfocngina yeneacsoc negemma makekenggac ramamedaha meisinggema kpebucgebisia.

²² Amma hissop dzaring fawabisicbisic goa mema sac otou nemuruckema imocngo naguac sangoya noboc noboc nga odaha wibigeng imohai hosobisia. Hosoma ngenearunac mongngo ama ngadeau mong mi mama ama manau tacmagec ama wereckembeso.

²³ Imoc yofiac, Kebungo aigitangic yunuhomeudeac hama uaya yofi meude. Ye naguac sangoya wibigeng nga noboc noboc yohockang imohai sac hemma nagu imocsac ferahema kpehomehomecac angero kpae heimiu yeng amanginau emma mi ngunuhomeude, ye nagu sangoyau sac mong mi henudeu yunuhomeude.

²⁴ Ngeni ngenang nga nambaracfocngina faka imoc negentofoho amma kecbisia nga imocngo singseringina amma feengkecbeso.

²⁵ Nga Kebungo ngeneac bangec dengemmeec, ngeni imohai kensikema yeac yoac modacma ye eweheimima nasotoa imoc negensima kecbisia.

²⁶ Anu nambaracfocngina yeni imoc hania dafiac angandae? Ifi kpesingemmegec

²⁷ yofi edeyunubisia, ‘Imoc Kebungo onggonnunuecac sesegerec. Yennoc Aigitangic yunuma Isracelngicngac Aigitabangecfu kefing, neni onggonnunuma neneac amanina ferahaec.’ ” Ifi edeyunuu ngicngac yeni imoc negemma ngonducnema numumigec.

²⁸ Anu Isracelngicngac yeni kemma Kebungo Mose nga Aharon dederecge ayecmeec imocac sirihau yombong medacgec.

Kebungo medac warac fingec fingera yunudarec

²⁹ Anu tofocnac dzongiau Kebungo Aigitabangecfu ngic warac warac fingec fingera sasawa yunuhomedarec. Pareco ngictautatahau tarec yearunac kengkecma witicngic witicamau tackenggec yeneac morocmedacfocngina momoc yunuhomedarec nga amayangfocngina sasawa yeneac siriha imocngoc fingecdarec.

³⁰ Ifi fingeru Pareco nga enactofoc tofohofora sasawa amma aigitangicngac sasawa yeni tofocnac imohaingoc yacma kiacaroho kuneng anggec Aigitabangec sokodarec. Ama sasawau fareng fedarecac amma ifi fingecdarec.

³¹ Ifi fingecdaru Parecongo tofocnac imohaingoc Mose nga Aharon haecdeac yoac fau kenu yeri haec yofi edeyuruec, “Ngeri nga Isracelngicngac ngeni yacma neac ngicngacfocna wayunuma kemma degec isoc Kebuac enac tofohoma ye eweheimibisia.

³² Nga dedaoc isoc ramaburumakafocngina momoc abarangyunudacma bic yombong meickema kenggec. Kemma ni momoc kenecnubisia.”

³³ Anu aigitangicngac yeni Isracelngicngac bangecngina bic wagecdeac foro ayemmema igocyunuma degec, “Neni homecac onga andacdimbe.”

³⁴ Ifi degec Isracelngicngac yeni icsogonggac uha dokugoc yerec yerecgea eng aenga kpac nga mi dzedzea, imoc gbori otoyagoc mema ngakpiherec herecnginango biranggema dzegefonggema fuanginau faima tofohoma kenggec.

³⁵ Anu Isracelngicngac yeni Moseac yoac modacma aigitangicngac yeneac wiacngina silwa nga golngo memea amma wambangina imocac bic kpesiyemmegec.

³⁶ Anu Kebungo aigitangicngac yenearu fakatoa meu yeni Isracelngicngac ogo ayemmema wiacngina megecdeac kpesiyemmegecsoc imoc yemmedacgec. Ifi amma aigitangicngac yeneac wiac wangecyunugec.

Aigitabangec wama kenggec

³⁷ Anu Isracelngicngac yeni efaima yacma kporucamangina meickema mekemma Racamses taong wama Sukkot bangecfu kenggec. Nga ngic imoc yeneac kpetengina 600,000, ngac nambaracfocngina ine mi osoyunuyunuya.

³⁸ Nga ngicngacareng hania hania goa bangec monnunac homac yeneng yenigoc momoc kenggec amma ramaburumakafocngina habuya habuya homac ifingoc kenggec.

³⁹ Nga Aigitabangecfunac uha dokugoc yerec yerecgea gbori mekenggec imocngo icsogong aenga kpac imoc ohonecanggec. Aigitangicngac yeni Isracel yeneng bangecngina bic wama kenggecdeac foro ayemmegecac amma uha dokugoc yerec yerecgeango aengagoc anudeac naso mong mi fingerec. Yeni singmaung mi mengerema engsac kenggec.

⁴⁰ Isracelngicngac yeni Aigitabangecfu keceremagec kifa 430 ammanu wisickeec.

⁴¹ Nga kifa 430 wisickeu wenac imohai yombong Kebu yengena habu sasawa yeni Aigitabangec wama kenggec.

⁴² Kebungo Isracelngicngac Aigitabangecfunac wangecyunuu kenggec, tofocnac imohai ye garengyunuma kefec. Ifi anecac Isracelac ngicngacareng yeni fingecsahengina feengkefudesoc tofocnac imohainoc Kebuac gaugbori naso andeac gareng kecbisia.

Makekenggac ramamedahaac yoac

⁴³ Anu Kebungo Mose nga Aharon yofi edeyuruec, “Onggoc onggongge nasotoaac singseria yofi fede, bangec monnunac ngicngo makekenggac ramamedaha imoc mi nebeso.

⁴⁴ Nga wanacngic dzongo bummeyunugec yeni ine sebi tosangina herecgegecguc naric nebisia.

⁴⁵ Nga kuricngic me ua megecdeac bummeyunugec yeni makekenggac ramamedaha mi nebisia.

⁴⁶ Ngeni ama mocguac manau kpedzucnema rama imohai nebisia amma amaunac maunga mong mi memabisia. Nga sira mong mi kpetackebisia.

⁴⁷ Isracelkpebungtoa hafoangoc ngeni yoac imoc modacbisia.

⁴⁸ Ngic kuricareng mongngo ngenigoc kecma Kebuac onggo onggongge nasotoa imoc tacbeso degec ngic yengena nga medacfora sebi tosangina herecgegecguc ramamedaha ngenigoc naric nebisia. Amma yeni ngeni isoc bangec mingina amma kecbisia. Sebi tosea mi herec herecgeango makekenggac ramamedaha mi nebeso.

⁴⁹ Bangec mingina amma ngic kuric ngenigoc kecandae ngeneac singyoac seria mocgusac yombong febeso.”

⁵⁰ Anu Kebungo Mose nga Aharon yoac dederecge ayecmeec, Isracelac ngicngac sasawa yeni imocac siricfu yombong megec.

⁵¹ Nga wenac imohai yombong Kebungo Isracelac ngicngacareng habuya habuya Aigitabangecfunac wangecyunuu kenggec.