Makekeng 11 - Deduamiti

Warac fingec fingera homedacgec

¹ Mosengo Pareco ifi edeu Kebungo yofi edeec, “Kpendzengtoa mocgu fede, imoc deba Parecoaru nga Aigitabangecfu fingerude. Fingeru yeng uaac ebicfunac yungecngunuu yomohacnac kenggecde, nga nomana mi suengunuude, kpac. Ye yungecngunuu kenggecde imohai gereagoc yombong amma kporacngunuu kendacgecde.

² Imocac ge yofinenggacngoc ngicngac edeyununa yeni tembuc tembuc sasawango aigitatosofocngina yeneac wiac silwa nga golngo memea, imocac derecgeyemmebisia.”

³ Anu Kebungo aigitangicngac ubaefac kpeyemmeu Isracelngicngac negengyemmegec. Amma imocsac kpac. Aigitabangecfu Parecoac enactofoc tofohofora nga Aigita ngicngacareng momoc yeneng Moseac ye ngic engena yombong, ifi negenggec.

⁴ Anu Mosengo Pareco yofi edeec, “Kebungo yofi dede, ‘Ni tofocnac dzongiau yomohai mama Aigitabangecfu hama ferecgekembare

⁵ Aigitabangecfu morocmedacfocngina yeni sasawa homedacgecde. Pareco ngictautatacfu tacde yearunac hanahema kengkecma wanacnaroanga witsemeng hocfu hedzameande, ngac yeac waracmedaha yearu wisickeude. Amma imocsac kpac, ramaburumaka warac warac fingecdacgec, yeni ifingoc homedacgecde.

⁶ Homegec kiacarohoac udumeng kuneng yombongngo Aigitabangectoau sokodarude. Kiacaroho kuneng ifia warac mong mi fingecma feec amma kecma ngade ifia monggoc mong mi fingerude.

⁷ Nga kasi mongngo Isracelngicngac yenearunac ngic me yang mong mi kponggomiude. Naso imohai yofi negentegecgecde, Kebungo aigitangic nga isracelngic mendzicnunuude.

⁸ Ifi fingeru enactofoc tofohofocga yomoc yeni sasawa nearu hama ngonducnenemma yofi degecde, “Ge nga ngicngacfocga modacgudae ngeni sasawa kendacbisia. Ifi edenugec kembade.” ’ ” Mose ye ifi dema herebu kuneng negemma Parecoac ama wama kenec.

Pareco ubaseri yombong anec

⁹ Anu Kebungo Mose yofi edeec, “Ni Aigitabangecfu fakami hehena homac mebadeac negenduae, imoc fingecdarudeac Parecongo mi negengngemmeude.”

¹⁰ Anu Mose nga Aharon yeri Parecoac kicfu kucfaka mi hehena imoc sasawa medaroc nga Kebungo Pareco ammiu ubaseri yombong amma Isracelngicngac yeni bangeha wama kenggecdeac uaac ebicfunac mi yungecyunuec.