Makekeng 1 - Deduamiti

Aigitangic yeneng Isracelngicngac merandziyunugec

¹ Yomoc Isracelac medacfora yeneac kpacareng. Yeni tembuc tembuc sasawa amaarengnginasoc enemmedacfocnginagoc amma mangngina Yacakowgoc yenahafoc Aigitabangecfu kensikegec.

² Imoc Recuwen, Simecon, Lewi nga Yehuda.

³ Yissaskar, Dzewulun nga Benyamin

⁴ Dan, Naftali nga Gad amma Aser.

⁵ Yacakowac esamedacfora sasawa yeneac kpetengina kpeturanggede imoc sewenti. Nga Yosef ye ine bic Aigitabangecfu kemma kefec.

⁶ Anu Yosef homeec nga dacfora amma areng yenigoc kecgec yeni ifingoc kecma homedacgec.

⁷ Nga Isracelac esangabofora nga bangecfora yeni fingecsahe amma ngicngac seregurutoa kuneng yombong nga kucnginagoc amma bangec imoc sokodacgec.

Ngictau gboria fingerec

⁸ Anu Aigita yeneac ngictau gboria mong fingerec ye ine Yosef mi negemmiecac

⁹ ngicngacfora yofi edeyunuec, “Negendae, Isracelac ngicngacareng yeni kpetengina kuneng nga kucnginagoc yombong amma feracnunuyombonggedae.

¹⁰ Amma yeni monggoc sahebauac nenang negen negentegecgoc faka ayemmebisina. Anu kecma dzikac mong fingerudeu yeni ngabafocnina yenigoc torokpema nenanggoc ewema bangecnina wama worabauac.”

¹¹ Ifi deu ua megecdeac keracnatang mangana yeneac bageau faiyunugec yeni kpendzengtoa kpema kecgecdeac negemma ua ebira yombong megecdeac ngombongyunugec. Ngombongyunugec yeneng Parecoac kpounecac taontoa yohockang, Pitom nga Racamses meyurugec.

¹² Anu yeni kpendzeng monggoc kpegecdeac ayemmegec kpetengina imocacsoc enec. Enu yeni Aigitabangecfu monggoc sahegec anu aigitangic yeneng isracelngic yeneac kengecyunuec.

¹³ Kengecyunuu yeni isracelngic ngabayoac ayemmema wanacngicfocngina amma kecma yeneac ua megecdeac ngombongyunugec.

¹⁴ Ngombongyunuma yeneng dzoic kpendzenggoc kecgecdeac negemma ua ebirau faiyunugec simeng nga gbakingo amameme hoc megec amma goa Aigita yeneac nenesemeng uau homenec ua megec. Yeni ifi amma ua hania hania megecdeac ngombongyunuma kekecngina meebirigec.

Siferea nga Puca

¹⁵ Anu Aigita ngictau ye Hebiraio yeneac gadzememengac yohockang, Sifera nga Puca yofi edeyuruec,

¹⁶ “Ngeri hebiraiongac gadze meyemmema henec sabac medac fingerudeu kpebucgebesera nga naroang anudeu ine onggonggebesera.”

¹⁷ Ifi deu yeri Anutuac damuyuruu Aigita ngictaungo yoac dederecge ayecmeec, imoc wama mi tofohoocac amma medac fingecgec yeni ine homecfu mi faiyunuoc.

¹⁸ Ifi anec Aigita ngictaungo kpacyuruma yofi kpesiyecmeec, “Ngeri yoac deduamoc nocac wama medac fingecdaumoc homecfu mi faiyunuoc?”

¹⁹ Ifi deu yeri Parecoac yoac yofi meremmioc, “Hebiraiongac neni aigitangac yeni isoc kpac. Hebeiraiongac yeni ngac seria andaeac gadzememengac neri mi hamira sabac bic meyunuandae.”

²⁰ Anu Anutungo gadzememengac gombunga ayecmeu Isracel ngicngacareng yeni fingecsahe amma kucnginagoc yombong anggec.

²¹ Anu gadzememengac yeri Anutuac damuyuruecac kogoc mema gboricgoc anoc.

²² Ifi anu Parecongo ngicngacfora sasawa dederecge yofi ayemmeec, “Hebiraiongic yeneac medacfocngina fingecgecdesoc ngeni Nilidokuu ukuyunugec kemedacbisia nga naroang yeni ine onggongyunubisia. Yeni naric kecbisia.”