Hebiraio 8 - Deduamiti

Womonggareng ua mekecde

¹ Imocac amma yofi fede, womonggarengtoaninango kurumenggac ngictautatac, imocac foiau tataha mema tacde.

² Amma ye Anutuac womong yeac womong fora kurumennu nande, ihai kingangkpekpe ua mema kecde. Womong imoc ngicngo mi memea, kpac. Anutu yengenaoc imoc mema faiec.

³ Anutungo womonggarengtoa uayoac deyemmeu yeni ubangerec nga kopocsicac sesegerecngina faikecdae. Imocac amma Yesungo ifingoc sese mong faibeso.

⁴ Womonggareng yeni dedeseriyoac modacma Anutu sese heiheimiac ua imoc bic mekecdae, imocac ye engngoc bangecfu kecbacfu womonggareng naric mi ambac.

⁵ Mosengo kporucwomong mema miacbeso anu Anutungo goroyoac dema yofi edeec, “Ni tikiu onga edzacguai, ge siriha imoc yombong modacma wiac sasawa medacnadeac henghomema mebesena.” (Mke 25:40) Nga ngic yaguc womonnu ua meandae, yeni Mose isoc kurumenggac onga modacma uangina mekecdae.

Dzadzahac gboria

⁶ Yesu ye dzadzahac gboriaac ngicbotuc, dzadzahac imoc dedzege yoac kuha monggoc mekecde, nocac dzadzahac gboriaac dedeseriyoacngo eseaac ferahede. Amma yeac womonggareng ua, imocngo bangecac womonggareng ua siriha ifi isoc ifingoc feraheude.

⁷ Dzadzahac esea ebiha kpac ambac dede dzadzahac gboria mongngo tataha naric mi mebac.

⁸ Nga Kebu Anutungo ine ngicngacfora yenenu kopocsicnginagoc anggecac yofi deec, “Kecma naso mong habesande, imohai ni Isracel nga Yuda areng yenigoc dzadzahac gboria mong mebade.

⁹ Dzadzahac imoc warac bangecfocngina yenigoc meai, imocfia isoc kpac. Naso imohai neng maringinau mema Aigita bangecfunac hesicyunu hayai. Yeni dzadzahac meai, imoc wama imocgoc mi kecgecac ni ifingoc wayunuma ioc baoc ayemmeai.” Ye ifi dema monggoc torokpeec,

¹⁰ “Ni ngadeu dzadzahac gboria Isracel areng yenigoc mebesandua, imocac siriha yofi, dedeseriyoacna ngicngac yeneac negen negennu faima kibia imoc herenginau yombong ohobade. Amma neng Anutungina kecba yeneng ngicngacfocna kecgecde.

¹¹ Nga imohai mongngo Isracel ogea me munea mong edekpou ammima yofi mi deude, ‘Ge Kebu negemmina.’ Nocac ngicngac kapiaunac erema kunengtoau wisickeude, yeni sasawango negennugecde.

¹² Ni wosoefac ayemmeba sing segema me kopocsic meficgeandae, imoc sasawa wama monggoc mi negensibade.” (Yer 31:31-34)

¹³ Ye dzadzahac gboria monggac deec, imohai dzadzahac warac meec, imocngo esea anec, ifi dekperagiec. Nga wiac mong bic wawaya esea ande, imocngo naso kapianecsac fema kpac anude.