Hebiraio 7 - Deduamiti

Melkitsedekac hania

¹ Melkitsedek ye Sareng taonggac ngictau amma Anutu engenatoa yeac womonggareng kefec. Nga Abarahang ye ngictau yenigoc ewema kpebucyunuecfunac dzigenema hamanu yeng sinnu ye meficgema keneheec.

² Keneheu Abarahangngo iwaiya sasawa dzikacfunac meecmoc, ihacnac tennunac mocgu hendzicma Melkitsedek miec. Nga Melkitsedek yeac kpara titiha imoc, “Dindingac kekecac ngictau.” amma monggoc “Sarenggac ngictau.” imocac titiha “Ruaeac ngictau.”

³ Amma ye nonggomama nga esangabofora yeneac kpacarengngina mong mi oho ohoya. Nga ye fingec fingecnasoya kpac amma homec nasoya ifingoc kpac, ye Anutuac Medac siric isocngoc amma womonggareng nasosoc kecengkefude.

⁴ Anu dzite hania bangecnina Abarahangngo wiara dzikacfunac meec, imoc hendzicma teng imohacnac mocgu miec. Imocac ngeni hentegecbisia Melkitsedek ye ngic engenatoa.

⁵ Nga Lewiac bangecfora yeneng womonggareng ua mekecgecdeac uayoac megec, yeni ngicngac yenearunac tennunac mocgu imoc mekpedzuc ambisia, dedeseringo ifi dede. Nga ngicngac imoc yeni Abarahanggac bangecfora nga sactosofocngina kecma sifu yenearunac tennunac mocgu mekecgec.

⁶ Anu Melkitsedek ye yeneac arenunac mi fingerec, kpac. Amma ye sifu Abarahanggarunac tennunac mocgu mema ngic Anutuac dzadzahac mekefec, yenoc keneheec.

⁷ Nga ngic merang kenec miec, yeac kpacngo kenec meec, yeac ferahede. Mongngo yoac imoc naric mi kpeude.

⁸ Anu mong yofi, womonggareng homec bageau kecdae, yeneng tennunac mocgu kpedzucnema mekecdae. Nga Abrahangngo tennunac mocgu Melkitsedek miu meec, yeng ine kecdengoc, dedekperagi ifi nemmegec.

⁹ Amma yoac yofi naric denide, Lewi ye tennunac mocgu memeac ngic nga Melkitsedekngo Abarahanggarunac tennunac mocgu bic meec, imoc Lewiarunac meecac amma Lewi yengenaoc tennunac mocgu ifingoc faiec.

¹⁰ Melkitsedekngo Abarahanggoc sinnu ewaroc, naso imohai Lewi ye bangehaac hereu bic tarecac amma Abarahangngo Melkitsedek wiac miec, imoc Lewingo ifingoc miec ande.

Womonggarengtoa fora

¹¹ Lewiac areng yeni womonggareng ua mekecgec, Anutungo imoc negensima Isracel ngicngac dedeseriyoac yemmeec. Nga Lewiac areng yeneng womonggareng ua megec wiac hafoangoc ngereebac dede Anutungo womonggareng monggoc fingerudeac mong mi debac. Nga yofi fingecbeso, womonggareng ngic mong Melkitsedek yeng kefec, siriha ifia fingecbeso amma ye Aronggac arennunac fingecbac imocngo mi ngereebac.

¹² Nga womonggarenggac ua areng gboria fingerudeu dedeseriyoacac areng gboria ifingoc fingecbeso, sing mong mi fede.

¹³ Amma womonggareng imoc ine kisic mong yenearunac nga yeac kisicfunac mongngo arata henggareng mong mi angkefec.

¹⁴ Kebuninango Yuda kisic yenearunac fingerec, imoc negendimbe. Nga Yudaac areng, yenearunac mongngo womonggareng anude, imocac Mosengo mong mi deec, kpac.

Merekisedeac siricfu

¹⁵ Anu Kebuninango Yuda kisicfunac fingecma Melkitsedekngo womonggareng kefec, ifi isoc womonggareng anec, imocngo monggoc dekperagiu Lewi arenggac womonggareng ua soha mi anec.

¹⁶ Womonggarengtoa ye sac areng mocguac manau modacma fingecbeso, dedeseringo imoc dede. Nga Kebunina ine kekec dzonggo dzonggoa kpac imocac kucfu womonggarengtoa anec.

¹⁷ Yeac negemma dedekperagi yoac yofi fede, “Geng Melkitsedekac siricfu womonggareng wisic wisickea kpac kecengkecbesannec.” (Myeg 110:4)

¹⁸ Dedeseriyoac kucmama nga memefiha kpac warac hau yoac imocngo faka warac feec, imoc meickeu kpac andarec.

¹⁹ Dedeseriyoacngo memengerec ua hafoa mong mi meec, kpac. Nga Anutungo yofinenggac sing mong mesarinemmeec, imocngo warac sing feec, imoc ferahede. Nga nenang sing imoc modacma Anutuac hoannu kengkecnide.

²⁰ Anutungo yoara meserima Yesungo womonggareng anudeac deseriec. Womonggareng Lewiac arennunac yeneac demeseriyoac ifia mong mi feec.

²¹ Ye imoc Yesuaru faima yofi edeec, “Kebungo yoara meserima yofi deec, ‘Ge womonggareng wisic wisickea kpac kecengkecnade.’ ye yoara ifi meserima naric mi waude.”

²² Anutungo Yesuac ifi meseriec, imocac amma Yesungo dzadzahac gboria imocac nonggo tarec. Ifi taru dzadzahac gboriango eseaac kuc feraheude.

²³ Womonggareng Lewiac arennunac yeni ngic homac. Nga homebesandaengo ua imoc mekecgecdeac homecngo womonggareng ua imocac kpae anec. Imocac amma mong homeu mongngo torokpeu torokpe meerekecma womonggareng ua megec amma yaguc meandae.

²⁴ Nga Yesungo ine wisic wisickea kpac kecengkefude, imocac womonggareng ua yegoc wisic wisickea kpac amma feeng kecbesande.

²⁵ Ye nasosoc Anutuac kicfu yoacfu meficnunuma kefudeac ngicngac yearusing Anutuaru kennide, nenang hafoangoc mengerenunuudeac mi obohoude.

²⁶ Anu womonggarengtoa yennoc naric meficnunuude. Ye kpetiac nga kopocsiha kpac, kongaha amma wononga kpac. Anutungo ye ngic kopocsicmeme yeneac botucfunac meickeu ye kurumeng sasawa fekende, imoc feracyunuma wi kecde.

²⁷ Nga womonggarengtoa Lewiac arennu yeni wenacsoc yenang kopocsicac sese faimaguc ngicngac yeneac kopocsicac ngade faikecdae. Nga Yesungo faka imocac bageau mi kefec, kpac. Ye ine sese dema yengena faiemeec nga yeng imoc naso mocgusac meu soha anec.

²⁸ Foracngoc, dedeseringo ngic kucmamagoc uayoac deyemmeu womonggarengtoa angkecdae. Nga demeseriyoacgoc fingerec, imocngo Medac uayoac demiu yeng tatac mema kucmamea kpac nga hafoangoc gombunga wisic wisickea kpac feengkefude.