Hebiraio 10 - Deduamiti

Kuha feengkefude

¹ Wiac gombunga ngade haude, Moseac dedeseriyoac imoc wiac imocac ongea, imocngo wiac fora mi ande. Ifi anu ngic yeni kifaya kifaya Anutu afehegecdeac yeac hoannu hama sesengina siriha mocgusac faiandae nga imocngo ine dedeseriyoacac kucfu hafoangoc naric mi mengereyunuude.

² Dedeseringo hafoangoc mengereyunubacfu yeneac sese faifai imoc bic kpac ambac. Amma kopocsicngina bic dzuacdzuara yeni herenegen negengngina kpetiac kecma kopocsicnginaac gamegoc monggoc mi kecbau.

^3-4 Imoc yofi, burumakangiwa nga noningngiwaac sawango kopocsic meickeudeacsoc mi ande, kpac yombong. Imocac amma sesegerec faifaiac faka imocngo kifasoc kopocsicngina heigboriyemmekecdenoc.

⁵ Anu Kristongo bangectoa bangecfu mama imocac negensima Anutu yofi edeec, “Ge ubangerec nga kopocsicac sesegerec hania hania, imocac mi anggengkefec. Nga geng ine bangecsebi mong mengerema nennec.

⁶ Anu Ngicngac yeneng ramaburumaka hafoangoc kopocsicnginaac amma gerecfu faigec dzeande, imocngo songo mi meficgegenude, kpac.

⁷ Ifi anu deai, ‘Anutu, negenna, geac songo modacbadeac hayai nga kibi kpoukpouac manau neac yoac oho ohoya fede.’ ” (Myeg 40:6-8 Septuaginta mitikibiunac.)

⁸ Sesegerec sasawa imoc dedeseriyoac modacma faiandae nga Kebungo ine yoac yofi deec, “Ubangerec nga kopocsicac sesegerec hania hania nga ramaburumaka hafoangoc kopocsicngina amma gerecfu dzeande, imocac mi anggenude nga imocngo songo mi meficgegenude.”

⁹ Ifi dema yofi deec, “Negenna, geac songo modacbadeac hayai.” Ifi dema yeng sing gboria meseriudeac sing esea imoc meickeec.

¹⁰ Yesu Kristongo nenanggac negemma songo imoc modacma sebia mekemma naso mocgusac sese faiu sing imohai kpetiac aning kecdimbe.

¹¹ Womonggareng yeni wenacsoc namma womonggareng uangina mekecdae amma yeni sesegerec siriha mockicngoc nasoya nasoya mekecdae, imocngo ine ngicngac kopocsicngina meickeudeacsoc mi ande.

¹² Nga Kristongo kopocsic meickeudeac sese mocgusac kuha wisic wisickea kpac, imoc faima Anutuac foiau tataha mema tacde.

¹³ Nga Anutungo ngabafora yeac hania bageu hanititi siricfu faiyunubesande, ye imocac tomai tacde.

¹⁴ Yeng sese mocgusac faima ngicngac hafoangoc mengereyunuu yeni wisic wisickea kpac kpetiac kechereema kecbesandae.

¹⁵ Anu Tiri Asungo ifingoc hepuc amma yofi edenunuec,

¹⁶ “Kebungo yofi dede, ‘Ni ngadeguc dzadzahac gboria yenigoc mebesandua, imocac siriha yofi, dedeseriyoacna ngicngac yeneac negen negennu faima kibia imoc herenginau ohobade.

¹⁷ Amma kopocsicngina nga singyoac kpekpengina imoc sasawa wama monggoc mi negensibade.’ ” (Yer 31:33-34)

¹⁸ Nga Kebungo kopocsicnina waecac kopocsic meic meickeac seseac ua monggoc mi mebesonga.

Negen negensinggoc naric embesonga

^19-20 Negen negensinggoc tosofocnina, Yesu yengena sawaac kucfu nenang kengeha kpac kecma kporucnagu ferahema mana kpetiac nga kpataning yombonnu naric ennide. Yeng sing gboria nga kekehagoc witinemmeec nga kporucfusing kennideac yengena sebingo sing imocnoc menemmeec.

²¹ Womonggareng engenatoaninango Anutuac arengfora garennunuma kecde.

²² Nga nenang hanahema herenegen negennina gameagoc nga mi ngereeande, yeng imoc dzuaru kongaha fede nga sebinina doku kongahango dzuaru kongac kpeing. Imocac amma nenang ubaherenina fora imocgoc kekecnina isinggeyombonggema ye hafoangoc negensinggema Anutuac hoannu kembisina.

²³ Kebungo dedzegeac foraya nemmeudeac yoac deseriec, yeng dedea modarude. Nga imoc nenanggaru fingerudeac negenserima kecma deficgekecbisina.

²⁴ Amma songo nga angammeme gombunga botucninau feudeac nenang henggareng angemema meseriemekecbisina.

²⁵ Ngicngac goa yeni kpekpeturannina waandae, imoc mi ngereede. Nasotoa wegenede, ngeni imoc bic negendaeac meseriemekecbisia.

Kebu wabauac

²⁶ Nenang yoac foraac negen negeng mema negentegecmaguc kopocsic faka arenggema mekecnideu ine kopocsicninaac amma monggoc sese mong mi feude.

²⁷ Ebictoaninagoc kecni ising ising nasou gerectoa mongngo nonohoma memanganenunuudeac tomainina feude.

²⁸ Ngic mongngo Moseac dedeseriyoac kpeu ngic yohockang me harebec yeneng imoc hemma yoara wama yoacfu faigecdeu, ye ubamanganga kpac kpebucgegecdeac areng anude.

²⁹ Anu dzadzahacac sacngo ngic mong bic dzuarec, yeng ngade sac imoc ongea kpac dema Anutuac Medac witiau goteng tima Danggunucac Asu demanganeudeu, yearu turunga noc efea fingecmiude, imoc bic negendae.

³⁰ Nga “Kopocsicac turung kpoukpou imoc neac uanoc nga ni ngicngac kopocsicnginaac turung kpouyemmebade.” (Dser 32:35) Kebungo yoac imoc deec, ye negendimbe. Ye monggoc yofi deec, “Kebungo ngicngacfora isingyunuma yoacngina deude.” (Dser 32:36)

³¹ Anutu kekehagocac mariu embesonga, imoc ebihagoc nga kpendzengagoc yombong.

Serima kecbesonga

³² Ngeni hanahema Kebuac kperagia megec, naso imohai siduc gombunggac amma uatoa mema kpendzeng kpegec, imoc negensigec febeso.

³³ Amma ngic yeneng naso goau ngicngac yeneac kicfu faingunuma gamekpekpe nga defagoc amma ngunukporac angemmegec. Nga naso goau ngaba yeneng ngeneac tosofocngina ifi ayemmegec ngeni ogo angemmema yenigoc nanggec.

³⁴ Ngeni witicngic yenigoc ngenahafoc kpendzeng kpegec nga ngic yeneng goa ngenearunac witicamau faiyunugec nga ngaba yeneng goa ngenearunac hamangec faka angemmema hiedzongina megec. Ifi anggec ngeni ine sogaima yofi negenggec, hiedzonina feengkefude imocngo bangectoa bangecac hiedzo ferahedacde.

³⁵ Imocac ngeni kengeha kpac kecbisia. Kecma faka imocac buma kuneng meficgegecde.

³⁶ Ngeni modzotitia kpac kecgec, imoc ngereeude. Imocngo meficngunuu ngeni Anutuac enac tofoc tofoho amma dedzegeac foraya, imoc megecde.

³⁷ Anu naso wegenanec fede, imoc wisickeu, “Ngic haudeac dedea, ye naso mong mi ukuma haude.

³⁸ Ngicngacfocna dindingac kecdae, ngeni negen negensinggoc kechereema kecbesandae. Nga ngenearunac mongngo wanuma kenudeu neng ine yeac negemba ubaherenango mi ngereede.” (Hab 2:3-4)

³⁹ Nenang ye ngadehema hofeac sing modacma kemenide, imocac areng kpac. Nenang ine negen negensinggoc kecma firang amma ubaonganinagoc kekecseriu ennide nga embesandimbe.