Hebiraio 1 - Deduamiti

Medac ye wiac sasawaac kunenga

¹ Anutungo bicngoc naso homac singa hania hania imohai yoara profete yeneac enacfu faiu, yeneng bangecfocnina yoac edeyunukecgec.

² Nga yofinenggac naso wisic wisickeau ye yoara Medahaac enacfu faiu yeng yoac edenunuec. Bangecfu nga sawau amma kurumennu wiac sasawa fekende, imoc Anutu medahaarusing yegoc meficgeoc nga wiac imoc sasawa medahango meudeac desimiec.

³ Anu Medac ye yengenaoc Anutuac kperagia amma yeri siricngira mocgu andape. Nga Medac ye yoara kucgoc amma imocngo wiac sasawa bangecfu nga sawau amma kurumennu fekendacde, imoc nanggedaru fede. Amma ye ngicngac sasawa nenanggac kopocsic heidzuac ua mesima kurumennu Ngictau kuhagoc yeac foiau enec tacde.

Angero yeneac kunengngina

⁴ Medac ye angero sasawa yeneac kunengngina. Amma yeng kpac kuneng manggahango desimiu meec, kpara imocngo angero yeneac kpac sasawa feracyunuude.

⁵ Nga Anutungo angero monggac yofi mi edeec, “Ni yagucnoc megudua. Ge medacna nga ni geac Mangga.” (Myeg 2:7) Amma yeng angero monggac negemma yofi mi deec, “Ni yeac Manggac nga yeng neac Medac anude.” (2Sm 7:14; 1Ngts 17:13)

⁶ Amma ye waracmedaha bangectoa bangecfu kefudeac hesicke haec, naso imohai yofi deec, “Anutuac angero sasawa yeneng ye ngonducnemima afehebisia.” (Dser 32:43; Septuaginta mitikibiunac.)

⁷ Amma angero yeneac ine yofi deec, “Ye angerofora sueyunuu yeneng yoara mema kenggec gerecborang uayoac yemmeu yeneng ye kingang kpemigecde.” (Myeg 104:4)

⁸ Amma Medahaac negemma yofi deec, “Anutu, geac ngictau tatac imoc wisic wisickea kpac amma feengkecbesande. Amma ge eucererenggaac ngictauyasuga mena yoacga imoc dindingac.

⁹ Ge dindingac kekecac anggengande nga singyoac kpekpe, imocac ine ubagango waannec. Imocac amma Anutu, geac Anutungonoc sogac sogai kerecdokuya mema ge nga tosofocga nadzicngemmema geac witigau ine ebirangoc kpakeec.” (Myeg 45:6-7)

¹⁰ Amma yeng monggoc Medahaac yofi deec, “O Kebu, hanac hanaheaungoc bangecac titiseri fainec imoc seria fede. Kurumenga kurumenga yeni geangga marikibinoc.

¹¹ Wiac imoc sasawa yeni kpac andacbesandae nga ge ine kecengkecbesannec. Yeni sasawango ngakpi isoc esea anggecde.

¹² Geng bangec nga kurumenga kurumenga fekendae, yeni ngakpi isoc kpouyununade nga ngicngac wamba hesima gboria faiandae, ifi isoc yeni kpac anggec gboria yeneng habesandae. Nga geng nasosoc siric mocgungoc kecnade nga kecbesannec amma geac kifa kpetega imoc wisic wisickea kpac.” (Myeg 102:25-27)

¹³ Anu Anutungo angero monggac yofi mi edeec, “Ge marifoinau tacmana ngabafocga hanigaac bageau faiyunuba yeni hanigaac tatac ambesandae.” (Myeg 110:1)

¹⁴ Angero sasawa yeni asuareng amma ua mema kecdae nga ngicngac memengereac dedzege anec imoc megecdeac tomai kecdae yeni yeneac kingang kpegecdeac Anutungo sueyunuande.