Haggai 1 - Deduamiti

Anutungo womonga monggoc heigborima megecdeac deec

¹ Dareyawesngo Pares bangectoaac ngictau kefu kifaya yohockang nga afo siksac uameme mocgu kemmanu Kebungo Secalticelac medac Dzerubawel Yehuda yeneac gawana nga Yehotsadakac medac Yehosuac womonggarengtoa kefec, yereac yoac profete Haggai edeu yeng kemma yofi dekperagiyecmeec:

² Kurumenggac wasaiareng habuya habuya yeneac Kebu yeng yofi dede, ‘Ngicngac yomoc yeni yofi deandae, “Kebuac ama menideac naso imoc mi hadacngoc.” ’

³ Ifi deandaeac Kebungo yoara profete Haggai edeu yofi deec,

⁴ “Ngicngacfocna, naso yomoc neac amango manganema barackema femanu ngeneng ine ngenang ama kereng kerengngina mema ihai tacyac anganggac nasoya kpac.”

⁵ Imocac kurumenggac wasaiareng habuya habuya yeneac Kebu yeng yofi dede, “Ngeni negen negentegecgoc kekecngina dafi kecdae imoc gombunga isinggebisia.

⁶ Ngeni uau semeng homac homecandae amma fora efeanecsac meandae. Nga yaka neandae amma sifu mi gebecngunuande. Nga doku nemagec mi hetucngunuande amma wamba heiandae imocngo mi higereengunukecde. Nga dzoua mema dzo meandae imoc dzoamea titingagocfu barigec maande, ifi isoc angkecde.

⁷ Imocac amma ngeni negen negentegecgoc kekecngina dafi kecandae imoc gombunga isinggebisia.

⁸ Ni kuc nga kibikperagina imoc edzacngunubadeac nga ubangerec negembadeac ngeni sifecfu emma ic memama neac amana monggoc heigborima mebisia.

⁹ Ngeni semengtoagoc anggecdeac negensimagec fora efeanecsac angkefec. Nga semeng imoc amau mehamagec neng fifiba woraec. Nocac ifi fingecande? Neac amango barackema febibiemanu ngeneng ine ngenang amasac megecdeac gbicgbic kecandae.

¹⁰ Ifi anggecac amma sawaya sawayango asomenggac dzimbong kpae faimiec nga bangecngo nenesemenggac fora segerengemmeec.

¹¹ Amma neng deba wenactoango uanginau nga tikinginau amma padi nga yagong uanginau nga waing ua gboriau amma oliwa uau nga yaka hania hania bangecfu fingecande amma ngic nga ramaburumaka amma maringo ua mekecdae imocac witiau kpeu dzanggeec.” Kurumenggac wasaiareng habuya habuya yeneac Kebungo ifinoc dede.

Anutuac yoac modacgec

¹² Anu Secalticelac medac Dzerubawel nga Yehotsadakac medac womonggarengtoa Yehosuac amma yehudangicngac toseanec komoc kpegec yeneng Kebungina Anutu yeac yoara imoc negemma profete Haggaingo yoac deec, imoc modacgec. Nocac Kebungina Anutu yennoc profete Haggai yenearu sueec, ifi negenggec damuyunuu Kebu sesehegec.

¹³ Anu Haggai Kebuac siducdedengic yeng Kebuac yoac ngicngac edeyunuma deec, “Kebungo yofi dekperagide, ‘Ni neannaoc ngenigoc kecduae.’ ”

¹⁴ Amma Kebungo Secalticelac medac Dzerubawel Yehuda yeneac gawana nga Yehotsadakac medac Yehosuac womonggarengtoa kefec amma yehudangicngac toseanec komoc kpegec yeneac ongaasu midiu yeni negen negengngina kpedzucnema hama hanahema kurumenggac wasaiareng habuya habuya yeneac Kebu Anutungina yeac ama megec.

¹⁵ Dareyawesngo Pares bangectoaac ngictau kefu kifaya yohockang nga afo siksac uameme twentifo kemmanu yeni ua imoc hanahegec.