Fingec fingec 4 - Deduamiti

Kain nga Hawel fingeroc

¹ Anu ngic ye enema Ewagoc feu medac mong kpenanggema meec. Mema yofi deec, “Kebungo meficnuu ngic mong medua,” ifi dema kpara Kain kparec.

² Anu ngac ye monggoc kpenanggema munia Hawel meec. Anu ye kecma yadima rama garengyunuma kefec. Kaingngo ine semenguamemeac ngic amma kefec.

Anutuac sese faioc

³ Kecma Kaingngo Kebuac sese dema uayaunac semeng mema haec.

⁴ Anu Hawel ye ifingoc ramafora warac warac fingec fingera yenearunac goa kpema kerecngina tosea Kebuaru mehaec. Mehau Kebungo Hawel yengena nga sesea imoc henu ngereec

⁵ nga Kain amma sesea imoc ine mi henec. Ifi anu Kain ye herebutoa yombong negenu herebungo herea wakeu kicmesuya siriha mong anec.

⁶ Anu Kebungo yofi dema kpesimiec, “Ge nocac ngaba anna kicsamacga manganede?

⁷ Ge faka gombunga annadeu kicmesuga kpehengaima yenennade. Nga ge faka gombunga mi annadeu ine kopocsicngo naguu geac tomai namma memaguude. Ye geac ammiu ge ine yeac kpae faikecbesena.”

Kain ye munia kpebucgema bangecfu kuricngic anec

⁸ Anu Kain ye munia Hawel yofi dema edeec, “Nerang uau kende.” Ifi deu uau kemma munia Hawel ngaba ammima kpema kpebucgeec.

⁹ Kpebucgeu Kebungo yofi dema kpesimiec, “Kain ge munaga Hawel dahai?” Ifi deu yofi meremmiec, “Ni mi negenduae ni munanaac gareng kpahac.”

¹⁰ Ifi deu Kebungo yofi meremma edeec, “Ge noc faka andang? Munagaac sacngo bangecfunac kpacnuu negenduae.

¹¹ Anu ge marigango munaga kpebucgena bangecngo yeac sactoa neudeac enara anggedac imocac sowec witigau ende, ni bangec imohacnac meicgubade.

¹² Ge heikpekpe anna bangecngo kereha segeregenude. Anu ge kuricngic anna ngicngac yeneng kisanggugec ge yenearunac worama bangec sasawa yerecgema kecnade.”

¹³ Ifi deu Kain ye yofi merenec, “Kopocsicac memeting nennadeac denec imoc ebira yombong, ni ifi kecbadeacsoc mi anduae.

¹⁴ Ge yaguc heikpenec bangecfunac kporacnuna kicgaunac sufuma kecbade. Amma bangecfu ngicngac yeneng kisannugec ni kuricngic amma bangec yerecgema kecbade. Kecba ngicngac sasawa yenearunac mongngo meficnuudeu kpebucnuude.”

¹⁵ Ifi deu yofi deec, “Ifi kpac, mong ye Kain kpebucgeudeu ye imocac turunga naso seweng imocacsoc meude.” Ifi dema Kainggac sebiau kibi mong faiec imoc kecma mongngo meficgema kpebucgebauac ifi anec.

¹⁶ Ifi anu Kain ye Kebuac kicfunac meickema kemma bangec mong kpara Nod, Edennu wenac ere ereaubigeng imohai kefec.

Kain nambaracfora yeneac kpacareng

¹⁷ Anu Kain ye enemagoc feu hereagoc amma medac mong meec kpara Hanoc. Anu ye taongtoa mong mema medahaac kpac wase mema Hanoc kparec.

¹⁸ Anu Hanocac medac mong fingerec kpara Irad nga Iradac medac mong fingerec kpara Mehuyacel. Nga Mehuyacelac medaha mong fingerec kpara Metusacel nga Metusacelac medaha Lamec fingerec.

¹⁹ Lamec ye ine ngac yohockang meyuruec, mong kpara Ada nga mong kpara Tsilla.

²⁰ Anu Ada ye medac mong kpenanggema mema kpara Yawal kparec. Ngic imoc ye ngic kporucamanginau feyac amma ramaburumaka garengyunuandae yeneac hanac hanaheaac kisicngina yombong anec.

²¹ Yawal muniaac kpara ine Yuwal. Yuwal ye gitakpekpe nga kungac fifi fifi imocac ngic hanac hanaheaac kisicngina yombong anec.

²² Tsilla ye ifingoc hereagoc amma medac mong meec kpara Tuwal Kain. Yeng aieng tools hania hania mekefec. Nga yeac nainaac kpara ine Nacama.

²³ Anu Lamec ye enenghora yofi dema edeyuruec, “Ada nga Tsilla ubaudumenna negenec, enenghocna ngeri kedzac faima yoacna negenec, fora yombong, ngic mongngo nuu sebina yadiu ni ngic imoc kpebucgeai. Ngic medac mongngo ifingoc nuu kubec fingeru neng kpebucgeba homeec.

²⁴ Mong ye Kain kpebucgeudeu ye imocac turunga naso seweng meude nga ni kpebucnuudeu ine imocac turunga naso 77 meude.”

Set fingerec

²⁵ Anu Adam ye enemagoc monggoc feu hereagoc amma medac mong meec. Mema yofi deec, “Kaingngo Hawel kpebucgecac yeac turunga Anutungo sabac mong meisinggema nendac.” Ifi dema kpara Set kparec.

²⁶ Set ye ifingoc medaha mong fingeru kpara Enos kparec. Naso imohai hanahema ngicngac yeni Kebuac kpara kpacma dengerema eweheihei ammikecgec.