Esta 3 - Deduamiti

Hamangngo Yehuda ebicfu faiyunubeso anec

¹ Anu kecma naso monnu ngictau Dzeksingo Hamadataac medac Hamang Agagi arennunac, ngickiwa goa yenearunac ye sesehema yeneac enara faiec.

² Anu ngictau ye ngicngac sasawango Hamang fafoc heimima ngonducnemigecdeac deseriec. Anu enacdedefora oda naguyau gareng nanggec, yeneng yoac imoc modacgec. Ammanu Modekaingosac ine fafoc heimima ngonducnemiudeac wayombonggeec.

³ Ifi anu ngictauac enacdedefora oda naguyau nanggec yeneng Modekai kpesimigec, “Ge nocac ngictaungo yoac deseriec imoc mi modacnec?”

⁴ Dema naso homac ngictaungo yoac deseriec imoc modarudeac edegec yeng imoc negemma wakefec. Imoc yofiac Modekaingo ni Yehudangic, imoc bic edeyunuecac amma yeni Hamanggaru kemma faka imoc turungagoc me turunga kpac, imocac dekpesi ammigec.

⁵ Anu Hamangngo Modekai henu fafoc mi heimima mi ngonducnemiu herebu kuneng negenec.

⁶ Ifi anu Modekaiac ngicngacfora negengyunuecac amma Modekai yengenasac memangacmangane imoc wama Yehudaareng Dzeksiac eucererenggac bageu kecgec, yeni sing mong meficgema sasawa kpedzomangyunuudeac areng meec.

⁷ Dzeksingo ngictau kecmanu kifa 12 anec, imocac afo hanachanahea Nisan imohai Yehuda memanganeyunugecdeac, Hamanggac kicfu Kpeing kpegec. (Yeni ariac imocac kpara Pur deandae) Kpegec afo nga uameme imocac afo wisic wisickea Adar afo kificgeec.

⁸ Anu Hamangngo ngictau Dzeksiac deec, “Ngicngac goa haifakangina siriha mong yeneng geac eucererenggac bageu Prowins sasawau kecdae, yeni nenanggoc kpeketahema mi kekec agac kecdae. Nga ngictau geac singyoac mi modacdaeac amma nenanggoc kecgec mi ngereeude.

⁹ Ifiac amma ngictau geng negenna naric anudeu kpedzomangyununideac dedeseri mong dena kibiu faini kemeu imoc modacbisina. Amma neng 10 tauseng silwa dzo tohonggareng yenearu faiba dzo netohonggau faibisia.”

¹⁰ Deu ngictau yengena gbonggac bineng kibiagoc imocngo ngictauac dedeseri kibiu faima meseriande. Imoc hesima Yehuda yeneac ngaba Hamang Amedataac medac, Agagi arennunac ye miec.

¹¹ Mima yofi edeec, “Ge dzo wana tacmanu, ngicngac nocfaka ayemmebesonga negennec, imoc ayemmena.”

¹² Anu afo hanac hanaheaac uameme 13 imohai ngictauac kibi oho ohongicfora yeni heitaiyunuma kibi ohogecdeac Hamangngo dederecge ayemmeec. Ayemmeu imocac siricfu prowinsnginasoc amayoacnginau sing kibi ohoma ngictau Dzeksiac kpacfu nga ngictau yengena bineng kibiagoc imocngo kibi witiau heima prowins sasawa yeneac demengerengic nga gawanafocngina amma ngiha ngiha yeneac ngickiwafocngina yenearu faigec.

¹³ Anu kibi mekemmeha ngic yeneng memanganeyunugecdeac dedeseri imocac kibiseria mederema ngictauac bageu prowins kecgec yenearu ficfuc mekenggec. Nga kibiu ine yofi oho ohoya, “Afo Adarac uameme 13 imohai Yehuda ngicngac yada kapia amma ngac nambaracfocngina uameme mocguac manau memanganeyunuma yenang kucmadzidzic kpedzongac kpebucyunudacgecde amma iwaingina sasawa tigecenude.

¹⁴ Ifi anu kibi imoc meendzirema mesahema seria meserigec prowins sasawau kendarec. Anu yeni imoc hemma dahacnac dahacnacngo kengkena, yeneng naso imocac edzaucbedzauc amma kpedzucfu tacmagec naso imocngo habeso.

¹⁵ Anu imohaingoc kibi mekeng mehangic yeneng ngictauac dederecgeu kibi seria imoc gereagoc Susa amaherec seriau faigec kenu ihai kecgec, yeni negemma sasawango kpidohoma dabiegec. Ammanu ngictau nga Hamang yereng ine nenedoku nesogaigoc kefoc.